Кормандони Суди конститутсионии Тоҷикистон бо аҳли ҷамоати шаҳри Турсунзода вохӯрӣ намуданд

ТУРСУНЗОДА, 23.04.2026. /АМИТ «Ховар»/. 22 апрел дар Мақомоти иҷроияи ҳокимияти давлатии шаҳри Турсунзода вохӯрии намояндагони  Суди конститутсионии Ҷумҳурии Тоҷикистон бо аҳли ҷамоати шаҳр баргузор гардид. Дар ин хусус  ба хабарнигори минтақавии АМИТ«Ховар» аз Мақомоти иҷроияи ҳокимияти давлатии шаҳри Турсунзода  иттилоъ доданд.

Судяи Суди конститутсионии Ҷумҳурии Тоҷикистон Балаҷон Идрисзода дар хусуси таҳкими волоияти қонун дар ҷомеа, нақши Конститутсияи Тоҷикистон дар бунёди ҷомеаи ҳуқуқбунёд, ҳифзи дастовардҳои даврони соҳибистиқлолӣ, титбиқ ва риояи қонунҳои миллӣ «Дар бораи танзими ҷашну маросим дар Ҷумҳурии Тоҷикистон»,  «Дар бораи масъулият барои таълиму тарбияи кӯдак», «Дар бораи тарбияи ватандӯстии шаҳрвандон» ва мавқеи Суди конститутсионии Тоҷикистон дар ҷомеа сухан гуфт.

Дар ҳамоиш дар бораи роҳҳо ва усулҳои пешгирии дохилшавии ҷавонон ба ҳизбу ҳаракатҳои ифротӣ андешаҳо баён шуданд. Гуфта шуд, ки тақвияти корҳои фаҳмондадиҳӣ ва ҳамкории зич бо оила, ҷомеа, фаъолон ва муассисаҳои таълимӣ метавонад сатҳи чунин хатарҳоро ба таври назаррас коҳиш диҳад. Ҳамзамон баланд бардоштани маърифати динӣ ва шинохти дурусти арзишҳои миллӣ метавонад ҷавононро аз таъсири идеологияҳои бегона ҳифз намояд.

Дар вохӯрӣ иброз гардид, ки аксар ташкилоти террористӣ барои ба ҳадафҳои нопоки худ расидан аз эътиқоди динии шаҳрвандон суиистифода карда, онҳоро ба гумроҳӣ мебаранд ва аз роҳи илму дониш дур месозанд. Ҳол он ки илму дониш ҳеҷ вақт душмани дину имон набуда, балки бар зидди хурофот ва бофтаҳои баъзе диндорони камсавод равона шудаанд. Дар чунин шароит бояд шаҳрвандони мо, бахусус ҷавонон зиракиро аз даст надода, худро аз чунин гурӯҳҳо дур нигоҳ доранд ва ҳамеша дар фикри ободу зебо гардонидани Тоҷикистон бошанд.

АКС: Мақомоти иҷроияи ҳокимияти давлатии шаҳри Турсунзода