Оташи Бозиҳои зимистонаи олимпии Пекин-2022 фурӯзон гардид

Октябрь 19, 2021 11:01

ДУШАНБЕ, 19.10.2021 /АМИТ«Ховар»/. 18 октябр дар шаҳраки Олимпиаи Юнон оташи Бозиҳои зимистонаи олимпии Пекин-2022 фурӯзон карда шуд, иттилоъ доданд аз Кумитаи миллии олимпии Тоҷикистон ба АМИТ «Ховар».

Маросими оташафрӯзӣ дар шаҳраки  Олимпиа бо дарназардошти чораҳои муқовимат ба COVID-19 бо иштироки маҳдуди ҳайатҳо доир шуд. Оташи олимпӣ рамзи сулҳ, ваҳдат ва ҳамбастагӣ буда, ба  варзишгароне, ки ба ин бозиҳо омодагӣ мегиранд, илҳом мебахшад.

Президенти Кумитаи байналмилалии олимпӣ Томас Бах дар маросими оташафрӯзӣ изҳор дошт, ки Бозиҳои олимпӣ ҳамеша дар болои низоъ қарор доштанд. «Дар ҷаҳони нозуки мо, ки дар он тақсимот, низоъ ва нобоварӣ афзоиш меёбад, Бозиҳои олимпӣ ҳамеша пул месозанд. Бозиҳо ҳеҷ гоҳ девор намесозанд. Бозиҳои олимпӣ наметавонанд ҳамаи мушкилоти ҷаҳони моро ҳал кунанд, вале онҳо барои ҷаҳон намунаи эҳтироми якдигарро мерос гузоштаанд. Бозиҳо ба ҳалли мушкилот тавассути дӯстӣ ва ҳамбастагӣ илҳом мебахшанд. Онҳо пулҳое месозанд, ки сабаби фаҳмиши беҳтар ва дӯстии қавӣ миёни одамон мешаванд»,-гуфт Томас Бах.

Намояндаи Бозиҳои олимпии Пекин-2022, ноиби президенти Кумитаи олимпии Чин Йу Зайгинг зикр намуд, ки «ин як лаҳзаи таърихӣ мебошад. Зеро мо дар шаҳри қадимаи Олимпиа ҷамъ омадем, то афрӯхтани оташи Бозиҳои XXIV зимистонаи олимпиро ҷашн гирем. Оташи олимпӣ роҳи сафари моро равшан мекунад, то мушкилотро бо ҳамбастагии бештар ва ҳамкории наздиктар бартараф кунем. Дар давраи сар задани бемории коронавирус оташи олимпӣ ба мо эътимод, гармӣ ва умед бахшид. Ин як манбаи қувва дар муборизаи мо барои мағлуб кардани пандемия буд”.

Маросими анъанавӣ, ки дар наздикии маъбади Ҳера баргузор шуд, мероси юнонии Бозиҳои олимпиро таҷассум мекунад ва Бозиҳои муосирро бо пайдоиши таърихии он мепайвандад. Пас аз он ки оташи олимпӣ аз ҷониби саркоҳин фурӯзон карда шуд, он сафари худро тавассути лижарони юнонӣ Иоаннис Антониу оғоз кард. Пас аз он шӯъла ба варзишгари чинӣ, барандаи панҷ медали Бозиҳои зимистонаи олимпӣ дар конкитозӣ Ли Ҷиаҷун гузашт.

Пас аз маросим оташи олимпӣ ба Варзишгоҳи Панатенаичи Афина интиқол дода шуда, имрӯз, 19 октябр расман ба Пекин-2022 супорида мешавад.

20 октябр дар Пекин маросими истиқбол баргузор мешавад ва алангаи оташ аввал дар бурҷи олимпии Пекин пеш аз сафар ба мардум намоиш дода мешавад.

Бозиҳои зимистонаи олимпӣ аз 4 то 20 феврали соли 2022 дар шаҳри Пекини Чин бо иштироки тақрибан 2900 варзишгар аз 85 кумитаи миллии олимпӣ баргузор мешаванд. Пекин ягона шаҳре мебошад, ки мизбони ҳам Бозиҳои тобистона ва ҳам Бозиҳои зимистона мешавад.

 

АКС аз Кумитаи миллии олимпии Тоҷикистон

Октябрь 19, 2021 11:01

Хабарҳои дигари ин бахш

Марҳилаи интихобии Ҷоми футзали Осиё-2026 дар Душанбе баргузор мешавад
Муҳаммадӣ Раҷабов дар Чемпионати Осиё оид ба қаиқронӣ байни наврасон ва ҷавонон соҳиби медали тилло гардид
Паҳлавонони тоҷик дар Чемпионати ҷаҳон оид ба гӯштини ҷудо байни калонсолон иштирок менамоянд
ҶОМИ ОСИЁ-2027. Дастаи мунтахаби Тоҷикистон дар даври дуюми марҳилаи интихобӣ бо тими Филиппин мусовӣ намуд
Дастаи мунтахаби ҷавонони Тоҷикистон (U-18) чемпионати CAFA-2025-ро бо пирӯзӣ бар тими Афғонистон оғоз кард
Гела Шекиладзе: «Футболбозони тоҷик бо тамоми неру барои бозӣ бо дастаи мунтахаби Филиппин тайёрӣ мебинанд »
ЧЕМПИОНАТИ CAFA U-20. Рақибони дастаи ҷавонони Тоҷикистон (U-18) муайян гардиданд
ҶОМИ ОСИЁ-2027. Имрӯз дастаи мунтахаби Тоҷикистон дар марҳилаи интихобӣ бо тими Филиппин бозӣ мекунад
ҶОМИ ОСИЁ-2027. Дастаи мунтахаби Тоҷикистон оид ба футбол бо тими Филиппин бо либоси сафед бозӣ мекунад
Ду дастаи Тоҷикистон оид ба футбол барои иштирок дар Лигаи дуюми чемпионҳои Осиё-2025/26 иҷозатнома гирифтанд
ФУТБОЛ. Дастаи ҷавонони то 18-солаи Тоҷикистон дар Чемпионати CAFA-2025 иштирок менамояд
35-СОЛАГИИ ИСТИҚЛОЛИЯТИ ДАВЛАТӢ. Дар Варзишгоҳи миллии Тоҷикистон зиёда аз 30 ҳазор ҷойи нишаст пешбинӣ шудааст