АЗ ПАЙРАҲАИ МАКТАБӢ – ТО ШОҲРОҲИ СИЁСӢ. Дар арафаи Рӯзи Президент хабарнигорони АМИТ «Ховар» аз Осорхонаи мактабии Пешвои миллат дар ноҳияи Данғара дидан намуданд

ДУШАНБЕ, 16.11.2020. /АМИТ «Ховар»/.   Дар арафаи Рӯзи Президенти Ҷумҳурии Тоҷикистон хабарнигорони АМИТ «Ховар» Фирӯзаи ДАВЛАТ ва Мақсудҷон МУҲИДДИНҶОНОВ аз Осорхонаи мактабии Пешвои миллат муҳтарам Эмомалӣ Раҳмон дар ноҳияи Данғара дидан намуданд.  

-Осорхонаҳо чун муассисаҳои маърифативу равшангароӣ дар ҳифзу нигаҳдошт, бозшиносиву муаррифии ашёи гаронбаҳои  таърихию фарҳангии  халқ саҳми босазо мегузоранд. Осорхонаи мактабии Асосгузори сулҳу ваҳдати миллӣ — Пешвои миллат,  Президенти  мамлакат муҳтарам  Эмомалӣ  Раҳмон  соли 2007 бо ташаббуси Вазорати маориф ва илми Ҷумҳурии Тоҷикистон дар муассисаи таҳсилоти миёнаи умуии №7-и ноҳияи Данғара ва синфхонае, ки дар он Президенти мамлакат солҳои 60-ум таҳсил намудаанд, бунёд гардидааст. Чаҳор сол пеш ин осорхона  маҳз дар ҳамин рӯз – дар нахустин таҷлил аз  Рӯзи Президент расман ифтитоҳ ёфта буд.

Осорхона  аз даромадгоҳ, толори калон ва синфхона иборат мебошад, ки дар онҳо беш аз 50 адад нигораҳои гуногун ба намоиш гузошта шудаанд, дар бораи ҳаёти шахсӣ ва оммавии Сарвари давлат нақл мекунанд.  Дар даромадгоҳи осорхона бо аксу мусаввараҳо аз ҷараёни  сафари Пешвои миллат аз  гӯшаву канори гуногуни мамлакат  вохӯрдан мумкин аст.

Дар толори калони  осорхона  тамоми  фаъолияту зиндагиномаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз давраи мактабӣ то ба зинаҳои  олии роҳбарӣ  ҷамъоварӣ ва ба намоиш гузошта шудаанд.

Дар синфхонаи Осорхона шаш адад мизу курсие ба чаши мехуранд, ки  Эмомалӣ Раҳмон бо ҳамсабақонашон тӯли даҳ сол дар паси онҳо нишаста, таълим гирифтаанд. Ҳамчунин дар деворҳо аксҳои ҳамсабақон ва омӯзгорон  овезонанд.

Ҳамчунин дар баробари ҳамаи ашё дафтару қалам, дастхатҳои давраи мактабӣ ва китобҳои дарсие, ки Эмомалӣ Раҳмон дар вақташ аз онҳо  истифода намудаанд,  ҷойгузин гардидаанд.

Тавре медонем, Пешвои миллат фаъолияти меҳнатиро баъди хатми мактаби таҳсилоти умумӣ дар Данғара ва омӯзишгоҳи касбию техникиии  (ҳоло литсей) №40-и шаҳри Калинонобод (ҳоло Сарбанд)  дар заводи равғани шаҳри Қурғонтеппа (ҳоло Бохтар) ба ҳайси  танзимгар шуруъ намудаанд.

Дар як қисми Осорхона аксу мусаввараҳои Эмомалӣ Раҳмон аз солҳои 1971—1974  ҳангоми адои  хизмати ҳарбӣ дар Флоти уқёнуси Ором, инчунин сарулибоси давраи аскарии Пешвои миллат гузошта шудаанд.

Пас аз хизмати ҳарбӣ муҳтарам Эмомалӣ Раҳмон ба совхози ба номи Ленини Данғара баргашта, солҳои 1976 – 1987 ба сифати котиби раёсат ва раиси иттифоқи ксабаи ин хоҷагӣ кор кардаанд.  Соли 1982 факултети иқтисодии Донишгоҳи давлатии Тоҷикистон (ҳоло ДМТ)-ро хатм намудаанд.  Солҳои 1987-1992 сарварии яке аз хоҷагиҳои пешқадами ҷумҳурӣ — совхози ба номи Лекнини Данғараро бар уҳда доштанд.

Дар осорхонаи Қасри фарҳанги ноҳияи Данғара гӯшае доир ба фаъолияти Пешвои миллат дар  солҳои 1976-1987 дар вазифаҳои котиби раёсат, раиси Кумитаи иттифоқҳои касабаи совхози ба номи Ленини ноҳияи Данғара    ташкил гардидааст.

Дар гӯшаи мазкур мизу курсӣ, ҳуҷҷату муҳр ва тамоми ашёе, ки дар утоқи кории онвақтаинаи Эмомалӣ Раҳмон ҷой доштаанд, ҷамъоварӣ  гардидаанд.

Дар синфхонаи Осорхона шаш адад мизу курсие ба чаши мехуранд, ки  Эмомалӣ Раҳмон бо ҳамсабақонашон тӯли даҳ сол дар паси онҳо нишаста, таълим гирифтаанд. Ҳамчунин дар деворҳо аксҳои ҳамсабақон ва омӯзгорон  овезонанд.

Яке аз бахшҳои осорхона аз  китобҳои Пешвои миллат  фароҳам омадаанд, ки ҳар яки он бозгӯи ормонҳо ва  ҳувияти миллиии тоҷиконанд.