Акмалиддин ва Садр дар мусобиқаи Ҷоми Президенти Федератсияи байналмилалии самбо соҳиби медал шуданд

ДУШАНБЕ, 23.08.2021 /АМИТ «Ховар»/. Паҳлавонони маъруфи тоҷик Акмалиддин Каримов ва Садр Боев дар мусобиқа барои дарёфти Ҷоми Президенти Федератсияи байналмилалии самбо   сазовори медал шуданд.

 Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон хабар дод.

Мусобиқаи мазкур 22 август дар шаҳри Санкт-Петербурги Русия бо иштироки беҳтарин самбочиёни ҷаҳон дар 7 вазн миёни мардҳо дар сатҳи баланд баргузор шуд. Аз Ҷумҳурии Тоҷикистон чор нафар варзишгари шинохта – Акмалиддин Каримов (вазни -58кг), Хушқадам Хусравов (-64кг), Ёқубҷон Боқиев (-71кг) ва Садр Боев (-88кг) – ба ин мусобиқа даъват шуда буданд.

Акмалиддин Каримов дар вазни -58кг сазовори медали нуқра ва 7000 доллари ИМА ҷоизапулӣ гардид. Дар ин вазн ҳамагӣ 7 нафар иштирок карданд. Акмалиддин дар даври аввал озод буд, сипас дар нимфинал пирӯз ва дар финал аз намояндаи Гурҷистон Вахтанг Чидрашвилӣ мағлуб шуд.

Варзишгари дигари тоҷик  Садр Боев дар вазни -88кг медали биринҷӣ ва 5000 доллари ИМА мукофот гирифт. Ӯ дар чорякфинал бар намояндаи Эрон Саидмуҳаммадризо Саидимаданӣ ғалаба кард, вале дар нимфинал аз варзишгари Узбекистон Ихтиёр Эшмуродов шикаст хӯрд. Садр сипас дар рақобат барои ҷои сеюм намояндаи Марокаш Ал Ҳусейн Чакириро мағлуб намуд.

                                                                              АКСҲО  аз КМО Тоҷикистон