Донишкадаи давлатии санъати тасвирӣ ва дизайн намоиши асарҳои наққошии омӯзгорон ва донишҷӯёнро баргузор намуд

ДУШАНБЕ, 27.02.2022 /АМИТ «Ховар»/. Дар Донишкадаи давлатии санъати тасвирӣ ва дизайни Тоҷикистон бо иштироки васеи донишҷӯёну устодон ва меҳмонон – намояндагони сафоратхонаҳои давлатҳои хориҷӣ намоиши асарҳои наққошии омӯзгорон ва донишҷӯёни донишкада таҳти унвони «Кундал» баргузор гардид. Дар ин бора АМИТ «Ховар» бо истинод ба Донишкадаи давлатии санъати тасвирӣ ва дизайни Тоҷикистон хабар медиҳад.

Ректори донишкада Ҷамшед Ғанизода зинда гардонидани навъи санъати наққошии халқи тоҷик — кундалро дар нуҳ соли фаъолияти донишкада, ки тӯли ин муддат дар ин ҷо устодони ин санъат ба камол расидаанд, дастоварди муҳим номид.

Сипас, муовини вазири фарҳанги Тоҷикистон Манучеҳр Шарифзода ва устоди Донишкадаи мазкур Маҳмадкарим Рақибов оид ба таърихи санъати кундал, рушди ин навъи санъат аз даврони қадим то ба имрӯз ба тамошобинон маълумоти муфассал пешниҳод намуданд.

Дар намоиш беш аз 50 асари тозаэҷоди наққошии рассомон — мудири кафедраи санъати ороиши амалӣ ва монументалӣ Муноҷот Бойматова, ассисенти кафедраи мазур Маҳмадкарим Рақибов ва шогирдони донишгоҳии онҳо дар равияи санъати кундал ба намоиш гузошта шуданд.

Тамошобинон ба аксарияти ин асарҳо, ки бо усули анъанавии санъати қадимаи халқи тоҷик эҷод шудаанд, таваҷҷӯҳи хоса зоҳир намуданд.

Намоиши асарҳои рассомии санъати кундал дар донишкада бори аввал набуда, ду сол қабл низ чунин намоиши боҳашамат рӯйи кор омадааст.

Акс: ДДСТДТ