Беҳтарин китобхонҳои Раёсати мубориза бар зидди ҷиноятҳои муташаккил ҳавасманд гардонида шуданд

ДУШАНБЕ, 11.01.2021 /АМИТ «Ховар»/. Раёсати мубориза бар зидди ҷиноятҳои муташаккили Вазорати корҳои дохилии Ҷумҳурии Тоҷикистон байни кормандон озмуни «Беҳтарин китобхони соли 2020» эълон карда, аз рӯи натиҷаҳои баргузории он аз байни кормандон-довталабони  озмун 9 нафар корманди Раёсатро, ки ҳар кадоме воқеан зиёда аз панҷ китоби бадеии адабиёти классикӣ ва муосири форсу тоҷик, инчунин хориҷиро бо забонҳои тоҷикиву русӣ мутолиа ва мазмуну моҳияти онҳоро хуб дарк сохтаанд, ҳамчун беҳтаринҳо интихоб ва қадрдонӣ намуд. Дар ин бора аз Вазорати корҳои дохилӣ ба АМИТ «Ховар» хабар доданд.

Раёсати мубориза бар зидди ҷиноятҳои муташккили Вазорати корҳои дохилии Ҷумҳурии Тоҷикистон бо супориши бевоситаи роҳбарони Вазорати корҳои дохилӣ миёни кормандони марказҳо, шуъбаҳои дастгоҳи марказӣ ва минтақавӣ, инчунин Дастаи махсуси зудамали Раёсат зери унвони «Беҳтарин китобхони соли 2020» озмун баргузор  карда буд.

Озмуни мазкур дар доираи баргузории Озмуни ҷумҳуриявии «Фурӯғи субҳи доноӣ китоб аст» ташкил гардид.

Яке аз самтҳои асосии сиёсати пешгирифтаи Ҳукумати Ҷумҳурии Тоҷикистонро баланд бардоштани фарҳангу маънавиёти аҳолӣ ташкил медиҳад. Бо ин мақсад, тӯли ду сол мешавад, ки зери сарпарастии бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Озмуни ҷумҳуриявии «Фурӯғи субҳи доноӣ китоб аст» баргузор шуда истодааст. Мақсад аз гузаронидани озмуни мазкур- ин баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ, тақвияти ҷаҳони маънавӣ миёни аҳолии мамлакат, аз ҷумла намояндагони касбу кори гуногун ва табақаҳои аҳолии ҷумҳурӣ мебошад.