Абдуҷаббор Юсуфзода: Шумораи оҳуи холдор дар фермаи оҳупарварии «Қаратоғ» 302 сарро ташкил медиҳад

ДУШАНБЕ, 11.02.2021 /АМИТ «Ховар»/. Имрӯз зимни нишасти матбуотӣ директори Агентии хоҷагии ҷангали назди Ҳукумати  Ҷумҳурии Тоҷикистон Абдуҷаббор Юсуфзода ба хабарнигорон иттилоъ дод, ки  ҳоло шумораи оҳуи холдор  дар фермаи оҳупарварии «Қаратоғ» 302 сарро ташкил медиҳад.

Ба зикри мавсуф, бо дастгирии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон моҳи декабри соли 2020  барои зиёд намудани саршумори оҳу дар майдони 1154  гектар замин илова шуда, дар оянда нақша ҳаст, ки саршумори оҳуи холдор боз ҳам зиёд карда шавад.

Сардори Раёсати Агентии хоҷагии ҷангали назди Ҳукумати Ҷумҳурии Тоҷикистон Давлаталӣ Шарипов  иброз дошт, ки соли 1973 дар назди Муассисаи давлатии хоҷагии ҷангали «Қаратоғ»-и шаҳри Турсунзода фермаи оҳупарварӣ  таъсис ёфта, 302 сар оҳуи холдор дар он ҷо парвариш меёбанд.

«Оҳуи холдорро ба Тоҷикистон солҳои 70-ум  аз Федератсияи Россия бо мақсади истеҳсоли доруи пантокрин ворид намуда,  парвариши онро ба роҳ монда буданд»,-гуфт Давлаталӣ Шарипов.