Ғолибони Олимпиадаи байналмилалии «Арифметикаи зеҳнӣ — Гурҷистон-2019» мукофотонида шуданд

ДУШАНБЕ, 04.12.2019 /АМИТ «Ховар»/. Имрӯз дар бинои Раёсати маорифи Вилояти Мухтори  Кӯҳистони Бадахшон маросими истиқболи ғолибони Олимпиадаи байналмилалии «Арифметикаи зеҳнӣ — Гурҷистон-2019»  баргузор гардида, онҳо бо «Ифтихорнома»-и Раёсати маорифи ВМКБ, «Ифтихорнома»-и шуъбаи маорифи шаҳри Хоруғ ва мукофоти пулӣ қадрдонӣ гардиданд. Дар ин бора аз Раёсати маорифи ВМКБ ба мухбири АМИТ «Ховар» хабар доданд.

Ба иттилои манбаъ, ғолибонро дар назди бино сардори Раёсати маорифи вилоят Одинашо Мардов ва дигар кормандони соҳаҳои маорифи шаҳру вилоят самимона истиқбол гирифтанд.

Ёдовар мешавем, ки 22 ноябр дар шаҳри Тблисии Ҷумҳурии Гурҷистон аз тарафи Ассотсиатсияи байналмилалии арифметикаи зеҳнӣ (GAMA)  Олимпиадаи IV байналмилалии «Арифметикаи зеҳнӣ- Гурҷистон – 2019» баргузор ва ҷамъбаст гардид, ки дар он хонандагон аз кишварҳои гуногуни ҷаҳон, бахусус аз Тоҷикистон, Ӯзбекистон, Қирғизистон ва Туркманистон бо ҳам рақобат карданд.

Аз муассисаҳои таълимии Вилояти Мухтори Кӯҳистони Бадахшон хонандагони зерин, ки дар Мактаби маълумоти касбӣ ва давомдори Донишгоҳи Осиёи Марказӣ дар шаҳри Хоруғ тайёрӣ мебинанд, аз номи Тоҷикистон дар ин олимпиада ширкат варзида, сазовори чунин ҷойҳои ифтихорӣ гардиданд:

-хонандаи синфи 7-уми МТМУ №2 шаҳри Хоруғ Зӯҳро Шафиева сазовори ҷойи 3- юм;

-хонандаи синфи 5-уми МТМУ №7 шаҳри Хоруғ Зӯҳро Алифбекова сазовори унвони чемпиони мутлақ (супер чемпион);

-хонандаи синфи 4-уми муассисаи таълимии Литсейи Оғохони шаҳри Хоруғ Зӯҳро Элназарова  сазовори ҷойи 1-ум;

-хонандаи синфи 6-уми муассисаи таълимии Литсейи Оғохони шаҳри Хоруғ Хайруллобек Абдуламиров сазовори ҷойи 1-ум;

-хонандаи синфи 7-уми муассисаи таълимии Литсейи Оғохони шаҳри Хоруғ Аниса Имомберидиева  сазовори унвони чемпион;

-хонандаи синфи 6-уми муассисаи таълимии Мактаби Президентии шаҳри Хоруғ Шоғиёс Мамадризохонов  сазовори унвони чемпион;

-хонандаи синфи 4-уми муассисаи таълимии Мактаби Президентии шаҳри Хоруғ Абдулназар Мавлоназаров сазовори ҷойи 2-юм гардиданд.