Имрӯз дар Варзишгоҳи марказии шаҳри Душанбе бозиҳои нимниҳоии Ҷоми ФФТ-2021 оғоз мешаванд

ДУШАНБЕ, 17.02.2021 /АМИТ  «Ховар»/.  Имрӯз, 17 феврал  дар Варзишгоҳи марказии шаҳри Душанбе бозиҳои  ½-финалии Ҷоми ФФТ-2021 байни дастаҳои футболи  «Истиқлол»-и шаҳри Душанбе  бо «Регар-ТадАЗ»-и шаҳри  Турсунзода  ва  «Равшан»-и  шаҳри Кӯлоб бо «Хатлон»-и шаҳри Бохтар баргузор мегарданд. Дар ин бора шореҳи варзиши АМИТ «Ховар» Меҳрони  Қурбон бо истинод ба Федератсияи футболи Тоҷикистон иттилоъ медиҳад.

Бозии сеюми марҳилаи финалии Ҷоми ФФТ-2021 байни дастаҳои футболи  «Истиқлол»-и шаҳри Душанбе  ва «Равшан»-и  шаҳри Кӯлоб   15 феврал  дар Варзишгоҳи марказии шаҳри Душанбе сурат гирифта, бо натиҷаи калони 4:0 ба фоидаи дастаи футболи «Истиқлол»-и шаҳри Душанбе  хотима ёфт. Новобаста аз натиҷаи ин рақобат дастаҳо қабл аз муҳлат роҳхати даври нимниҳоиро ба даст оварда буданд.

Ҳамчунин  дар бозии дигар дастаи футболи  «Регар-ТадАЗ»-и шаҳри  Турсунзода бар дастаи «Барқчӣ»-и шаҳри  Ҳисор ғалаба карда, роҳхати охиринро ба даври нимфинали Ҷоми Федератсияи футболи Тоҷикистон-2021 ба даст овард. Бозии дастаҳо   дар доираи даври ҷамъбастии марҳилаи гурӯҳӣ доир гардида, бо ҳисоби 2:1 ба фоидаи футболбозони шаҳри  Турсунзода анҷом ёфт.

Ҷоми ФФТ-2021

Марҳилаи финалӣ

Гурӯҳи «А». Бозии 3-юм

«Равшан» – «Истиқлол» — 0:4

Голҳо: Салам Ашурмамадов, 63 (0:1), Алишер Ҷалилов, 67 (0:2), Рустам Соиров 75, (0:3), Рустам Соиров, 90+2 (0:4)

«Мастчоҳ» – КМВА – 2:3

Голҳо: Салоҳиддин Одиназода, 28 (1:0). Муҳсин Рустамзода, 50 (2:0). Шодибек Ғаффоров, 61 (2:1). Ҷонибек Шарипов, 90 (2:2). Комрони Мирзохон, 90+2 (2:3).

Ҷоми ФФТ-2021

Марҳилаи финалӣ

Гурӯҳи «Б». 3-юм давр

«Барқчӣ» – «Регар-ТадАЗ» – 1:2 …..   Варзишгоҳи марказии  шаҳри Ҳисор

Голҳо: Ҳикматулло Расулов, 26 (0:1). Ҳикматулло Расулов, 38 (0:2). Абдулло Шарипов, 82 (1:2).