ТАСС: Тиҷорат миёни Русия ва Тоҷикистон дар соли 2021 аз сатҳи қабл аз пандемия гузашт

ДУШАНБЕ, 25.02.2022  /АМИТ «Ховар»/. Гардиши мол миёни Русия ва Тоҷикистон дар соли 2021 беш аз 45 дарсад афзоиш ёфта, аз сатҳи пеш аз пандемия гузашт. Дар ин бора Раиси Шӯрои Федератсияи Русия Валентина Матвиенко изҳор дошт, хабар медиҳад ТАСС.

«Дар соли сипаригардида гардиши мол миёни кишварҳои мо беш аз 1 миллиард доллари ИМА-ро ташкил дода, афзоиши он ба зиёда аз 45 фоиз расид. Ин ба мо имкон дод, ки на танҳо ба нишондиҳандаҳои пеш аз пандемия баргардем, балки ба натиҷаҳои аз он ҳам баландтар ноил шавем»,- гуфт Раиси Шӯрои Федератсия зимни суханронӣ дар Форуми VII байнипарлумонии «Тоҷикистон – Русия: иқтидори ҳамкории байниминтақавӣ».

Ӯ афзуд, ки Русия то ҳол шарики асосии тиҷоратии ҷумҳурӣ маҳсуб меёбад. «Аксарияти кулли минтақаҳои Русия бо Тоҷикистон ба тиҷорати хориҷӣ машғуланд, садҳо корхонаҳои муштарак фаъолият доранд. Дар маҷмӯъ метавон гуфт, ки бо вуҷуди ин дар ҳамкории байниминтақавӣ иқтидори бузурги истифоданашуда ва кашфношуда низ вуҷуд доранд. Таваҷҷуҳи афзояндаи субъектҳои Федератсияи Русия ба густариши ҳамкорӣ бо минтақаҳои Тоҷикистон далели ин гуфтаҳост», — тазаккур дод Раиси Шӯрои Федератсияи Русия.

Валентина  Матвиенко ба роҳбарони минтақаҳои ширкаткунандаи ҳамоиши байниминтақавӣ изҳори сипос намуда, хостори он гардид, ки назорат аз болои иҷрои созишномаҳои дуҷониба бо минтақаҳои Тоҷикистон пурзӯр карда шавад, «то ки онҳо танҳо асноди расмӣ набошанд, балки бо мазмуни мушаххас ҳам дар самти ҳамкории иқтисодӣ ва ҳам дар самти фарҳангию гуманитарӣ пур карда шаванд».

АКС: АМИТ «Ховар»