БО МО СОҲИБКОР ШАВЕД! Дар Душанбе бинои Муассисаи давлатии «Ташаккул ва рушди соҳибкории Тоҷикистон» ифтитоҳ гардид

Сентябрь 15, 2020 16:40

ДУШАНБЕ, 15.09.2020/АМИТ «Ховар»/. Имрӯз дар шаҳри Душанбе бинои Муассисаи давлатии «Ташаккул ва рушди соҳибкории Тоҷикистон», ки дар назди Кумитаи давлатии сармоягузорӣ ва идораи амволи давлатии Ҷумҳурии Тоҷикистон таъсис дода шудааст, ба таври расмӣ ифтитоҳ гардид. Дар маросими ифтитоҳи он Раиси Кумитаи давлатии сармоягузорӣ ва идораи амволи давлатии Ҷумҳурии  Тоҷикистон Фаррух Ҳамрализода, Сафири Фавқулода ва Мухтори  Япония дар Ҷумҳурии Тоҷикистон Такаюки Мияшита, роҳбари намояндагии Барномаи рушди Созмони Милали Муттаҳид  дар Тоҷикистон (UNDP) Пратибҳа Меҳта ва роҳбарону намояндагони масъули Дастгоҳи иҷроияи Президенти мамлкат, вазорату идораҳои марбутаи ҷумҳурӣ иштирок ва сухан намуданд.

Фаррух Ҳамрализода  зикр кард, ки Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳибкорӣ аҳамияти хосса дода, дар ин самт барои ташаккули соҳибкорӣ заминаи мусоид фароҳам овардааст.

Таъкид гардид, ки соҳибкорӣ яке аз самтҳои афзалиятнок ба шумор рафта, рушди иқтисодию иҷтимоии мамалакат аз он вобастагии зиёд дорад. Маҳз бо шарофати Истиқлолияти давлатӣ ва фазои орому осудаи мамлакат ин соҳаи ҳаётан муҳим рӯз то рӯз густариш ёфта истодааст.

Президенти Ҷумҳурии Тоҷикистон муҳтарам Эмомалӣ Раҳмон дар Паёмашон ба Парлумони мамлакат 26 декабри соли 2018 оид ба баланд бардоштани савияи дониши ҳуқуқӣ, молиявӣ ва иқтисодии соҳибкорон, расонидани кумак барои таҳияи лоиҳаҳои тиҷоратӣ ва дарёфти роҳҳои татбиқи онҳо, бахусус ба субъектҳои соҳибкории навтаъсис ва ҷалби ҷавонон ба фаъолияти соҳибкорӣ таъкид намуда, гуфтанд, ки муассисаҳои омӯзишӣ, ки дар як вақт вазифаи маркази таълимии соҳибкоронро иҷро мекунанд, таъсис дода шаванд.

Дар ин росто, дар партави ташаббуси Пешвои миллат бо мақсади дастгирии соҳибкорони ҷавон ва рушди соҳибкории хурду миёна тавассути хизматрасониҳои методӣ, иттилоотӣ, омӯзишӣ, ҳуқуқӣ ва молиявӣ бо Қарори Ҳукумати Ҷумҳурии Тоҷикистон аз 31 декабри соли 2018 дар назди Кумитаи давлатии сармоягузорӣ ва идораи амволи давлатии Ҷумҳурии Тоҷикистон Муассисаи давлатии «Ташаккул ва рушди соҳибкории Тоҷикистон» таъсис дода шуд.


Бо мақсади васеъ фаро гирифтани соҳибкорони хурду миёна ва навтаъсису ҷавон ба фаъолияти сохибкорӣ дар минтақаҳои гуногуни ҷумҳурӣ-шаҳрҳои Бохтар, Кӯлоб, Хуҷанд, Конибодом ва Хоруғ муассиса ва шуъбаҳову бахшҳои он фаъолият менамоянд. Аз оғози фаъолият то ба имрӯз муассиса дар баланд бардоштани маърифати соҳибкории ҷавонон саҳми бориз гузоштааст. Зиёда аз 300 тренингҳои омӯзишӣ, семинарҳои кушод, форумҳои васеи соҳибкорӣ бо иштироки соҳибкорони муваффақи ватанию хориҷӣ баргузор карда шуданд, ки ба ин машғулиятҳо теъдоди зиёди ҷавонон ва соҳибкорони ҷавон, ки тоза ба соҳибкорӣ рӯ овардаанд, фаро гирифта шуданд.

Дар дохили бинои Муассисаи давлатии «Ташаккул ва рушди соҳибкории Тоҷикистон» барои фаъолияти соҳибкорони ҷавону  навтаъсис Коворкинг, яъне ҷойҳои муваққатии корӣ барои стартаперони умедбахш ташкил карда шудаанд.


