Адабиётшиноси тоҷик Юсуф Акбарзода дар синни 82 аз олам даргузашт

Октябрь 16, 2020 09:27

ДУШАНБЕ, 16.10.20 /АМИТ «Ховар»/. 15 октябр адабиётшинос, тарҷумон, узви Иттифоқи нависандагони Тоҷикистон Юсуф Акбарзода дар синни 82 аз олам даргузашт.

Юсуф Акбарзода 1 майи соли 1938 дар деҳаи Мазори Шарифи Панҷакент ба дунё омадааст. Соли 1961 факултаи таъриху филологияи Донишкадаи давлатии омӯзгории Хуҷандро ба итмом расонда, ба ҳайси корманди Пажӯҳишгоҳи забон ва адабиёти ба номи Абӯабдуллоҳи Рӯдакии АИ ҷумҳурӣ фаъолияташро оғоз намудааст. Солҳои 1963—1964 дар сафи Қувваҳои мусаллаҳ  хидмат кардааст.

Сипас Юсуф Акбарзода фаъолияташро дар пажӯҳишгоҳи мазкур идома дода, инчунин ба ҳайси ходими калони илмӣ, ходими пешбари илмии Кумитаи истилоҳоти АИ ҷумҳурӣ, раиси Донишкадаи озоди Исмоили Сомонӣ, раиси Бунёди Оли Сомон, сармуҳаррири маҷаллаи  илмии Донишкадаи озоди Исмоили Сомонӣ «Варорӯд» фаъолият намудааст. Ӯ соли 1973 дар мавзӯи «Достони лирикӣ дар назми имрӯзаи тоҷик» рисолаи номзадӣ дифоъ кардааст.

Нахустин мақолаҳои илмияш, ки ба ҳалли масоили умдаи адабиёти муосири тоҷик бахшида шудаанд, соли 1959 дар рӯзномаи «Ҳақиқати Ленинобод» ба табъ расидаанд. То имрӯз беш аз 600 мақолаи илмӣ, илмии оммавӣ, публитсистӣ, тақризу китобиёти ӯ роҷеъ ба вазъи кунунии назму наср, адабиёти кӯдак, забони давлатӣ ва истилоҳот, ҳусни калом, забони воситаҳои таълим ва қонун, масъалаҳои одобу ахлоқи ҷомеа, эҳсоси ватандӯстӣ, ваҳдати миллӣ ва ғайра дар матбуоти даврӣ ва маҷмӯаҳои илмӣ ба табъ расидаанд. Аз ҷумла,  китобҳои «Сужет ва композитсияи асари бадеӣ» (1975), «Анъана ва навоварӣ» (1975; дар ҳамқаламии М.Шакурӣ), «Талаби ҳаёт ва қисмати адабиёт» (1977), «Қисмати инсон ва қисмати шеър» (1980),  «Шеъри эҳсос ва тафаккур» (1985), «Мактаби шоирии устод Лоҳутӣ» (1987),  «Меҳри Ватан» (1989) ва ғайраҳо.

Мавсуф дорандаи унвони Корманди шоистаи Тоҷикистон буд.

Октябрь 16, 2020 09:27

Хабарҳои дигари ин бахш

Оид ба тадбирҳои инноватсионӣ дар соҳаҳои молия, таҳсил ва иқтисод конференсияи байналмилалӣ доир шуд
Озмуни ҷумҳуриявии «Донандаи беҳтарини асарҳои Пешвои миллат» ҷамъбаст мегардад
Бозёфтҳои Осорхонаи таърихии асри санги Ховалинг 1 миллион сол умр доранд
ШАҲОМАТИ ДУШАНБЕ. Китоби «Рустами Эмомалӣ-дастпарвари Мактаби давлатдории Пешвои миллат» ин мавзуъро фаро гирифтааст
Дар ноҳияи Айнӣ бахшида ба 80-солагии муаллифи Суруди миллии Ҷумҳурии Тоҷикистон конференсияи ҷумҳуриявӣ доир мешавад
СОҲИБҚИРОНИ ШОИРӢ УСТОД РӮДАКИСТ. Бахшида ба Рӯзи Рӯдакӣ ҳамоиши адабӣ доир шуд
Ба ифтихори 700-солагии Ҳофизи Шерозӣ дар Осорхонаи миллӣ намоиши ҷашнӣ ифтитоҳ ёфт
Оид ба арзёбии таъсири маҳфузгоҳҳои партовҳои уранӣ ба муҳити зист конфронс доир шуд
Намояндагони Китобхонаи миллии Тоҷикистон дар конфронси байналмилалии онлайнӣ иштирок намуданд
Ҳайати Шурои байнидавлатии ҳолатҳои фавқулода бо Маҷмааи «Кохи Наврӯз» ва Осорхонаи миллии Тоҷикистон шинос шуд
Бахшида ба 80-солагии Шоири халқии Тоҷикистон Гулназар Келдӣ маҳфили адабӣ баргузор гардид
Байни АМИТ «Ховар» ва Донишгоҳи миллии Тоҷикистон шартномаи ҳамкорӣ ба имзо расид