Ноҳияи Хуросон: Хонаву ҳавлиҳои сокинон аз селовардаҳо пок карда мешаванд

ДУШАНБЕ, 23.05.2020 /АМИТ «Ховар»/. 53 нафар сарбозон ва афсарони қисми ҳарбии 45989-и Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон (КҲФ)  хонаҳои  42 хонаводаро аз обу лойқа  тоза карданд, хабар додан ба АМИТ «Ховар» дар КҲФ.

Нақлиёти аз ҷониби мақомоти иҷроияи ҳокимияти давлатии ноҳияи Хуросон ва КҲФ ҷудошуда 180 метр заҳбуру заҳкаш, 63 метр канали обгузарро тоза карданд. То бегоҳи рӯзи 22-уми май Хадамоти муҳофизат аз селҳо 659 маҷрои канал дар мавзеи офати табииро соҳилбандӣ намуд. Инчунин, теппаҳои муҳофизатии канали Хоҷақалъа барқарор карда шуданд. Хадамоти нақлиёт ва роҳи ноҳияи Хуросон дар маҷмуъ 250 метр роҳи деҳаи Н.Асадуллоро аз лой пок намуд, инчунин 1500 метр роҳои байникучавиро тахту ҳамвор намуд.

Беморхонаи №5 ҷамоати деҳоти С.Айнӣ аз  хоку лой тоза карда шуда, деворҳо ва дарахтон сафед карда шуданд.

Хадамоти энергетикии ноҳия дар деҳаи Гулистони ҷамоати деҳоти С.Айнӣ 10 адад пояҳои бетонӣ   насб кард ва дар сохтмони хатҳои интиқоли қувваи барқ бо дарозии 1,5 км ва кашидани хати интиқоли қувваи барқ бо дарозии 3 км корҳо оғоз гардиданд.

Аз ҷониби Шуъбаи дезинфексияи ноҳия дар деҳаи Н.Асадулло  130 хона ва иншоотҳои ёрирасон, шаҳрчаи хаймавӣ  инчунин, дар деҳаи Хуросон 20 хона ва иншотҳои ёрирасон, кӯчаю роҳравҳо, беморхонаи № 5 корҳои безараргардонӣ гузаронида шуд.

Корҳои бартарафсозии оқибатҳои офати табиӣ дар минтақа идома доранд.