Он аз 30 ҷои корӣ иборат буда, дорои як қатор имкониятҳо мебошад. Дар ин ҷо соҳибкорони ҷавон имконият пайдо менамоянд, ки вориди фазои мусоиди тиҷоратӣ гарданд, аз машваратҳои мутахассисони касбӣ мунтазам истифода намуда, ба сармоягузорон дастрасӣ дошта бошанд. Шахсоне, ки нав  ба соҳибкорӣ рӯ овардаанд, дар ин ҷо муддати се моҳ лоиҳаи худро мукаммал менамоянд ва дар питч – ҷаласаҳо ё семинарҳое, ки ҳар се моҳ бо даъвати донорон ташкил карда мешаванд, лоиҳаи худро ҳимоя намоянд. Инчунин аз рушду пешрафти соҳибкорӣ маълумоти мукаммал ба даст оварда,  огоҳӣ пайдо мекунанд.

Маҷлисгоҳи Муассисаи давлатии «Ташаккул ва рушди соҳибкории Тоҷикистон» дорои 50 ҷои нишаст буда, дар  он дар як  ҳафта ду маротиба тренингҳо ва семинарҳо дар мавзӯъҳои гуногун тибқи барномаи омӯзишӣ гузаронида мешаванд.

«Мо соҳибкорони касбиро барои иштирок дар Стартап -толкс ҷалб менамоем, то аз таҷрибаҳои муваффақонаи худ ба соҳибкорони ҷавон маълумот диҳанд»,- мегӯяд директори Муассисаи  давлатии «Ташаккул ва рушди соҳибкории Тоҷикистон» Дилшод Ҷӯразода.

Мавсуф афзуд, ки аллакай дар ҳамкорӣ бо шарикон чандин чорабиниҳои омӯзишӣ бо иштироки соҳибкорони ҷавон гузаронида шуданд.

Дар бинои  муассиса «гӯшаи сабз» — ҷой барои истироҳати меҳмонон ва ташкили суҳбатҳои дуҷониба ташкил шудааст. Инчунин дар муассиса маркази машваратӣ бо мақсади сабук намудани кори соҳибкорон амал менамояд.

Соҳибкорон имкон доранд, ки дар маркази мазкур аз машваратҳои ҳуқуқӣ, андозбандӣ, муҳосибӣ, молиявӣ  ва дигар хизматрасониҳо истифода намоянд. Дар ин ҷо мушовирони касбӣ ҷалб карда мешаванд ва машваратҳо марбут ба масълаҳои ташкили корхона, андозбандӣ, гумрукӣ, масъалаҳои тафтиш аз ҷониби мақомоти давлатӣ, инчунин хизматрасониҳои давлатӣ гузаронида мешаванд.


Муассисаи давлатии «Ташаккул ва рушди соҳибкории Тоҷикистон»  барои ҷавононе, ки ба фаъолияти соҳибкорӣ шавқи зиёд доранд, идеяҳои соҳибкории худро амалӣ кардан мехоҳанд, вале аз куҷо ва чӣ тавр шурӯъ намуданро намедонанд, роҳи муваффақият аст. Зеро он дар баланд бардоштани малакаи соҳибкории ҷавонон, маърифати соҳибкорӣ, дастгирии методию машваратии соҳибкорони ҷавон нақши муассир мегузорад.

 

Марзия САИДЗОДА,
АМИТ «Ховар»

Сентябрь 15, 2020 16:40

Хабарҳои дигари ин бахш

Сармоягузорони Британияи Кабир аз МОИ «Кӯлоб» боздид намуданд
Муовини якуми Сарвазири Ҷумҳурии Тоҷикистон Давлаталӣ Саид дар ҷаласаи навбатии Шӯрои иқтисодии ИДМ иштирок намуд
Лоиҳаи «Нақшаи чорабиниҳои амалисозии Консепсияи идоракунии рушди маҳал барои давраи то соли 2030» таҳия мегардад
Бо муътадил шудани вазъияти эпидемикӣ ҳайати доираҳои соҳибкорию сармоягузории Франсия ба Душанбе меояд
Пахтакорони ноҳияи Ҳамадонӣ ҳар рӯз ба хирман 215-220 тонна «тиллои сафед» месупоранд
Тоҷикистон ба давлати воҳид ва транзитӣ табдил мегардад. Имрӯз-Рӯзи роҳсозони мамлакат
Сарвазири мамлакат Қоҳир Расулзода бинои нави маҷмааи озмоишгоҳҳои ташхиси маҳсулоти хӯроквориро ифтитоҳ намуд
Намояндагони Бонки Авруосиёии рушд, Фонди Авруосиёии стабилизатсионӣ ва рушд аз МОИ «Кӯлоб» боздид намуданд
Имрӯз аз санаи ба муомилот баровардани пули коғазии «3», «200» ва «500» сомонӣ 10 сол сипарӣ шуд
Дар Кӯлоб маъракаи ҷамъоварии пахта оғоз гардид
Дар Душанбе тавсеаи ҳамкорӣ дар соҳаи нақлиёт байни Тоҷикистон ва Япония матраҳ гардид
29 СОЛИ БОБАРАКАТ. Дар ин муддат беш аз 2000 км роҳҳои мошингард, 31 км нақб, беш аз 240 адад пул, 3,4 км галереяҳои зиддитармавӣ ва 214 км роҳҳои оҳан бунёд шуданд