ДУШАНБЕ, 26.08.2021 /АМИТ «Ховар»/.  Ҳаракати радикалии  «Толибон»* аз занони коргари афғон даъват кардааст, ки барои таъмини амнияти худ аз хонаҳояшон берун нараванд. Дар ин бора котиби матбуотӣ Забеҳуллоҳ Муҷоҳид изҳороти дахлдор манзур намудааст, иттилоъ  медиҳад  New York Times.

«Мо аз он нигарон ҳастем, ки неруҳои мо дар мавриди чӣ гуна муносибат кардан бо занон омӯзиш нагирифтаанд. Мо намехоҳем, ки неруҳои мо, Худо накунад, ба занон осеб расонанд ё онҳоро таъқиб кунанд»,- гуфт мавсуф.

Ҳамзамон сухангӯи толибон инро як амали муваққатӣ номида, ваъда дод, ки маоши занони коргар дар хона пардохт карда мешавад.

Ҷангҷӯёни «Толибон»* 15 август, вақте пойтахти мамлакат- Кобулро ишғол карданд, аз забти қудрат дар Афғонистон хабар доданд. Пас аз он ҳазорон шаҳрвандон талош карданд, ки кишварро тарк намоянд. Баъзеҳо тавонистанд фирор кунанд, аммо афғонҳои зиёде бар асари издиҳом дар фурудгоҳ ҷон доданд.

Каме пештар, 24 август, сухангӯи толибон Забеҳуллоҳ Муҷоҳид гуфта буд, ки тарки Афғонистон танҳо то 31 август имконпазир хоҳад буд.

Пас аз он роҳи хуруҷ аз кишвар баста мешавад.

                                                                            АКС: focus

________________________________________

 *«Толибон» ҳаракатест, ки дар Тоҷикистон, Русия ва якчанд давлати  дигар мамнӯъ аст.