ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. «Карон-калсит» — и Дарвоз корро дар се баст ба роҳ монда, ҳаҷми маҳсулотро ба 100 ҳазор тонна мерасонад

Январь 7, 2021 15:34

ХОРУҒ, 07.01.2021 /АМИТ «Ховар»/. Аз таъсиси корхонаи истеҳсолии «Карон- калсит» дар ноҳияи Дарвоз ҳамагӣ се моҳ мегузарад, аммо аз рӯзҳои аввали фаъолият собит намуд, ки ояндаи наздик метавонад  дар радифи корхонаҳои пешқадам ва муваффақ ҷой бигирад. Корхона тасмим гирифтааст, ки аз аввали моҳи феврал корро дар се баст ба роҳ андохта,  ҳаҷми маҳсулотро ба 100 ҳазор тонна дар як сол  ва шумораи коргаронро то ба 120 нафар расонад. Яке аз дигар ҳадафҳои муҳими ин корхона- ин ба роҳ андохтани содироти маҳсулот ба кишварҳои минтақа ва ҷаҳон мебошад.   Зеро мавзеи Вишхарви ин ноҳия аз ҷиҳати захираи санги мармар, ки аз он хока истеҳсол мекунанд, хеле бой аст ва ин имкон фароҳам меорад, ки корхонаи «Карон-калсит» ҳам талаботи муштариёни дохилӣ ва ҳам беруниро қонеъ созад.

Маҳсулоти асосии корхона калсит ва микрокалсит аст, ки  ҳоло  талабот ба ин масолеҳи сохтмонӣ чӣ дар  дохили мамлакат ва чӣ берун аз он зиёд аст.

Муовини аввали директори Ҷамъияти масъулияташ маҳдуди «Карон-калсит» Шуҳрат Расулов гуфт, ки “маҳсулоти корхонаи моро  дар соҳаҳои гуногуни саноату сохтмон ҳам бевосита ва ҳам бо илова кардани он ба маҳсулоти дигари сохтмонӣ истифода мебаранд. Дар минтақаҳои сард бинокорон ин маҳсулотро ба бетон илова мекунанд, то зуд хушку  қавӣ гардад ва солҳои зиёд сифаташро гум накунад. Баръакси ҳол 40 фоизи об дар таркиби бетон боқӣ мемонад ва ба коҳиши муҳлати истифодаи он оварда мерасонад”.

Дар айни ҳол корхона дар ду баст кор мекунад ва дар як шабонарӯз зиёда аз 15 тонна маҳсулот истеҳсол шуда, мутобиқи шартнома ба ширкатҳои сохтмонии шаҳрҳои Душанбе ва Хуҷанд  фиристода мешавад.

Ҳамчунин бо истифода аз микрокалсит дару тиреза, қубурҳои қутрашон гуногун, рангу бор ва ороиши хона, чархҳои воситаҳои гуногуни нақлиёт низ истеҳсол мекунанд. Дар соҳаи тиб низ аз ин маҳсулот фаровон истифода мебаранд

Бояд зикр кард, ки моҳи августи соли гузашта Пешвои миллат муҳтарам Эмомалӣ Раҳмон зимни ифтитоҳи корхонаи «Карон-калсит» ба масъулини он дастур доданд, ки давоми як соли оянда боз ду коргоҳи истеҳсолию саноатӣ бо фарогирии 200 ҷои корӣ сохта, мавриди баҳрабардорӣ қарор диҳанд.

Январь 7, 2021 15:34

Хабарҳои дигари ин бахш

НАЗАРИ КОРШИНОС. Рушди минбаъдаи иқтисодиёти Тоҷикистон бояд ба рушди фаъолияти соҳибкорию бахши хусусӣ нигаронида шавад
Дар Душанбе ба маблағи зиёда аз 47 миллион доллар созишномаҳои грантӣ ба имзо расиданд
Байни Кумитаи бехатарии озуқавории Тоҷикистон ва Кумитаи назорат ва бозрасии ветеринарии Вазорати кишоварзии Қазоқистон Ёддошти тафоҳум ба имзо расид
Дар ноҳияи Зафаробод Боғи Парчами давлатӣ ба истифода дода шуд
ИМЗОИ ЁДДОШТИ ТАФОҲУМ. Тоҷикистон ва Қазоқистон ҳамкориро дар соҳаи нафту газ тақвият мебахшанд
Таҷрибаи Қазоқистон дар самти иқтисоди рақамӣ, ҳукумати электронӣ ва ҳисоббаробаркунии ғайринақдӣ мавриди истифодаи Тоҷикистон қарор мегирад
Дар ноҳияи Зафаробод коргоҳи истеҳсоли мумфарш ба фаъолият оғоз намуд
Байни Тоҷикистон ва Қазоқистон Ёддошти тафоҳум оид ба ҳамкорӣ дар соҳаи стандартизатсия, метрология ва баҳодиҳии мутобиқат ба имзо расид
Шарикони рушд дар барқарорсозии роҳу пулҳои аз офатҳои табиӣ зарардида кумак менамоянд
Агентии «Тоҷикстандарт» ба соҳибкорон моҳияти татбиқи стандартҳои байналмилалиро меомӯзонад
ТОҶИКИСТОН ВА ҚАЗОҚИСТОН. Гардиши тиҷорати хориҷӣ байни ду давлат соли гузашта 1,2 миллиард доллари ИМА-ро ташкил дод
Дар Душанбе дурнамои ҳамкорӣ бо Хазинаи кувайтии рушди иқтисодии араб баррасӣ гардид