Дар вилояти Суғд бахшида ба ҷашни Наврӯз мусобиқаҳои миллии пойга ва бузкашӣ доир гардиданд

Март 24, 2022 11:32

ДУШАНБЕ,  24.03.2022 /АМИТ «Ховар»/.  Бахшида ба ҷашни байналмилалии Наврӯз дар ипподроми Ҷамъияти саҳҳомии ба номи Абдураҳим Ҷумъаеви ноҳияи Бобоҷон Ғафурови вилояти Суғд мусобиқаҳои миллии пойга ва бузкашӣ гузаронида шуданд. Дар ин бора АМИТ  «Ховар» бо истинод ба Хадамоти матбуоти Раиси вилояти Суғд хабар медиҳад.

Раиси вилояти Суғд Раҷаббой Аҳмадзода зимни суханронии худ дар маросими ҷамъбасти мусобиқаҳо иброз дошт, ки дар доираи чорабиниҳои наврӯзӣ ҳар сол бо мақсади эҳёи анъанаҳои миллӣ​ ва рушди соҳаи асппарварӣ ташкил ва баргузор гардидани бозиҳои миллии пойга ва бузкашӣ ба ҳукми анъана даромадааст.​

Таъкид карда шуд, ки дар вилоят ҷиҳати рушди минбаъдаи соҳаи чорвопарварӣ, аз ҷумла соҳаи асппарварӣ, қарори Раиси вилоят ва Барномаи маҷмӯавии рушди соҳаи чорвопарварӣ қабул гардида, ҳамасола афзун намудани саршумори аспҳои зотӣ амалӣ карда мешавад.​

Тибқи маълумоти оморӣ, ба ҳолати 1 марти соли 2022 дар ҳамаи шаклҳои хоҷагидории вилоят 8811 сар асп парвариш карда мешавад, ки аз он 2071 сар дар бахши кишоварзӣ ва 6740 сар дар бахши хоҷагиҳои аҳолӣ мебошад.​

Ҷиҳати рушди варзиши аспӣ дар вилоят мактаби варзиши аспии чавгон фаъолият дошта, дар он 100 нафар варзишгарон бо 60 сар аспҳои зотӣ сарҷамъ гардидаанд.

Ҳамчунин дар ҳудуди вилоят ассотсиатсияҳои асппаварӣ ташкил гардида, дӯстдорони табиат парвариши аспҳои зотии тоҷикӣ, англисӣ ва ахалтекиникиро ба роҳ мондаанд ва баробари мусобиқаҳои вилоятӣ дар мусобиқаҳои ҷумҳуриявию байналхалқӣ иштироки фаъолона доранд.​

Сипас ғолибони мусобиқаҳои пойга ва бузкашӣ бо туҳфаҳои хотиравӣ, аз ҷумла ду автомобол, телевизору қолин ва мукофотпулӣ сарфароз гардонда шуданд.

 

АКСҲО: Хадамоти матбуоти Раиси в. Суғд

Март 24, 2022 11:32

Хабарҳои дигари ин бахш

Шоҳҷоизаи Синамоҷашнвораи дуюми байналмилалии «Тоҷи Сомон»-ро коргардони тоҷик Муҳиддин Музаффар соҳиб шуд
«КИТОБИ ДУШАНБЕ». Пагоҳ дар Душанбе намоиши сенздаҳуми байналмилалӣ оғоз мегардад
Эмомалӣ Раҳмон: «Таҷлили Меҳргон далели эҳтиром ба фарҳанги қадима ва суннатҳои созандаи миллати тоҷик аст»
Имрӯз дар Фестивали «Оши палов» намудҳои гуногуни ин таоми миллӣ омода карда шуданд
СЕБҲОИ ТОҶИКИСТОН БО ТАМЪИ ЛАЗИЗАШОН МАШҲУРАНД. Дар Душанбе Иди себ ва ангур таҷлил гардид
Дар Душанбе Иди Меҳргон ба таври тантанавӣ таҷлил гардид
Имрӯз ҷашни Меҳргон бо баргузории Фестивал-намоиши маҳсулот ва техникаи кишоварзӣ оғоз мегардад
Даври ҷамъбастии Фестивал-озмуни ҷумҳуриявии телевизионии эҷодиёти халқ «Андалеб-2025» баргузор мегардад
Сокинони ноҳияи Муъминобод соҳиби туҳфаи арзишманди Пешвои миллат — «Шоҳнома» мегарданд
МЕҲРГОН ОМАД, МУБОРАК, МЕҲРГОН ОМАД! Пагоҳ дар Душанбе Иди Меҳргон бо шукуҳу шаҳомати хосса таҷлил мегардад
СИТОРАИ ТОБНОК ДАР САМОИ СИНАМО. Офаридаҳои баландмазмун ба Бахтиёр Худойназаров шуҳрати ҷаҳонӣ бахшид
Коргардон Аҳмад Аминӣ: «Эрониҳо Тоҷикистонро дӯст медоранду орзуи тамошои манзараҳои нотакрори онро доранд»