Ғолибони Мусобиқаи байналмилалӣ оид ба гӯштини дзюдо барои дарёфти Ҷоми Президенти Ҷумҳурии Тоҷикистон муайян шуданд

Октябрь 6, 2021 09:43

ДУШАНБЕ, 06.10.2021 /АМИТ «Ховар»/. Аз  3  то  5 октябр дар Қасри теннис ва маҷмааи варзишҳои обии шаҳри Душанбе 8-умин Мусобиқаи байналмилалӣ  оид ба гӯштини дзюдо барои дарёфти Ҷоми Президенти Ҷумҳурии Тоҷикистон дар сатҳи баланд баргузор шуд, хабар медиҳад шореҳи варзиши АМИТ «Ховар» Меҳрони Қурбон.

Дар рӯзи охири мусобиқа рақобатҳо дар вазнҳои -90 ва +90кг сурат гирифта, бо пирӯзии паҳлавонони  шинохтаи  тоҷик – Комроншоҳ Устопириён ва Темур Раҳимов хотима ёфтанд. Комроншоҳ Устопириён (-90кг) рақобатро аз даври дуюм ба муқобили варзишгари Қазоқистон – Сергей ПАК оғоз кард. Рақобати  ин ду варзишгар  то вақти иловагӣ  тӯл кашида, ниҳоят Комроншоҳ бо иҷрои усули  «отоси»  ҳарифро мағлуб кард. Дар сонияҳои охири даври чорякниҳоӣ бо иҷрои зиддиусул Муин Орифовро (Тоҷикистон) шикаст дода, ба даври нимниҳоӣ роҳ ёфт. Рақиби Комроншоҳ дар даври нимниҳоӣ – варзишгари Узбекистон – Азизбек Авазмуродов бо дарёфти се «шидо» мағлуб дониста шуд.

Дар рақобати шадид барои дарёфти Ҷоми мусобиқа Комроншоҳи  Устопириён бо паҳлавони  ботаҷрибаи узбек – Шермуҳаммад Ҷандреев қувва санҷид. Дар вақти асосии рақобат ҳеҷ кадом ғолиб наомада, танҳо дутоӣ танбеҳ гирифтанд. Дар вақти ҷудошуда барои имтиёзи тиллоӣ рақиби Комроншоҳ бо дарёфти сеюмин танбеҳ имкони касби нишонҳои тиллои мусобиқаро аз даст дод. Ҳамин тариқ, паҳлавони шинохтаи тоҷик Комроншоҳ Устопириён ғолиби Ҷоми Президент дар вазни -90кг гардид.

Паҳлавони маъруфи    тоҷик Темур Раҳимов дар вазни +90кг, ки дар даври аввал озод буд, дар даври дуюм бар Давлатҷон Назриев аз Тоҷикистон дастболо шуд. Дар чорякниҳоӣ варзишгари Беларус Богдан Войтсикро   мағлуб кард. Дар даври нимниҳоӣ варзишгари Узбекистон Шоҳруххон Бахтиёровро бо иҷрои зиддиусул шикаст дода, ба финали мусобиқа роҳ ёфт. Дар финал Темур Раҳимов бо варзишгари  Русия Антон Брачев рақобат намуд. Пас аз ҳамлаҳои пай дар пай Темур ниҳоятан ҳарифро бо иҷрои “осото гари” ба замин зада, тавонист ӯро дар ҳолати “осаекоми” нигаҳ дорад ва ғолиби рақобати ҳалкунанда шавад.

