ВАЗОРАТИ ТАНДУРУСТӢ ВА ҲИФЗИ ИҶТИМОИИ АҲОЛӢ ҲУШДОР МЕДИҲАД: беэътиноӣ ва бемасъулиятии шаҳрвандон метавонад сабаби зиёд шудани теъдоди гирифторони COVID-19 дар Тоҷикистон гардад

Август 6, 2020 13:58

ДУШАНБЕ, 06.08.2020 /АМИТ «Ховар»/. Тавре қаблан АМИТ «Ховар» иттилоъ дода буд, 4 июн Ситоди ҷумҳуриявӣ оид ба пурзӯр намудани тадбирҳои зиддиэпидемиявӣ ва пешгирӣ аз паҳншавии бемории сироятии COVID-19 дар Ҷумҳурии Тоҷикистон бо нашри муроҷиатнома аз тамоми шаҳрвандони мамлакат эҳтиромона хоҳиш намуд, ки қоидаҳои гигиенаи шахсию ҷамъиятиро ба таври ҳатмӣ риоя карда, бе ниқобҳои муҳофизатӣ аз хона набароянд, дар нақлиёт ва дигар ҷойҳои ҷамъиятӣ ҳатман аз ниқобҳои муҳофизатии тиббӣ истифода намоянд ва ба таври қатъӣ фосилаи байни ҳамдигарро ба андозаи аз якуним то ду метр нигоҳ доранд.

Мутаассифона, новобаста аз тадбирҳои андешидаи давлат ва Ҳукумати Тоҷикистон ва кормандони соҳаи тандурустӣ дар самти пешгирии бемории COVID-19, имрӯзҳо бархе аз шаҳрвандони мамлакат бар хилофи тавсияи мутахассисони соҳа ҷиҳати пешгирии ин беморӣ амал менамоянд.

Махсусан, имрӯзҳо дар ҷойҳои ҷамъиятӣ, кӯчаву хиёбонҳо, марказҳои хизматрасонӣ, дохили нақлиёти ҷамъиятӣ ва дигар ҷойҳои серодам шаҳрвандони зиёдеро вохӯрдан мумкин аст, ки ниқоби тиббӣ надоранд ва фосилаи иҷтимоиро риоя намекунанд, ки ин амали онҳо хилофи қоидаҳои пешгирии бемории коронавируси нави COVID-19 мебошад.

Дар робита ба риоя нагардидани қоидаҳои пешгирии бемории COVID-19 аз ҷониби шаҳрвандони мамлакат Вазорати тандурустӣ ва ҳифзи иҷтимоии аҳолии ҷумҳурӣ изҳори нигаронӣ карда, ба сокинони кишвар чунин муроҷиат намудааст:

ДАР АКС: бинои Вазорати тандурустӣ
ва ҳифзи иҷтимоии аҳолии ҶТ

«Ҳамватанони гиромӣ!

Пешгирии бемории коронавируси нави COVID-19 аз ҳар яки мо, сокинони Тоҷикистон вобастагии калон дорад, зеро агар мо қоидаҳои беҳдоштиро қатъиян риоя намоем ва дар самти пешгирии коронавирус саҳм гузорем, метавонем ҳарчи зудтар кишварамонро аз ин беморӣ наҷот диҳем ва ба кору зиндагии муқаррарӣ баргардем.

Аммо, бепарвоиву бемасъулиятии ҳар кадоми мо метавонад боиси авҷ гирифтани беморӣ ва зиёд шудани теъдоди гирифторони COVID-19 дар Тоҷикистон гардад.

Падарону модарони азиз!

Дар навбати худ шумо масъул ва вазифадор ҳастед, ки фарзандони хешро дар самти риояи қоидаҳои пешгирии бемории COVID-19 қатъиян назорат намоед. Ба онҳо бояд бифаҳмонед, ки дар ҷойҳои ҷамъиятӣ фосилаи иҷтимоиро риоя намоянд ва ҳатман аз ниқоби тиббӣ истифода баранд.

