Дар Душанбе масъалаҳои тайёр намудани мутахассисони фанни назарияи мусиқӣ баррасӣ шуданд

Март 13, 2021 11:26

ДУШАНБЕ, 13.03.2021 /АМИТ «Ховар»/. Мутаассифона, сатҳи дониши хонандагон ва донишҷӯёне, ки назарияи мусиқӣ меомӯзанд, ба талабот ҷавобгӯ нест. Дар ин самт, албатта, мушкилот  зиёданд, вале бояд роҳи ҳалро пайдо кард. Мо бояд коре кунем, ки самаранокии  омодасозии мутахассисони оянда, ҳамзамон сифати раванди таълим аз рӯйи фанҳои назарияи мусиқӣ баланд бардошта шавад. Ин нуктаро  12 март муовини Вазири фарҳанги Ҷумҳурии Тоҷикистон Манучеҳр Шарифзода зимни баргузории  ҳамоиши ҷумҳуриявии илмӣ-назариявӣ таҳти унвони «Роҳҳои навсозии омӯзиши назарияи мусиқӣ», ки дар Донишкадаи давлатии фарҳанг ва санъати Тоҷикистон ба номи Мирзо Турсунзода баргузор гардид, баён дошт.

Ҳамоиши мазкур бахшида ба 30-солагии Истиқлоли давлатии Ҷумҳурии Тоҷикистон  ва Озмуни ҷумҳуриявии «Тоҷикистон-Ватани азизи ман» баргузор гардида, дар он масъалаҳои тайёр намудани мутахассисони баландихтисоси соҳа ва пайдо кардани тарзу усулҳои нави омӯзиши фанни назарияи мусиқӣ  мавриди баррасӣ қарор гирифтанд.

Ректори донишкада, доктори илмҳои филологӣ, профессор Муҳриддин Низомӣ зикр намуд, ки “масъалаи омӯзиши фанни назарияи мусиқӣ дар замони муосир, муайян кардани сатҳи дониши назариявии хоандагон ва донишҷӯён оид ба санъати мусиқӣ дар муассисаҳои таълимии фарҳанг ва санъати мамлакат яке аз мавзӯъҳои асосӣ дониста мешавад. Донишкада талош дорад, ки барои ҳалли мушкилиҳои мавҷуда оид ба роҳҳои навсозии омӯзиши назарияи мусиқӣ, инчунин омода намудани мутахассисони ин соҳа ва донишҷӯён барои иштирок дар озмунҳои ҷумҳуриявию байналмилалӣ  пешниҳодҳои нав манзур намояд».

Ба гуфтаи муовини Вазири фарҳанги мамлакат, “бояд ба назар гирифт, ки дар мамлакат муассисаҳои таълимии ба санъати мусиқӣ рабтдошта зиёданд. Аз ин лиҳоз, мо ба кадрҳои баландихтисоси соҳа ниёз дорем. Пӯшида нест, ки дар баъзе ҳолатҳо дар муассисаҳои таълимӣ устодоне, ки аз рӯи ҳамин ихтисос дарс диҳанд, намерасанд. Албатта, ин ба самаранокии раванди таълим таъсири манфӣ мерасонад. Сабабҳои воқеӣ низ ҳастанд- набудани китобҳои дарсӣ, дастурҳои методӣ, барномаҳои таълимӣ аз фанҳои назарияи мусиқӣ, гармония ва таърихи мусиқӣ, ки бояд ҳал шаванд».

Манучеҳр Шарифзода зикр кард, ки Вазорати фарҳанг чопи дастурҳои таълимиро аз рӯи фанҳои назарияи мусиқӣ ба нақша гирифтааст ва барои ҳалли мушкилоти ҷойдошта тадбирҳои зарурӣ меандешад.

Дар интиҳо пешниҳоду дархостҳои иштирокдорон матраҳ гардида, барои дар амал татбиқ намудани онҳо мутахассисони соҳа муваззаф шуданд.

Март 13, 2021 11:26

Хабарҳои дигари ин бахш

Дар Москва ба муносибати 25-солагии таъсиси Ташкилоти заминавии кор бо забонҳо ва фарҳангҳои кишварҳои ИДМ чорабинӣ баргузор гардид
Дар шаҳри Гулистон Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз ёфт
Дар вилояти Хатлон Фестивали ҷумҳуриявии «Ҳафтаи китоби кӯдакону наврасон» оғоз гардид
Имрӯз дар Тоҷикистон Рӯзи байналмилалии китоб таҷлил мегардад
Дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз мегардад
Масъалаи баргузории Рӯзҳои фарҳанги Ҷумҳурии Тоҷикистон дар Ҷумҳурии Қирғизистон баррасӣ шуд
Аъҷубасозӣ як бахши ҳунари кулолӣ ва сохтани бозичаҳо аз гилу сафол мебошад
Дар вилояти Суғд бо иштироки меҳмонон аз Узбекистон ва Қирғизистон ҳамоиши фарҳангӣ баргузор гардид
МУЖДАИ НАВРӮЗӢ. «Ёддоштҳо»-и устод Айнӣ барои ҳамзабонони эронӣ ба нашр расид
Бахшида ба Соли фарҳанги китобхонӣ дар вилояти Хатлон китоби «Наврӯзномаи Хатлон» ба табъ расид
Ҳунари балети Тоҷикистон дар Париж муаррифӣ мегардад
Дабири кулли Созмони ҳамкории иқтисодӣ дар Осорхонаи миллӣ намоиши анъанавии «Аз Наврӯз то Наврӯз»-ро тамошо намуд