Дар Хоруғ даври дуюми Озмуни ҷумҳуриявии «Тоҷикистон — Ватани азизи ман» оғоз шуд

Октябрь 6, 2020 11:33

ДУШАНБЕ, 06.10.2020  /АМИТ «Ховар»/.   Тавре қаблан иттилоъ дода будем, 29 сентябр дар Вазорати фарҳанги Ҷумҳурии Тоҷикистон бо иштироки Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода ҷаласа доир гардид, ки дар он нақшаи баргузории даври дуюми Озмуни ҷумҳуриявии «Тоҷикистон — Ватани азизи ман» дар маркази ВМКБ, вилояти Хатлон, Суғд, шаҳри Душанбе ва ноҳияҳои тобеи ҷумҳурӣ эълон шуд. Тибқи нақшаи мазкур, даври дуюми озмун аз 5 то 10 октябр дар шаҳри Хоруғи Вилояти Мухтори Кӯҳистони Бадахшон баргузор мегардад.

Сардори шуъбаи фарҳанги ВМКБ  Сайёд Курбонмамадов ба хабарнигори АМИТ «Ховар» иброз дошт, ки аз 5 октябр дар шаҳри Хоруғ даври дуюми Озмуни ҷумҳуриявии «Тоҷикистон — Ватани азизи ман» оғоз гардид ва дар он 93 нафар ғолибони даври аввали озмун иштирок доранд.

Мавсуф зикр намуд, ки ҳайати ҳакамон аз 6 нафар- композитор, узви Иттифоқи композиторони Тоҷикистон Пайрав Мародайсейнов, директори Мактаб-интернати миёнаи махсуси санъати ҷумҳуриявии ба номи Миратулло Атоев Қиёмиддин Иброҳимов, ҳунарманди анъанавӣ Раҳматулло Ҳошимов, роҳбари бадеии ансанбли давлатии «Фалак», овозхони анъанавӣ Носир Сафаров ва дигарон иборат мебошад.

Ба гуфти ҳамсуҳбати мо, дар даври дуюми озмун талабот нисбат ба даври аввал ҷиддитар мебошад. Аз ин рӯ иштирокдорон бояд бо маҳорати баланд ва истеъдоди нотакрор худро муаррифӣ намоянд. Зеро озмун бо мақсади дарёфти истеъдодҳои нави соҳаи санъат, рушди минбаъдаи малакаву маҳорати касбии онҳо, баланд бардоштани мақому маҳорати касбӣ, тақвият бахшидан ба касбияти баланди ҳунари иҷрокунандагӣ ва эҷоди асарҳои нави мусиқӣ, дарёфти беҳтарин намунаҳои оҳанг ва сурудҳои тараннумгари дастовардҳои замони Истиқлоли давлатӣ, саҳми Президенти Ҷумҳурии Тоҷикистон дар бунёди давлатдории навини тоҷикон ва тарғибу ташвиқи анъанаҳои арзишманди миллию мероси пурғановати ниёгон баргузор мегардад.

Бояд тазаккур дод, ки мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои  Суғд, Хатлон, шаҳри Душанбе, шаҳру ноҳияҳои тобеи ҷумҳурӣ даврҳои якум ва дуюми озмунро дар сатҳи баланд дар мувофиқа бо Вазорати фарҳанги ҷумҳурӣ ташкил ва баргузор карда, ғолибонро бо мукофоти пулӣ ва ифтихорномаву сипосномаҳо қадр менамоянд.

Ёдовар мешавем, ки фарқи озмуни имсола аз соли гузашта он аст, ки дар озмуни имсола омӯзгорон ва устодоне, ки шогирдонашон ғолиб мегарданд, аз ҷониби мақомоти иҷроияи ҳокимияти давлатии вилоятҳо ва шаҳру ноҳияҳо ҳавасманд карда мешаванд.

Октябрь 6, 2020 11:33

Хабарҳои дигари ин бахш

Дар Осорхонаи миллӣ намоиши офаридаҳои наққош ва муҷассамасози маъруф Амонуллоҳ Ҳайдарзод ифтитоҳ ёфт
Академияи миллии илмҳои Тоҷикистон аккредитатсияи байналмилалии муассисавиро гузашт
ДАР ҲАР ЯК ОҲАНГ МУҲАББАТИ БЕАНДОЗАИ ТОҶИКОН БА ВАТАН ЭҲСОС МЕШУД. Бардошт аз баргузории Рӯзҳои фарҳанги Тоҷикистон дар Русия
«ТОҶИ СОМОН». Дар Душанбе дуюмин синамоҷашнвораи байналмилалӣ баргузор мегардад
Инна Блюшенко аз Швейтсария: «Мақсад дорам забони ширину шевои тоҷикиро омӯзам»
Президенти Академияи миллии илмҳои Тоҷикистон дар Конференсияи байналмилалии «Илм барои бехатарии ҷаҳон» иштирок намуд
35-СОЛАГИИ ИСТИҚЛОЛИЯТИ ДАВЛАТӢ. Дар Чойхонаи миллӣ барои дар як шабонарӯз қабули 5000 мизоҷ шароит фароҳам оварда мешавад
Ба пешвози 700-солагии Ҳофизи Шерозӣ дар Тоҷикистон барномаҳои фарҳангию маърифатӣ доир мешаванд
ШАҲРИСТОНИ ҲУЛБУК. Бозёфтҳои аз ин ёдгорӣ пайдогардида намунаи санъати олии ҳунармандӣ буда, нотакрор мебошанд
«КОРВОНИ КИТОБ». Ба китобхонаҳои шаҳру ноҳияҳои Бадахшон беш аз 6 ҳазор нусха китоб дастрас мегардад
АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд
Дар Душанбе мубодилаи барномаҳои фарҳангӣ ва намоиши филмҳо байни Тоҷикистон ва Чин баргузор гардид