ХАБАРИ УМЕДБАХШ! СУТ иттилоъ медиҳад, ки суръати тавсеаи COVID-19 дар саросари ҷаҳон суст шудааст

ДУШАНБЕ, 08.02.2021 /АМИТ «Ховар»/. Нишондиҳандаҳои тавсеаи коронавирус дар саросари ҷаҳон коҳиш меёбанд. Тибқи иттилои АМИТ «Ховар», дар ин хусус 5 феврал коршиноси Созмони умумиҷаҳонии тандурустӣ (СУТ) Мария ван Керкховен зимни брифинг изҳор намудааст (ДАР АКС).

«Ин аз ҳисоби як қатор омилҳо ва пеш аз ҳама, аз баракати тадбирҳои андешидаи кишварҳо ҷиҳати қатъ кардани занҷири интиқоли вирус ва пешгирии сирояти одамони дигар сурат мегирад», — гуфт ӯ.

Керкховен инчунин аз кишварҳое, ки дар онҳо шумораи гирифторони нави коронавирус кам мешаванд, даъват кард, ки ба ҳар ҳол дастгирии усулҳои санитарии пешгирии тавсеаи COVID-19 -ро идома диҳанд.

Пештар, 1 феврал Директори генералии СУТ Тедрос Аданом Гебреисус гуфта буд, ки се ҳафта боз шумораи гирифторони COVID-19 дар ҷаҳон, ки дар мавриди онҳо гузоришҳо ворид мешаванд, коҳиш меёбад. «Ин хабари умедворкунанда аст ва нишон медиҳад, ки вирусро ҳатто бо мавҷудияти навъҳои нави он, ки ҳоло дар гардишанд, назорат кардан мумкин аст», — афзуда буд вай. Ба гуфтаи роҳбари СУТ, “ин аз он шаҳодат медиҳад, ки идомаи андешидани тадбирҳои зиддивирусӣ тавсеаи уфунатро пешгирӣ мекунад”.

 АКСИ: Twitter