Тоҷикистон дар Қазоқистон марказҳои тақсимоти яклухт боз мекунад
![](https://khovar.tj/wp-content/uploads/2021/03/Hajrullo-Ibodzoda.jpg)
ДУШАНБЕ, 13.03.2021 /АМИТ «Ховар»/. Рушди ҳамкории минтақавии ду кишварро раиси вилояти Ҷамбули Қазоқистон Бердибек Сапарбаев ва сафири Тоҷикистон Хайрулло Ибодзода баррасӣ карданд, хабар медиҳад АМИТ «Ховар» бо истинод ба хадамоти матбуоти вилояти Ҷамбул.
Раиси вилоят тазаккур дод, ки ҳамкории минтақаҳои кишварҳоро тақвият додан зарур аст. Ин пешниҳодро сафири Тоҷикистон дастгирӣ кард.
Хайрулло Ибодзода гуфт, ки мехоҳад дар бораи имконоти вилоят маълумоти бештар гирад.
Бердибек Сапарбаев ба сафири Тоҷикистон дар бораи самтҳои асосии рушди минтақа маълумот дода, таъкид кард, ки дар соҳаи зироаткорӣ ва чорводорӣ имкониятҳои бузург мавҷуданд. Истеҳсоли нуриҳои минералӣ рушд мекунад.
«Қазоқистон ва Тоҷикистон кишварҳои Осиё мебошанд, аз ин рӯ, мо бисёр чизҳои муштарак дорем. Манфиатҳои тарафайн вуҷуд доранд. Дар бахшҳои гуногуни иқтисод — кишоварзӣ, саноат, сайёҳӣ ҳамкорӣ кардан мумкин ва зарур аст», — гуфт Б. Сапарбаев.
Хайрулло Ибодзода дар навбати худ зикр кард, ки Тоҷикистон азм дорад, ҷавононро барои таҳсил ба донишгоҳҳои Қазоқистон, аз ҷумла Тараз фиристад.
Илова бар ин, ҷониби Тоҷикистон нақша дорад, ки ба ифтитоҳи ду маркази тақсимоти яклухт дар Қазоқистон мусоидат кунад. Яке аз онҳоро сафир пешниҳод кард, ки дар ин минтақа ифтитоҳ карда шавад. Раиси вилоят ин пешниҳодро дастгирӣ намуда, ба муовини худ Алмас Мадиев супориш дод, ки ин масъаларо омӯзад.
Дурнамои ҳамкорӣ дар соҳаи туризм низ мавҷуд аст. Тараз яке аз қадимтарин шаҳрҳои Қазоқистон ба ҳисоб меравад. Сафири Тоҷикистон ҷиҳати ба роҳ мондани раводиди ягона барои кишварҳои Осиёи Марказӣ, то сайёҳон тавонанд дар як вақт ба чанд шаҳри бостонӣ озодона ташриф оваранд, табодули афкор намуд.
Миёни Тоҷикистон ва Қазоқистон муносибатҳои наздик ба роҳ монда шуда, новобаста аз тандемия, тиҷорати ду давлат ба 910 миллион доллар расид.
АКС аз хадамоти матбуоти ҳокимияти вилояти Ҷамбули Ҷумҳурии Қазоқистон