«Амонатбонк» иқдоми пешниҳоди қарзҳои имтиёзноки «Дониш-2021»-ро роҳандозӣ намуд

ДУШАНБЕ, 10.08.2021 /АМИТ «Ховар»/. Дар остонаи соли нави таҳсили 2021-2022 Бонки давлатии амонатгузории Ҷумҳурии Тоҷикистон  «Амонатбонк» таҳти унвони «Дониш-2021» иқдоми пешниҳоди қарзҳои имтиёзнокро роҳандозӣ намуд. Пешниҳоди қарзҳои имтиёзноки «Дониш-2021»  бо мақсади дастгирии муҳассилини муассисаҳои таҳсилоти миёна ва олӣ,  инчунин саҳм гузоштан дар рушду пешрафти соҳаи илму маорифи кишвар ҷорӣ гардидааст.

Тавре ба АМИТ «Ховар» аз  Бонки давлатии амонатгузории Ҷумҳурии Тоҷикистон «Амонатбонк» иттилоъ доданд, дар доираи ин иқдом муштариён имкон доранд барои хароҷоти зарурии таҳсил   то 15 000 сомонӣ бо меъёри солонаи 18 фоиз ба муҳлати 36 моҳ қарз гиранд.

Нафароне, ки дар доираи  «Лоиҳаи музди меҳнат ва нафақа» дорандаи корти пардохтии “Амонатбонк” мебошанд, ба онҳо бе пешниҳоди маълумотномаи манбаи даромад қарз дода мешавад. Қарз бе гарав ва зомин пешниҳод мегардад.

   АКС аз БДА  «Амонатбонк»