Аз Беларус ба Тоҷикистон зиёда аз 1000 тонна тухмии картошкаи хушсифат ворид мегардад

ДУШАНБЕ, 15.03.2021 /АМИТ «Ховар»/. Соли  равон  ба ҷумҳурӣ  воридоти зиёда аз 1000 тонна тухмии картошкаи хушсифат аз Ҷумҳурии  Беларус ва беш аз 200 тонна тухмии ғалладона аз  Федератсияи Россия дар назар дошта шудааст.

Тавре сардори Раёсати тухмипарварӣ ва дастовардҳои селексионии Вазорати кишоварзии Ҷумҳурии Тоҷикистон  Ҷӯрахон Азизов  ба АМИТ «Ховар»  изҳор дошт, ҷиҳати рушди соҳаи картошкапарварӣ  дар мамлакат  соли гузашта аз Федератсияи Россия ба Тоҷикистон  526 тонна тухмии картошка,  навъҳои хушсифати «Московский 56», «Московский 39» ва «Мироновский 808» ворид гардид. Аз ин 350 тонна ба хоҷагиҳои деҳқонии вилояти Хатлон, ноҳияҳои тобеи ҷумҳурӣ ва боқимондааш ба дигар  минтақаҳои мамлакат  тақсим карда шуд».

«Ҳамчунин, соли 2020  аз ҳисоби ташкилотҳои шарики рушд 135,5 тонна тухмии картошкаи навъи «Пикасо» гурӯҳи якум аз Ҷумҳурии Қирғизистон ба ҷумҳурӣ  ворид гардида, аз он 77,5 тонна ба ноҳияи Рашт ва зиёда аз 50 тонна ба шаҳру ноҳияҳои дигари мамлакат интиқол ёфт»,-афзуд номбурда.

Дар доираи дастуру супоришҳои  Президенти  Ҷумҳурии Тоҷикистон муҳтарам Эмомалӣ Раҳмон барои як сол озод намудани кишоварзон аз андози ягона, имрӯзҳо аксари хоҷагиҳои пешқадами мамлакат якҷо бо соҳибкорони ватанӣ  тухмиҳои навъи покистонӣ ва ҳолландиро аз хориҷа ба ҷумҳурӣ ворид месозанд. Ҳамзамон, аз маҷмӯи  тухмиҳои воридшуда, як қисми муайяни он  бо мақсади озмудани қобилияти сабзиш ва устувории он ба иқлим ба Академияи илмҳои кишоварзии ҷумҳурӣ ва Донишгоҳи аграрии Тоҷикистон ба номи Ш. Шоҳтемур ҷудо гардид.

Тибқи иттилои масъулин, Вазорати кишоварзии мамлакат нақша дорад, ки соли равон майдони кишти картошкаро ба беш аз 70 ҳазор гектар расонад. Аз ин шумора 58 ҳазор гектар кишти асосӣ, 8 ҳазор гектар кишти барвақтӣ буда, дар 6,5 гектар кишти такрории картошка гузаронида мешавад, ки дар маҷмӯъ беш аз 72 ҳазор гектарро ташкил медиҳад. Ба ҳисоби миёна, агар аз ҳар гектар 20-тоннагӣ картошка ҷамъоварӣ гардад, дар умум 1 млн 400 ҳазор тонна картошкаро ташкил медиҳад. Майдони кишт аз ҳисоби заминҳое, ки дар онҳо ғалладонагиҳо, хӯроки чорво кишт карда мешаванд, васеъ карда мешавад. Зеро ин намуд маҳсулотро дар кишти такрорӣ низ парвариш намудан мумкин аст.

Масъулин ҳамчунин иброз доштанд,  ки аз ҳисоби зиёд намудани ҳосилнокии зироати картошка бозори истеъмолиро таъмин намуда, инчунин метавонанд  то 300 ҳазор тоннаро  ба минтақа   содирот  намоянд.