Вазири тандурустӣ ва ҳифзи иҷтимоии аҳолӣ: Бояд муассисаҳои тандурустии мамлакат барои пешгирӣ ва табобати коронавирус ҳамаҷониба омода бошанд

ДУШАНБЕ, 03.02.2020 /АМИТ «Ховар»/. Масъалаи андешидани тадбирҳои иловагӣ бар зидди сирояти коронавирус, ки дар Ҷумҳурии Мардумии Чин ба қайд гирифта шудааст, айни замон зери назорати махсуси Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Аз ин рӯ ҳадаф ва мақсади баргузор намудани ҷаласаи ғайринавбатии ҳайати мушовара-ин пешгирии  сирояти эҳтимолии коронавирус дар Тоҷикистон буда, бояд муассисаҳои тандурустии мамлакат барои пешгирӣ ва табобат ҳамаҷониба омода бошанд. Ин нуктаро Вазири  тандурустӣ ва ҳифзи иҷтимоии аҳолӣ Насим Олимзода  зимни ҷаласаи ғайринавбатии ҳайати мушовараи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оид ба андешидани тадбирҳои мушаххас ҷиҳати пешгирии  сирояти коронавирус дар мамлакат, ки 1 феврал дар Душанбе сурат гирифт, иброз намуд.

Тавре аз Вазорати тандурустӣ ва ҳифзи иҷтимоии аҳолӣ ба АМИТ «Ховар» хабар доданд, дар кори ҷаласа муовинони вазир Саида Умарзода, Азиз Одиназода, Мирҳамуддин Камолзода, Шодихон Ҷамшед, ректори Донишгоҳи давлатии тиббии Тоҷикистон ба номи Абӯалӣ  ибни Сино Маҳмадшоҳ Гулзода, роҳбарони хадамоти соҳавӣ, Агентии давлатии ҳифзи иҷтимоӣ, сардорони раёсатҳои тандурустии вилояти Мухтори Кӯҳистони Бадахшон, Хатлон ва Суғд, роҳбарони марказҳои ҷумҳуриявӣ ва муассисаҳои тандурустии вилоятҳо, шаҳру ноҳияҳо ва дигар кормандони соҳа иштирок намуданд.

Муовини  Вазири тандурустӣ ва ҳифзи иҷтимоии аҳолӣ Мирҳамуддин Камолзода оид ба тадбирҳои андешидашуда ҷиҳати пешгирии сирояти коронавирус дар мамлакат зикр намуд, ки то имрӯз аз ҷониби Вазорати тандурустӣ бо мақсади пешгирии интиқоли сирояти коронавирус ба ҷумҳурӣ ситоди доимоамалкунанда таъсис дода шуда, дар гузаргоҳҳои сарҳади давлатии ҷумҳурӣ  назорат пурзӯр карда шудааст.

«Бо мақсади қатъ намудани сафари шаҳрвандони Тоҷикистон ба Ҷумҳурии Мардумии Чин ва баръакс, Вазорати тандурустӣ ва ҳифзи иҷтимоии аҳолӣ ба Вазорати корҳои хориҷии Ҷумҳурии Тоҷикистон ва Кумитаи рушди сайёҳии назди Ҳукумати Ҷумҳурии Тоҷикистон мактуб ирсол намуд.  Ҳамзамон бо назардошти дар заминаи ширкату корхонаҳои муштарак фаъолият намудани шаҳрвандони Ҷумҳурии Мардумии Чин дар Тоҷикистон аз роҳбарияти Вазорати меҳнат, муҳоҷират ва шуғли аҳолии Ҷумҳурии Тоҷикистон, Вазорати саноат ва технологияҳои нави Ҷумҳурии Тоҷикистон, Вазорати нақлиёти Ҷумҳурии Тоҷикистон ва Кумитаи меъморӣ ва сохтмони назди Ҳукумати Ҷумҳурии Тоҷикистон дархост карда шуд, ки оид ба мавзеи ҷойгиршавии корхонаю ширкатҳо, шумораи мутахассисони чинӣ ва маҳали будубоши онҳо ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон маълумот пешниҳод намоянд. Ҳамзамон  аз роҳбарияти Вазорати маориф ва илми Ҷумҳурии Тоҷикистон дархост карда шуд, ки  рӯйхати донишҷӯёни тоҷикеро, ки дар Ҷумҳурии Мардумии Чин таҳсил мекунанд,  бо нишон додани маҳали зист барои назорати тиббии минбаъда ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон пешниҳод намояд»,- гуфт Мирҳамуддин Камолзода.

Бино ба ибрози номбурда, «то имрӯз дар Ҷумҳурии Тоҷикистон ягон ҳодисаи гумонбар ба сирояти коронавирус мушоҳида нагардидааст. Бо  мақсади пешгирии интиқоли он ба ҷумҳурӣ ва ҷиҳати дар ҳолати омодабош қарор доштан ба муассисаҳои табобатию профилактикӣ ва ҳифзи иҷтимоии мамлакат супориш ва дастуру пешниҳодоти зарурӣ дода мешавад».

Зикр намудан ба маврид аст, ки айни замон дар 27  гузаргоҳи сарҳадии калону хурд, ки бо кишварҳои ҳамсоя фаъолият мекунанд, аз 2 то 5 мутахассиси соҳаи тандурустӣ ва эпидемиологҳо фаъолияти шабонарӯзӣ мебаранд.

Ҳамзамон тибқи супориши бевоситаи  Президенти Ҷумҳурии Тоҷикистон  муҳтарам Эмомалӣ Раҳмон Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар ҳамкорӣ бо сохторҳои марбута гардиши молу мавод дар сарҳад, нуқтаҳои сарҳадии рафтуомади шаҳрвандон ва дигар ҳолатҳои эҳтимолии гузариши ин бемориро зери назорати қатъӣ қарор додааст.

30 январи соли равон Ташкилоти умумиҷаҳонии тандурустӣ  зимни баргузории нишаст ҷиҳати паҳн шудани коронавирус вазъияти фавқулодаи байналмилалӣ эълон кард  ва хостори кумак ба кишварҳо барои муқобила бо паҳн шудани ин вирус шуд.

Ёдовар мешавем, ки то 2 феврал 17 ҳазору 205 ҳодисаи сирояти коронавирус дар Ҷумҳурии Мардумии Чин ба қайд гирифта шуда, аз ин шумора 361 нафар фавтидаанд. Сирояти коронавирус қариб дар ҳама музофотҳои  кишвари Чин ба қайд гирифта шуда, ҳамзамон интиқоли он дар  беш аз 23 кишвари дигар низ дида мешавад.