Дар Чин ба қурбониёни мубориза бар зидди COVID-19 унвони «қаҳрамонони фавтида» дода мешавад

ДУШАНБЕ, 19.02.2020 /АМИТ «Ховар»/. Чин санаде ба нашр расонид, ки ба кормандони соҳаи тиб ва дигар гурӯҳи шахсони фавтида дар мубориза бар зидди  эпидемияи илтиҳоби шуш, ки дар натиҷаи хуруҷи намуди нави коронавирус (COVID-19) ба ҳалокат расидаанд, додани унвони «қаҳрамонони фавтида»-ро пешбинӣ менамояд, хабар медиҳад АМИТ «Ховар» бо истинод ба агентии итттилоотии «Синхуа».

Дар санаде, ки дар якҷоягӣ аз ҷониби Вазорати кор бо собиқадорони Ҷумҳурии Мардумии Чин  ва Идораи сиёсии Шӯрои марказии ҳарбӣ нашр шудааст, зикр гардидааст, ки ин навгонӣ шахсони фавтидаро, ки ҳангоми иҷрои вазифаҳои хизматии худ бо нафарони гумонбаршудаи гирифтор ба вирус  ё ҳолатҳои тасдиқшудаи беморӣ, аз ҷумла ташхис, табобат, нигоҳубини бемор, назорати беморхона, ҷамъоварии намуна, муайян кардани микроорганизмҳо ва интиқоли беморҳо алоқа доштанду аз ин намуди нави коронавирус сироят ёфтаанд, дар бар мегирад.

Гурӯҳи дигари шахсоне, ки худро дар мубориза бар зидди эпидемия қурбон кардаанд, ҳамчунин метавонанд бо риояи меъёрҳои муайян бо унвони «қаҳрамонони фавтида» сарфароз гарданд, гуфта мешавад дар он.

Дар санад инчунин оид ба изҳори тасаллият ва пардохти ҷуброн ба оилаҳои «қаҳрамонони фавтида»  таъкид шудааст.