Ширин Амонзода: «Ба Тоҷикистон беш аз 1,2 миллион нафар сайёҳони хориҷӣ ташриф овардаанд, ки дар қиёс ба соли 2018-ум 21,5 фоиз зиёд аст»

Февраль 7, 2020 16:12

ДУШАНБЕ, 07.02.2020 /АМИТ «Ховар»/. Соли гузашта ба Тоҷикистон  беш аз 1,2 миллион нафар сайёҳони хориҷӣ  ташриф овардаанд, ки ин омор  дар қиёс ба соли 2018   219,7 ҳазор нафар ё 21,5 фоиз зиёд аст.

Раиси тозатаъйини Кумитаи рушди сайёҳии назди Ҳукумати Ҷумҳурии Тоҷикистон  Ширин  Амонзода 7 феврал дар ҷамъи хабарнигорон дар Душанбе гуфт, ки ба бистгонаи кишварҳое, ки шаҳрвандонашон ба ҳайси сайёҳ ба Тоҷикистон  ташриф овардаанд, давлатҳои Ӯзбекистон, Россия, Беларус,  Қирғизистон, Қазоқистон, Туркманистон, Туркия, Чин, Афғонистон,  Молдова, Канада,  Корея, Япония, Италия, Франсия, Германия, Британияи Кабир, Ҳиндустон, Амрико ва Корея   шомил мебошанд. Бо назардошти иқтидор ва захираҳои бои сайёҳие, ки дар Тоҷикистон мавҷуданд, сайёҳони хориҷӣ бештар ба намудҳои саёҳати   экологӣ-кӯҳнавардӣ ва таърихию фарҳангӣ  майл доранд.

Ширин Амонзода афзуд, ки ба сайёҳони дохилию хориҷӣ 282 объекти хизматрасонии сайёҳӣ, аз қабили меҳмонхона, осоишгоҳу истироҳатгоҳ, ҳостел, маҷмааҳои сайёҳӣ, ки фарогири қариб панҷ ҳазор нафар корманд мебошанд, хизмат расонидаанд.

Гуфта шуд, ки бо мақсади таъмини иҷрои Амри Президенти Ҷумҳурии Тоҷикистон оид ба эълон гардидани солҳои 2019 — 2021 ҳамчун Солҳои рушди деҳот, сайёҳӣ ва ҳунарҳои мардумӣ баҳри рушди соҳаи сайёҳӣ, бахусус инфрасохтори он ҳамкорӣ бо ниҳодҳои байналмилалии молиявӣ тақвият дода шуда, ҷалби маблағҳои грантӣ аз Бонки ҷаҳонӣ дар ҳаҷми 15 миллион доллари амрикоӣ барои татбиқи Лоиҳаи «Рушди иқтисодиёти деҳот» ва Бонки осиёии рушд ба андозаи 10 миллион доллари амрикоӣ барои татбиқи Лоиҳаи «Рушди соҳаи сайёҳӣ» роҳандозӣ мегардад.

Бо дахли омода намудани мутахассисон дар бахши сайёҳии мамлакат  Ширин Амонзода зикр намуд, ки алҳол дар 14 муассисаи олии касбии ҷумҳурӣ  беш аз 2 ҳазор нафар ва 550 нафар дар коллеҷҳо аз рӯи 16 ихтисоси соҳаи сайёҳӣ ба таҳсил фаро гирифта шудаанд.

Зикр гардид, ки Кумитаи рушди сайёҳии назди Ҳукумати Ҷумҳурии Тоҷикистон фаъолияти худро тибқи қонунгузории Ҷумҳурии Тоҷикистон дар доираи Солҳои рушди деҳот, сайёҳӣ ва ҳунарҳои мардумӣ, Нақша чорабиниҳои «Стратегияи рушди сайёҳӣ барои давраи соли 2030, барои солҳои 2019 -2022» ва «Барномаи рушди сайёҳӣ барои солҳои 2018-2020» ба роҳ мондааст.

Рисолати Кумита ба рушди соҳаи сайёҳӣ, муаррифии шоистаи имкониятҳои сайёҳии мамлакат дар дохил ва хориҷи ҷумҳурӣ, эҳё ва рушди ҳунарҳои мардумӣ, беҳтар гардидани симои сайёҳии Ватанамон дар арсаи байналмилалӣ ва ҷалби сармоя ба рушди инфрасохтори соҳа нигаронида шудааст.

Февраль 7, 2020 16:12

Хабарҳои дигари ин бахш

Дар Тоҷикистон барои соҳибкорони инфиродии тибқи патент ё шаҳодатнома фаъолияткунанда тартиби нави андозбандӣ муқаррар гардид
«Моликияти зеҳнӣ ва ҷавонон: Инноватсия барои ояндаи беҳтар». Таҳти чунин унвон дар Душанбе ҳамоиш доир шуд
Татбиқи «Барномаи рушди нақлиёти барқӣ дар Ҷумҳурии Тоҷикистон барои солҳои 2022-2026» истифодаи электромобилҳоро афзоиш медиҳад
ПАНҶСОЛАИ РУШДИ САНОАТ. ҶДММ «Тоҷфилиз» дар се моҳ ба маблағи зиёда аз 2 миллион сомонӣ маҳсулот истеҳсол намуд
ТАЪМИНИ АМНИЯТИ ОЗУҚАВОРӢ. Дар Маркази назорати давлатии санитарию эпидемиологии Суғд бо масъулини соҳаи савдо мулоқот доир шуд
«Somon Air» дар масири Душанбе-Алмато-Душанбе ҳафтае ду маротиба парвоз анҷом медиҳад
Дар Душанбе дурнамои нишондиҳандаҳои рушди соҳаҳои воқеии иқтисоди миллӣ баррасӣ гардид
Дар ноҳияи Ҷалолиддини Балхӣ вобаста ба содироти маҳсулоти кишоварзӣ ҷаласа доир шуд
Дар Душанбе рушди ҳамкории мутақобилан судманди Тоҷикистон ва Дафтари Швейтсария оид ба ҳамкории иқтисодӣ баррасӣ гардид
НАМОИШГОҲИ «ИННОПРОМ.Осиёи Марказӣ». Дар он маҳсулот ва хизматрасонии 28 корхонаи Тоҷикистон ба намоиш гузошта шудааст
Дар шаҳри Бохтар ярмарка-фурӯши маҳсулоти мавриди ниёзи аввал бо нархҳои нисбатан арзон фаъолият дорад
Дар Тоҷикистон дар зиёда аз 152 ҳазор гектар зироати баҳорӣ кишт шудааст