Дар Чемпионати CAFA бозии дастаҳои мунтахаби наврасони Тоҷикистон ва Эрон мусовӣ анҷом ёфт

ДУШАНБЕ, 22.11.2021 /АМИТ «Ховар»/. Дар даври дуюми Чемпионати Ассотсиатсияи футболи Осиёи Марказӣ (CAFA), ки дар Душанбе ҷараён дорад, дастаи мунтахаби наврасони Тоҷикистон (U-15) бо ҳамсолонашон аз Эрон бо ҳисоби 1:1 мусовӣ бозӣ карданд, иттилоъ доданд аз  Кумитаи миллии олимпии Тоҷикистон ба АМИТ “Ховар”.

Ба голи задаи Алӣ Раҳмоннажоди эронӣ футболбози дастаи Тоҷикистон Абубакр Сулаймонов бо гол ҷавоб дод.

Бозии дигари давр миёни дастаҳои наврасони Қирғизистон ва Тоҷикистон низ бо ҳисоби 2:2 мусовӣ анҷом ёфт.

Баъд аз натиҷагирии ду даври чемпионат дастаҳои Тоҷикистон ва Эрон бо 4-холӣ пешсафанд.

Дар даври ҷамъбастӣ 23 ноябр дастаи мунтахаби Тоҷикистон бо ҳамсолонашон аз Узбекистон вомехӯранд. Бозии дастаҳо дар Варзишгоҳи марказии ҷумҳуриявӣ соати 15:00 оғоз меёбад.

Ёдовар мешавем, ки Чемпионати Ассотсиатсияи футболи Осиёи Марказӣ миёни наврасони то 15-сола тибқи системаи даврӣ дар як давр баргузор мешавад. Дастае, ки холҳои бештар ба даст меорад, ғолиб мегардад.

АКС: Кумитаи миллии олимпии Тоҷикистон