Чаро кишоварзони шаҳри Турсунзода аз истеҳсоли 2753 тонна пахта қариб 3 миллион сомонӣ зарар диданд?

ТУРСУНЗОДА, 13.02.2020. /АМИТ «Ховар»/. Хабарнигори АМИТ «Ховар» Субҳониддини Маҳмуд зимни нишасти матбуотӣ дар шаҳри Турсунзода ба масъулин савол дод, ки чаро соли 2019  кишоварзони шаҳр  аз истеҳсоли пахта ба ҷои фоида зарар диданд? Муовини раиси шаҳр оид ба соҳаи кишоварзӣ Ҳамдам Долизода ба ин савол чунин посух дод:

Кишоварзони шаҳр соли сипаригардида дар 1520 гектар чигит кишт карданд. Аз сабаби номусоид омадани боду ҳаво 150 гектар замини кишт нобуд гардида,  хоҷагиҳои деҳқонӣ такроран пунбадона кишт намуданд. Мутаассифона, соли 2019 ҳарчанд Вазорати кишоварзӣ ва Вазорати рушди иқтисод ва савдои Ҷумҳурии Тоҷикистон  нархи як тонна пахтаро 6700 сомонӣ муайян карда бошанд ҳам,  вале корхонаҳои коркарди пахта як тонна пахтаро аз 4000 сомонӣ то 4300 сомонӣ қабул карданд. Дар сурате  ки  соли 2018 як тонна пахта аз 5000 то 5500 сомонӣ харидорӣ гардида буд. Аз ҳисоби  арзон харидорӣ шудани пахта  кишоварзони шаҳри Турсунзода аз истеҳсоли 2753 тонна пахта қариб 3 миллион сомонӣ зарар диданд.

Бояд гуфт, ки соли 2019 дар ҳамаи шаклҳои хоҷагидории шаҳри Турсунзода ба маблағи 606,1 миллион сомонӣ маҳсулоти кишоварзӣ истеҳсол шудааст, ки нисбат ба соли 2018  30,2 миллион сомонӣ зиёд мебошад. Аз ҷумла, истеҳсоли маҳсулоти растанипарварӣ 469,3 миллион сомонӣ ва маҳсулоти чорводорӣ 136,8 миллион сомониро ташкил медиҳад. Ин матлабро зимни нишасти матбуотӣ раиси шаҳри Турсунзода Абдуқодир Вализода иброз намуд.

Ба маълумоти номбурда, соли 2019 ба шаҳру ноҳияҳои ҷумҳурӣ ва мамлакатҳои Афғонистон, Покистон, Қирғизистон, Ӯзбекистон ва Россия  67 ҳазору 872 тонна маҳсулоти кишоварзӣ содирот шудааст.