Блогнависонро дар Тоҷикистон вазифадор карданд, ки то 1 апрел дар мақомоти андоз сабти ном шаванд

Февраль 25, 2021 11:46

ДУШАНБЕ, 25.02.2021 /АМИТ «Ховар»/. Кумитаи андози назди Ҳукумати Ҷумҳурии Тоҷикистон блогерҳои маҳаллиро вазифадор кард, ки аз даромадҳои худ дар шабакаҳои иҷтимоӣ ва YouTube андоз супоранд. Дар ин бора сардори Сарраёсати Кумитаи андози кишвар Шамсулло Кабирзода 18 феврал зимни нишасти матбуотӣ дар Душанбе изҳор дошт.

«Ҳоло блогерҳои Тоҷикистон 29 саҳифа ва шабака кушодаанд ва аз 3 то 19 миллион муштарӣ доранд», — зикр кард ӯ. — Ба онҳо зарур аст, ки то 1 апрел сабти ном шаванд ва аз даромадҳои худ андоз супоранд, вагарна метавонанд бо мушкилоти қонунӣ рӯбарӯ шаванд».

Ба гуфтаи Кабирзода, кормандони Кумитаи андоз фаъолияти блогерҳоро омӯхтанд ва шомил намудани онҳоро ба рӯйхати андозсупорандагон зарур донистанд. «Ин на танҳо ба блогерҳо, балки ба шахсони дигари физикӣ низ дахл дорад. Агар хато накунам, то ҳол чаҳор блогер дар мақомоти андоз ҳамчун соҳибкор сабти ном шудааст», — афзуд ӯ.

Кабирзода миқдори дақиқи андозбандиро барои блогерҳо номбар накард, аммо ӯ итминон дод, ки давлат ба гирифтани ҳиссаи худ аз ҳисоби даромади шаҳрвандон аз фаъолияти онлайн ҳуқуқи комил дорад. «Вақте ки сухан дар бораи андозбандии блогерҳо меравад, ҳеҷ гуна нофаҳмие набояд вуҷуд дошта бошад», — гуфт номбурда.

Кабирзода инчунин гуфт, ки баъзе блогерҳо барои суҳбат ба Кумитаи андоз даъват шуда буданд. «Онҳо аз ҳисоби  таблиғи молҳо ва маҳсулоти ширкатҳои бузург дар саҳифаҳо ва каналҳои худ пул мегиранд ва барои ин бояд андоз супоранд», — гуфт сардори сарраёсати Кумитаи андози Тоҷикистон.

Ба рӯйхати шахсоне, ки мақомоти андоз тартиб додаанд, ки бояд то 1 апрел сабти ном шаванд ва аз даромади худ дар шабакаҳои иҷтимоӣ ва YouTube андоз супоранд, аз ҷумла блогнависони маъруфи тоҷик Беҳрӯз Зеваров, Рафаэл Гулов, Орзу Исоев, Диловар Сафаров ва овозхонон Шабнами Сурайё, Фарзонаи Хуршед, Нигина Амонқулова ва Зулайхо Маҳмадшоева шомил шудаанд.

Кумитаи андоз маълум кардааст, ки маъруфтарин канали YouTube канали Tamoshow -и Беҳрӯз Зеваров мебошад, ки 867 ҳазор муштарӣ ва 430 миллион тамошобин дорад. Дар ҷои дуюм дар маъруфият шабакаи Territory Humor бо 67 ҳазор муштарӣ ва 9,5 миллион тамошобин ҷойгир аст. Клипҳои видеоии лоиҳаи «Дугонаҳо» -ро 19 миллион корбарон тамошо кардаанд. Шабакаҳои «Имшаб Live» ва «ORZU» -и Орзу Исоев, канали Рафаэл Гулов, канали “Нигматов Мансур”, лоиҳаи “Бонуи Пурҳунар” ва “IRON KING” низ дар байни корбарон хеле маъмуланд.

ДАР АКС: маъруфтарин блоги хусусии Тоҷикистон дар YouTube канали «Tamoshow» -и Беҳрӯз Зеваров мебошад. Акс аз бойгонӣ

 

Февраль 25, 2021 11:46

Хабарҳои дигари ин бахш

Масъалаи ифтитоҳи парвозҳои нав байни шаҳрҳои Тоҷикистон ва Туркия баррасӣ шуд
Табодули молу маҳсулот байни Тоҷикистон ва Қирғизистон дар шаш моҳ 6 миллион долларро ташкил дод
ПАНҶСОЛАИ РУШДИ САНОАТ. Дар корхонаҳои нави саноатии Тоҷикистон дар ҳаҷми беш аз 95,3 миллион сомонӣ маҳсулот истеҳсол карда шудааст
Дар шаҳри Хоруғ ҷаласаи Шурои ҷамъиятӣ баргузор гардид
«Роҳи оҳани Тоҷикистон» ва «Nafith Logistics» ҳамкориро дар самти рақамикунонӣ тақвият медиҳанд
Тоҷикистон ба маблағи 28,3 миллион доллар маҳсулоти асосии саноати хӯрокворӣ содирот намудааст
Доир ба тадбирҳои иловагии вусъат додани ҳисоббаробаркунии ғайринақдӣ машварати корӣ баргузор гардид
Дар нимсолаи якуми соли 2025 гардиши савдои хориҷии Тоҷикистон зиёда аз 4,7 миллиард долларро ташкил дод
НИШАСТИ МАТБУОТӢ. Палатаи ҳисоб дар беш аз 14 ҳазор ҳолат вайронкунии қоидаҳои молиявиро ба маблағи 628,2 миллион сомонӣ муайян намуд
НИШАСТИ МАТБУОТӢ. Ба иқтисодиёти Тоҷикистон беш аз 3,3 миллиард доллар сармояи хориҷӣ ворид гардидааст
НИШАСТИ МАТБУОТӢ. Дар шашмоҳаи якуми соли 2025 бо иштироки Сарвари давлат 16 корхонаи нави саноатӣ ба истифода дода шуд
НИШАСТИ МАТБУОТӢ. Агентии омор дар ҳамкорӣ бо шарикони рушд дар Тоҷикистон таҳқиқоти қувваҳои корӣ гузаронид