 Ғолибон ва ҷоизадорони 8-умин мусобиқаи  Ҷоми Президенти Тоҷикистон оид ба дзюдо:

-66кг
1. Дилшодбек ЮЛДОШЕВ (UZB)
2. Фирӯз МЕЛИБОЙЗОДА (TJK)
3. Ориф ДОДОВ (TJK)
3. Абубакр БОҚИЕВ (TJK)

-81кг
1. Умар РАСУЛОВ (TJK)
2. Раҳматулло ФАРҲОДОВ (TJK)
3. Шодмон РИЗОЕВ (RUS)
3. Хусрав АЛАМОВ (TJK)

-90кг
1. Комроншоҳ УСТОПИРИЁН (TJK)
2. Шермуҳаммад ҶАНДРЕЕВ (UZB)
3. Исроил РАҲИМОВ (TJK)
3. Достон МЕЙЛИЕВ (UZB)

+90кг
1. Темур РАҲИМОВ (TJK)
2. Антон БРАЧЕВ (RUS)
3. Бекмурод ОЛТИБОЕВ (UZB)
3. Шоҳруххон БАХТИЁРОВ (UZB)

Ғолибон ва ҷоизадорони мусобиқа дар баробари медал бо мукофотпулӣ қадр карда шуданд. Ба ғолибони ҷои аввали мусобиқа 30 000 сомонӣ, ҳамчунин ҷом, ба барандагони медали нуқра 10 000 сомонӣ ва ба барандагони медали биринҷӣ 5000 сомонӣ супорида шуд.

Мавриди зикр аст, ки  Ҷоми Президенти Тоҷикистон оид ба   гӯштин дзюдо   бори аввал соли 2013 дар ду вазн (-81кг, вазни мутлақ), солҳои 2014, 2015, 2016, 2017 дар вазни мутлақ доир гардида буд. Солҳои 2018 ва 2019 рақобатҳо тибқи қоидаҳои Федератсияи байналмилалии дзюдо  аз рӯи 7 вазн миёни мардҳо сурат гирифта буданд. Соли гузашта мусобиқа бо сабаби пандемияи коронавирус баргузор нашуд.

Хотиррасон мекунем, ки мусобиқаи мазкур бори ҳаштум баргузор шуд.  Дар он 133 варзишгар аз Тоҷикистон, Узбекистон, Қазоқистон, Русия ва Беларус ширкат карда, дар 4 вазн (-66кг, -81кг, -90кг, +90кг) миёни ҳам  қувва озмуданд.

Октябрь 6, 2021 09:43

Хабарҳои дигари ин бахш

Конфедератсияи футболи Осиё тақвими бозиҳои марҳилаи интихобии Ҷоми Осиё-2026 оид ба футзалро тасдиқ намуд
ФУТБОЛ. Пагоҳ дар Душанбе марҳилаи интихобии Ҷоми Осиё-2026 байни дастаҳои занона дар гурӯҳи «H» оғоз мешавад
Рақибони дастаи мунтахаби футзали Тоҷикистон дар марҳилаи интихобии Ҷоми Осиё-2026 маълум шуданд
Дастаи мунтахаби футзали Тоҷикистон дар бозии дӯстона боз бар тими Амороти Муттаҳидаи Араб ғалаба кард
ФУТБОЛ. Фонди ҷоизавии мусобиқаи «Ҷоми Ҷавонӣ-2025» 60 ҳазор сомониро ташкил медиҳад
Бозии дӯстона байни дастаҳои мунтахаби олимпии Тоҷикистон ва Қирғизистон мусовӣ анҷом ёфт
ФУТБОЛ. Истиқлол» бар «Регар-ТадАЗ» ва «Вахш» бар «Хуҷанд» ғалаба намуд
ФУТЗАЛ. Дастаи мунтахаби Тоҷикистон дар бозии дӯстона бо тими мунтахаби Амороти Муттаҳидаи Араб ғолиб омад
«Регар ТадАЗ» дар мусобиқа оид ба волейбол дар ноҳияи Восеъ сазовори Шоҳҷоиза гардид
Дар Ҳисор бозии дӯстонаи дастаи олимпии Тоҷикистон (U-23) бо мунтахаби олимпии Қирғизистон доир мешавад
Федератсияи футболи Тоҷикистон соҳиби ҶОИЗАИ БИРИНҶИИ «FIFA FORWARD AWARDS» гардид
Дастаи мунтахаби футзали Тоҷикистон бо тими Амороти Муттаҳидаи Араб бозиҳои дӯстона анҷом медиҳад