15 июн Маҷлиси намояндагон озмуни «Асари беҳтарин дар мавзӯи экология»-ро ҷамъбаст менамояд

ДУШАНБЕ, 11.06.2021 /АМИТ «Ховар»/. Бахшида ба 30-солагии Истиқлоли давлатии Ҷумҳурии Тоҷикистон шурӯъ  аз моҳи июни соли 2020 бо ташаббуси бевоситаи Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода Озмуни ҷумҳуриявии «Асари беҳтарин дар мавзӯи экология» эълон гардид. 15 июн озмуни мазкур ҷамъбаст гардида, ғолибони он  дар вазъияти тантанавӣ аз ҷониби роҳбарияти Маҷлиси намояндагон  бо диплом ва мукофотҳои пулӣ сарфароз гардонида мешаванд. Инчунин ба иштирокчиёни фаъоли  озмун туҳфаҳои хотиравӣ супорида мешавад.

Тавре аз Маҷлиси намояндагони Маҷлиси Олии Ҷумҳурии Тоҷикистон ба АМИТ «Ховар» иттилоъ доданд, тибқи шартҳои озмун иштирокчиён асару мақолаҳо, инчунин нигориш, филм, реклама, асари илмии худро оид ба масоили мухталифи ҳифзи муҳити зист, тағйирёбии иқлим, обшавии бесобиқаи пиряхҳо, раванди татбиқи энергияи сабз, истифодаи оқилона ва самараноки захираҳои табиӣ, аз ҷумла захираҳои об, замин, олами набототу ҳайвонот ва дигар масъалаҳои экологиро аз нигоҳи ҳифзи манфиатҳои миллии Ҷумҳурии Тоҷикистон омода намуда, дар воситаҳои ахбори омма интишор намуданд.

Дар ин муддат аз ҷониби аҳли зиё ва шаҳрвандони ҷумҳурӣ, аз ҷумла олимону рўзноманигорон, мутахассисони касбӣ,  омўзгорони муассисаҳои олӣ ва таҳсилоти миёнаи умумӣ, унвонҷўёну аспирантон, инчунин мактаббачагон ва тарбиятгирандагони муассисаҳои томактабӣ,  аз тамоми шаҳру навоҳи ва минтақаҳои ҷумҳурӣ, ҳамагӣ бо теъдоди 83 нафар асару мақолаҳо, гузоришу нигоришҳо ва маводҳои худро бо забонҳои давлатӣ (64 адад), русӣ (18 адад) ва англисӣ (4 адад) пешниҳод намуданд. Комиссияи озмун маводҳоро тибқи салоҳияти худ мавриди омўзишу таҳлил ва баррасӣ  қарор дод.

Асару мақола, гузоришу нигоришҳое, ки пешниҳод шудаанд, масъалаҳои муҳими вазъи экологии ҷумҳуриро вобаста ба тағйирёбии иқлим дар шароити муосири рушд фарогир буда, ба масъалаҳои оқилонаву самаранок истифодабарии захира ва сарватҳои табиии кишвар,  роҳу усулҳои ҳимояи унсурҳои экологӣ, аз ҷумла пешгирии обшавии бесобиқаи пиряхҳо, ҳифзи олами набототу ҳайвонот, ҳавои атмосфера, идоракунии партовҳо, кам кардани таъсири партовҳои саноатӣ ва маишӣ, газҳои гулхонавӣ ва амсоли онҳо ҷиҳати таъмини рушди устувор ва зиндагии шоистаи шаҳрвандони ҷумҳурӣ  бахшида  шудаанд.