Дар гарнизони Хатлон машқҳои муштараки СААД ҷараён доранд

Октябрь 19, 2021 09:02

ДУШАНБЕ, 19.10.2021 /АМИТ «Ховар»/. Дар доираи раёсати Ҷумҳурии Тоҷикистон дар Созмони Аҳдномаи амнияти дастҷамъӣ аз 18 то 23 октябр дар машқгоҳҳои низомии «Ҳарбмайдон» ва «Ҳомиён»-и ҳудуди гарнизони Хатлон таҳти унвони «Ҷустуҷӯ», «Эшелон» ва «Ҳамоҳангӣ-2021» машқҳои муштараки махсуси васеи ҳарбӣ баргузор мегарданд, ки дар он чор ҳазор нафар низомиёни Қувваҳои Мусаллаҳи кишварҳои аъзои Созмони Аҳдномаи амнияти дастҷамъӣ (СААД) ширкат менамоянд.

Тавре ба мухбири АМИТ «Ховар» сардори маркази матбуоти Вазорати мудофиаи Ҷумҳурии Тоҷикистон Фаридун Маҳмадализода хабар дод, баҳри иштирок дар размоиши муштараки васеи ҳарбӣ теъдоди муайяни ҳайати низомиёни Қувваҳои Мусаллаҳи ҷумҳуриҳои Арманистон, Беларус, Қазоқистону Қирғизистон ва Федератсияи Русия тавассути марзҳои заминиву фазоии кишвар ва мусаллаҳу муҷаҳҳаз бо техникаву лавозимоти ҷангӣ аз 14 то 16 октябр вориди Тоҷикистон шуданд.

Машқҳои муштараки махсуси васеи низомии кишварҳои узви СААД таҳти унвони «Ҷустуҷӯ», «Эшелон» ва «Ҳамоҳангӣ-2021» дар чанд марҳила ташкилу ба роҳ монда шуда, иштирокчиёни неруҳои мусаллаҳи кишварҳои аъзо якчанд унсурҳои зиддитеррористиро амалан коркарду тарҳрезӣ менамоянд.

Дар ин радиф ҳайати низомиёни Қувваҳои Мусаллаҳи кишварҳои узви СААД баъди вориди Тоҷикистон шудан аллакай бо густурдани хаймаҳои зист ва ташкили дигар шароити зарурии хизмативу маишӣ дар машқгоҳи низомии «Ҳарбмайдон» қароргоҳи муваққатӣ бунёд намуда, онро ба майдони шартии ҷанг табдил додаанд.

Баъд аз буду бош ҳайати неруҳои мусаллаҳи таъйиншуда дар майдони машқгоҳи низомии «Ҳарбмайдон» саф ороста, чун анъана бо садои сурудҳои миллӣ ва дар як вақт бо бардоштани парчамҳои давлатӣ ба размоиши муштараки васеи низомӣ оғози расмӣ бахшиданд.

Дар маросими ифтитоҳи машқҳои муштараки низомӣ намояндагони Қувваҳои Мусаллаҳи кишварҳои узви СААД дар назди иштироккунандагони ин размоиши васеи ҳарбӣ сухан гуфта, доир ба ҳадафи баргузории унсурҳои зиддитеррористӣ ва матлабу марҳилаҳои барои он пешбинигардида изҳори андеша карданд.

Баъд аз анҷоми бахши расмӣ ва  оғози машқҳои муштараки васеи махсуси ҳарбӣ дар майдони сафороии машқгоҳи «Ҳарбмайдон» гузашти низомии ҷузъу томҳои Қувваҳои Мусаллаҳи кишварҳои узви СААД доир гардид.