Ҳамзамон масъулини тамоми вазорату идораҳо, ташкилоту муассисаҳо ва дигар сохторҳои давлативу ғайридавлатиро зарур аст, ки ҷиҳати риояи қоидаҳои пешгирии бемории COVID-19 дар байни кормандони хеш корҳои фаҳмондадиҳиро пурзӯр намоянд ва масъалаи мазкурро таҳти назорати қатъӣ ва доимӣ қарор бидиҳанд.

Дар хотир дошта бошед, ки қатъиян риоя намудани қоидаҳои гигиенаи шахсӣ ва ҷамъиятӣ, истифодаи ҳатмии ниқобҳои муҳофизатии тиббӣ ва риояи фосилаи байниҳамдигарӣ дар шароити паҳншавии бемории сироятии коронавирус тадбирҳои давлат ва Ҳукумати Ҷумҳурии Тоҷикистонро дар роҳи ҳифзи солимии ҷомеа ва мубориза бар зидди ин бемории сироятӣ тақвият бахшида, ба пешгирии саривақтии мавҷи дуюми хуруҷи ин беморӣ дар мамлакат мусоидат менамояд».

АКСҲО аз бойгонӣ

 

Август 6, 2020 13:58

Хабарҳои дигари ин бахш

«АЗ ХУДМУОЛИҶАКУНӢ ХУДДОРӢ НАМОЕД!». Чунин ҳушдор дод роҳбари Пажӯҳишгоҳи байналмилалии тандурустӣ ва тадқиқотии Ню-Йорк Ораш Алоӣ дар суҳбат бо АМИТ «Ховар»
ПЕШВОИ МИЛЛАТ БА КОНСТИТУТСИЯ АРҶ МЕГУЗОРАНД. Андешаҳо дар ҳошияи Паёми Президенти Тоҷикистон ба Маҷлиси Олии мамлакат
Дар Тоҷикистон гирифтани вояи сеюми ваксинаи зидди COVID-19 оғоз гардид
COVID-19. Кормандони мақомоти иҷроияи ҳокимияти давлатии ноҳияи Исмоили Сомонӣ аз реваксинатсия* гузаштанд
ДИҚҚАТ, ЭҲТИЁТ! Дар Узбекистон афзоиши ногаҳонии гирифторони коронавирус мушоҳида гардид
ТАҲАВВУЛОТИ ҚАЗОҚИСТОН ВА ПАЙОМАДҲОИ ОНҲО БАРОИ КИШВАРҲОИ МИНТАҚА. Андешаҳои коршиноси масоили сиёсӣ Зубайдулло Давлатов дар ин бора
ИМРӮЗ НИШАСТИ ФАВҚУЛОДАИ СААД ДОИР МЕШАВАД. Роҳбарони кишварҳои узви ин созмон вазъи Қазоқистонро баррасӣ менамоянд
«ТОҶИКИСТОН — КИШВАРИ ДАРЁҲОИ ТИЛЛОӢ». Имрӯз дар Париж маросими ба анҷом расидани намоиши нигораҳои таърихии Тоҷикистон доир гардид
ДАР СЕ ДАҚИҚА ДАР БОРАИ СӢ СОЛ. Телевизиони марказии Чин навореро дар бораи ҳамкории Чин ва Тоҷикистон намоиш дод
РОҲИ ДУШАНБЕ-ЧАНОК КУШОДА ШУД. Роҳ пас аз фаромадани 17 тарма тоза карда шуда, ҳаракати нақлиёт дар ду самт оғоз гардид
ШУМОРАИ НАВБАТИИ БЮЛЛЕТЕН «ОИД БА ТАДБИРҲОИ МУБОРИЗА БО КОРОНАВИРУС ДАР КИШВАРҲОИ ИДМ» НАШР ШУД. Бахши вобаста ба Тоҷикистон аз маводи нашркардаи АМИТ «Ховар» иборат аст
АҚЛИ РАСО ВА ДИДАИ БИНО. Омилҳое, ки барои дарки мазмуну моҳияти Паёми Пешвои миллат ба мақоми олии намояндагӣ ва қонунгузории мамлакат заруранд

Хабарҳои муҳимтарин

Маводҳои таҳлилӣ