Хоруғ: Нисбат ба 30 нафар соҳибкорон барои риоя накардани талаботи бехатарӣ аз сӯхтор санади маъмурӣ тартиб дода шуд
ХОРУҒ, 23.10.2020 /АМИТ «Ховар»/. Кормандони қисми 16-уми Хадамоти давлатии оташнишонӣ дар шаҳри Хоруғи Вилояти Мухтори Кӯҳистони Бадахшон бо мақсади ошкор ва ислоҳ кардани баъзе мушкилиҳои вобаста ба бехатарӣ аз сӯхтор дар бозори марказӣ машқи тактикӣ доир намуданд.
Мошинҳои махсуси хадамоти мазкур ба маҳали машқи тактикӣ, воқеъ дар бозори марказӣ сари вақт расиданд. Ронандагон роҳро барои мошинҳои махсус холӣ карда, ба ҳаракати онҳо халал ворид намекарданд.
Нозирони Бозрасии давлатии автомобилии Раёсати Вазорати корҳои дохилии вилоят ҳар монеаро аз пеши мошинҳои махсуси оташнишонӣ бартараф мекарданд, то онҳо ҳарчӣ зудтар ба маҳали ҳодиса расанд. Аммо мошинҳо дар бозори марказӣ дар ҳар қадам ба мушкилӣ мувоҷеҳ мешуданд. Роҳро то бозори марказӣ, ки каме бештар аз 3 километр аст, давоми панҷ дақиқа тай карданд, вале то ҷои «сӯхтор» дар бозори марказӣ, ки камтар аз 30 метр буд, баъди 48 дақиқа расиданд. Зеро соҳибкорон тамоми даромадгоҳу баромадгоҳро бо дӯконҳои худсохт банд карда буданд ва ба кормандони хадамоти оташнишонӣ зарур омад, ки вақти бештарашонро барои аз сари роҳ бардоштани молу колои соҳибкорон сарф кунанд. Соҳибкорон эрод мегирифтанд, ки чаро моро сари вақт огоҳ накардед, дар ҳоле ки сӯхтор метавонад ҳар лаҳза ва бе огоҳӣ рух диҳад.
Ба гуфтаи сардори қисми 16-уми Хадамоти давлатии оташнишонӣ дар шаҳри Хоруғ Убайди Гулаёз, “мо ҳамарӯза соҳибкорони ин бозорро ҳушдор медодем, ки роҳи мошингузарро банд накунанд, зеро ин бар зарари худи онҳост. Дар панҷ соли охир дар ин бозор се сӯхтор ба амал омад, ки дар натиҷаи он даҳҳо нафар аз соҳибкорон хисороти зиёди молӣ диданд. Бисёр соҳибкорон пас аз ин сӯхтор муфлис шуданд. Аммо дида мешавад, ки тоҷирон аз ин ҳодисаҳо хулосаи зарурӣ набаровардаанд”.
Сардори қисми 16-уми Хадамоти давлатии оташнишонӣ дар шаҳри Хоруғ гуфт, ки дар ин рӯз нисбат ба 30 нафар соҳибкорон барои риоя накардани талаботи бехатарӣ аз сӯхтор санади маъмурӣ тартиб дода, 20 фурӯшгоҳро барои мутобиқ набудани ноқилҳои барқӣ ба меъёри тасдиқшуда аз манбаи асосии неруи барқ ҷудо намуданд. Зеро бо фаро расидани фасли сармо истифода аз бухориҳои барқӣ шурӯъ мешавад ва агар вазъи ноқилҳои барқӣ чунин бошад, пас сар задани сӯхтор аз эҳтимол дур нест.
Ҷаласаи корӣ бо иштироки роҳбарони мақомоти марказии иҷроияи ҳокимияти давлатии Ҷумҳурии Тоҷикистон доир гардид
ПЕШГИРИИ СӮХТОР. Қоидаҳо бар зидди сӯхторро қатъиян бояд риоя намуд
Милитсияи пойтахт аз шаҳрвандон талаб намуд, ки аз фурӯшу паҳнсозӣ ва истифодаи маводи тарфгарӣ худдорӣ кунанд
Ба муносибати таъсиси Воҳидҳои таъйиноти махсуси милитсия дар вилоятҳои Суғд, Хатлон ва Бадахшон ҷамъомади тантанавӣ доир шуд
РӮЗИ ТАЪСИСИ ВОҲИДҲОИ ТАЪЙИНОТИ МАХСУСИ МИЛИТСИЯ. Кормандони ин ниҳод вазифаҳои душвору масъулиятнок бар зимма доранд
Дар Минск вохӯрии вазирони корҳои дохилии Тоҷикистон ва Беларус баргузор гардид
Изҳороти Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон
«МУҚОВИМАТ БО КОРРУПСИЯ ДАР СОҲАИ ТИҶОРАТ». Дар Душанбе таҳти ин унвон форуми байналмилалӣ баргузор мешавад
Дар Душанбе оид ба усулҳои нави ҷамъоварии маълумот дар самти муқовимат ба савдои одамон ҷаласа доир шуд
Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро гардид
Ҳайати Тоҷикистон дар конференсияи 26-уми байналмилалии раисони судҳои олии кишварҳои ҷаҳон иштирок намуд
ҚОИДАҲОИ БЕХАТАРӢ АЗ СӮХТОРРО РИОЯ НАМОЕД! Дар Тоҷикистон беш аз 900 ҳодисаи сӯхтор ба қайд гирифта шудааст