Дар баробари ҷалби чор ҳазор нафар ҳайати шахсӣ, инчунин дар ин машқҳои махсуси васеи низомӣ чархболҳои МИ-8, МИ-24, ҳавопаймоҳои ҳуҷумкунанда, муҳорибавию зарбазан ва бомбаандозу қиркунанда, 50 адад техникаҳои зиреҳпӯши ҷангиву махсус, тӯп ё  воситаҳои гуногуни артиллерӣ, миқдори зиёди техникаҳои автомобилӣ, силоҳу муҳимоти мухталифи ҳозиразамони ҳарбӣ ва дигар лавозимоти махсуси низомӣ дар он истифода мешаванд.

Айни ҳол ҳайати таъйиншудаи ҷузъу томҳои Қувваҳои Мусаллаҳи кишварҳои узви СААД аз рӯйи мавзӯъ ва матлаби ба машқҳои васеи низомӣ пешбинигардида, ба даври ниҳоии ин размоиши васеи низомӣ омодагии ҳамаҷониба мегирад.

Дар баробари баргузории машқҳои муштараки васеи низомии кишварҳои узви СААД, инчунин дар машқгоҳи ҳарбии «Ҳомиён»-и ҳудуди шаҳри Кӯлоб низ дар як вақт тамринҳои ҳарбии Тоҷикистону Русия идома доранд.

Даври ниҳоии машқҳои муштараки «Ҷустучӯ», «Эшелон» ва «Ҳамоҳангӣ-2021» 23 октябр дар машқгоҳи низомии «Ҳарбмайдон» ба нақша гирифта шуда, размоиши дуҷонибаи Тоҷикистон ва Русия 22 октябр дар машқгоҳи ҳарбии «Ҳомиён» ҷамъбасту натиҷагирӣ  мешавад.

 

АКСҲО аз сомонаи Вазорати мудофиа

Октябрь 19, 2021 09:02

Хабарҳои дигари ин бахш

Прокуратураи генералии Тоҷикистон аз Прокуратураи генералии Қирғизистон хостааст ба таҷрибаи оғоз намудани парвандаҳои беасоси ҷиноятӣ хотима бахшида шавад
Нишасти Ҳинд бо таъкид ба ташкили ҳукумати фарогир дар Афғонистон ба поён расид
ОФТОБРО БО ДОМАН ПӮШИДА НАМЕШАВАД. Неруҳои Ҷабҳа гуфтанд, ки толибон дар Афғонистон бо ДИ* ва “Ал-Қоида”* робита доранд
Патрушев шумораи террористонро дар Афғонистон эълон намуд
Шералӣ Мирзо дар ҷаласаи Шӯрои вазирони мудофиаи кишварҳои узви ИДМ иштирок намуд
ВАЗЪИЯТ ДАР САРҲАДИ АФҒОНИСТОН ВА ТОҶИКИСТОН МУРАККАБ БОҚӢ МЕМОНАД. Дар ин бора имрӯз котиби Шӯрои амнияти Тоҷикистон зимни нишаст дар Деҳлии Нав изҳори назар намуд
Қазоқистон нақша дорад ба Тоҷикистон ба таври ройгон техникаҳои низомӣ диҳад
Дар Афғонистон бар зидди толибон* ҷанги партизанӣ оғоз шуд
Милитсияи тоҷик қодир аст аз ҳама гуна амалҳои носавобу душманонаи дилхоҳ гурӯҳҳои ҷиноятпеша ҷилавгирӣ намояд
МИЛИТСИЯИ ТОҶИК — ҶАСУР, ФИДОКОР, ҶОННИСОР! Президенти Тоҷикистон зимни Паёми шодбошӣ кормандони ин ниҳодро ҳомиёни шараф ва обрӯи халқу давлат номиданд
Дар полки таъйинотӣ ва идоракунии Вазорати мудофиаи Тоҷикистон 200 нафар савганди ҳарбӣ ёд намуданд
Дар Театри мусиқӣ-мазҳакавии Хоруғ бахшида ба Рӯзи милитсияи тоҷик ҳамоиши тантанавӣ ва барномаи мусиқӣ доир шуд