1 сентябр дар тамоми муассисаҳои таълимии Тоҷикистон Рӯзи дониш таҷлил мешавад

ДУШАНБЕ, 05.08.2021 /АМИТ «Ховар»/. Дар Рӯзи дониш — 1 сентябр дар тамоми муассисаҳои таълимии Тоҷикистон, новобаста аз шакли ташкилию ҳуқуқӣ ва тобеият таълим тибқи ҷадвали дарсӣ ба роҳ монда мешавад. Дар ин бора ба хабарнигори АМИТ «Ховар» сармутахасcиси Раёсати таҳсилоти миёнаи умумии  Вазорати маориф ва илми Ҷумҳурии Тоҷикистон Марҳабохон  Одилова иттилоъ дод.

Мавсуф иброз намуд, ки дар соли таҳсили 2019-2020 таътил дар Тоҷикистон қабл аз муҳлати муқаррарӣ оғоз гардида буд ва соли хониши 2020-2021 аз 17 август шурӯъ шуд. Ин ҳолат бо сабаби  пешгирии паҳншавии бемории сироятии COVID-19 ҷорӣ гардид.

«Имрӯзҳо дар тамоми муассисаҳои таълимии мамлакат омодагӣ ба соли нави хониш дар сатҳи баланд ҷараён дорад. Дар муассисаҳои таҳсилоти миёнаи умумӣ қабули хонандагон ба синфи якум оғоз гардидааст. Тибқи Низомномаи намунавӣ, дар муассисаи таҳсилоти миёнаи умумӣ барои ба синфи якум қабул намудани хонандагон ҳуҷҷатҳои зерин: варақаи шахсии хонанда, ду дона расми се ба чор, аризаи волидайн оид ба қабул, шаҳодатномаи таваллуди кӯдак, ҳуҷҷати тиббӣ, ду нусхагӣ шиносномаи волидайн, шаҳодатномаи ақди никоҳ ва маълумотнома аз ҷой зист талаб карда мешаванд»,-афзуд мавсуф.

Ба гуфти ҳамсуҳбати мо, бо қарори Ҳукумати Ҷумҳурии Тоҷикистон аз 25 июни соли 2020 ҷиҳати аз байн бурдани норасоии ҷойи нишаст қабули хонандагон аз муассисаҳои таълимии дигар шаҳру ноҳияҳо ба муассисаҳои таълимии шаҳрҳои Кӯлоб ва Душанбе дар доираи талаботи қонунгузорӣ маҳдуд карда мешавад.  Яъне ин маҳдудият танҳо дар шаҳри Душанбе ва Кӯлоб  аз ҳисоби норасоии ҷойи нишаст қабул шудааст. Ин қонун ба дигар шаҳру ноҳияҳои мамлакат дахл надорад.

Марҳабохон  Одилова зикр намуд, ки бо фармоиши Вазири маориф ва илми Ҷумҳурии Тоҷикистон  дар соли таҳсили 2021-2022 давраи мутобиқшавии хонандагони синфи якум ба муҳити муассисаи таълимӣ ба муҳлати 10 рӯз- аз 10 то 20 август муқаррар карда шудааст. Ҳар сол барномаи омодашавӣ аз 1 август шурӯъ мешуд, имсол бо дарназардошти пандемияи коронавирус ҳайати мушовараи Вазорати маориф ва илм тасмим гирифт, ки  он аз 10 август оғоз шавад. Акнун хонандагони синфи якум аз 10 то 20 август аз давраи мутобиқшавӣ гузашта, мисли дигар хонандагон таҳсилро аз 1 сентябр оғоз мекунанд.

Ҳоло дар тамоми муассисаҳои таълимии мамлакат корҳои безараргардонӣ ҷараён доранд. Вазорати маориф ва илми Ҷумҳурии Тоҷикистон  бо шарикони рушд нақша дорад, ки бо кормандони соҳаи маориф ҷиҳати пешгирӣ ва безараргардонӣ корҳои омӯзишӣ ба роҳ монад.

АКС аз бойгонӣ