Дар Русия ба шаҳрвандони Тоҷикистон — муҳоҷирони меҳнатӣ машваратҳои ҳуқуқӣ – амалии ройгон расонида мешаванд

ДУШАНБЕ, 18.02.2022. /АМИТ «Ховар»/. Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират ба шаҳрвандони Тоҷикистон — муҳоҷирони меҳнатӣ расонидани машварати ҳуқуқӣ ва амалиро роҳандозӣ намудааст. Расонидани машваратҳои ҳуқуқӣ – амалӣ ба муҳоҷирон дар шаҳри Москва ва ҳавзаҳои федералии Русия дар доираи қонунгузории Ҷумҳурии Тоҷикистон ва Федератсияи Русия ба таври ройгон ба роҳ монда мешаванд, хабар дод масъули бахши матбуоти Намояндагии мазкур Каримҷон Салимзода ба АМИТ «Ховар».

— Масъулини Намояндагӣ пайваста ҷиҳати мусоидат ба ҳалли масъалаҳои муҳоҷирони меҳнатӣ тадбирҳои мушаххас меандешад. Расонидани машварати ҳуқуқӣ ва амалӣ бо мақсади баланд бардоштани маърифати ҳуқуқӣ, риояи қонунҳои будубоши кишвари иқомат, ба роҳ мондани фаъолияти меҳнатӣ дар асоси ҳуҷҷатҳои иҷозатдиҳандаи фаъолият (патент) ва бастани шартномаҳои меҳнатӣ бо субъектони хоҷагидор, ҳимояи ҳуқуқҳои муҳоҷирони меҳнатӣ ҳангоми боздошт аз ҷониби маъмурони полис ва ба муҳоҷирони меҳнатӣ мусоидат намудан дар тартиб додани аризаҳои даъвогиву шикоятӣ, аз ҷумлаи ҳамин тадбирҳост, — афзуд Каримҷон Салимзода.

Ёдовар мешавем, ки соли 2021 аз ҷониби масъулини Намояндагӣ ба 14 653 нафар муҳоҷирон – шаҳрвандони Ҷумҳурии Тоҷикистон тавсияву машваратҳои ҳуқуқӣ вобаста ба қонунигардонӣ дар қаламрави Федератсияи Русия дода шуда, ба 3 572 нафар шаҳрвандон кумакҳои ҳуқуқии амалӣ расонида шудааст.

Ҳамзамон ба 45 нафар шаҳрвандони кишвар – муҳоҷирони меҳнатӣ вобаста ба қарздор буданашон аз судиҷрочиён ва сари вақт насупоридани ҷаримаҳояшон бо содир кардани ҳуқуқвайронкунии маъмурӣ аз чунин машварати ҳуқуқии амалӣ бархурдор гардиданд.

Инчунин соли 2021 аз ҷониби масъулини Намояндагӣ дар қаламрави Федератсияи Русия 29 амали фиребдиҳандаи миёнаравон ошкор ва ҷуброни зарари муҳоҷирон баргардонида шудааст. Дар доираи қонунгузории Федератсияи Русия, Ҷумҳурии Тоҷикистон ва такя ба қонунгузории байналмиллалӣ дар самти муҳоҷират масъулини Намояндагӣ ба зинаҳои болоии судӣ 66 шикоятро оид ба ихроҷи шаҳрвандон ирсол намудаанд, ки дар натиҷа 13 қарори суди ноҳиявӣ бекор шудааст.

Ба муҳоҷирони меҳнатӣ тавсия дода мешавад, ки қонунгузории кишвари қабулкунандаи қувваи кориро риоя намуда, тибқи тартиби муқарраршуда кор ва фаъолият намоянд. Ҳангоми оғози фаъолияти меҳнатӣ бо корфармо шартномаи меҳнатӣ ба имзо расонида, як нусхаи аслии онро дар худ нигоҳ дошта, тибқи муқаррарорти шартномаи меҳнатӣ фаъолият намоянд.

Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират ба иттилои шаҳрвандони Ҷумҳурии Тоҷикистон- муҳоҷирони меҳнатӣ мерасонад, ки дар ҳолати пайдо гардидани ягон мушкилӣ метавонанд ба масъулини Намояндагӣ ба рақамҳои зерин муроҷиат намоянд:

1. ш. Москва: +7(495)9679844, +7(926)4626201, +7(903)5971213, +7(926)8769049, +7(910)4436335, +7(977)4878964, +7(967)2710202;

2. ш. Санкт-Петербург: +7 (964) 373 75 01;

3. ш. Екатеринбург: +7 (982) 739 8998;

4. ш. Новосибирск: +7(965)3586161;

5. ш. Уфа: +7 (915) 4883223;

6. ш. Краснодар: +7(929)540 88 88;

7. ш. Астрахан: +7(977)2720001.

8. ш. Хабаровск: +7 (909)809 5548;

Аксҳо аз манбаъҳои боз