Имрӯз дар саросари дунё Рӯзи Замин таҷлил мегардад

ДУШАНБЕ, 20.03.2022 /АМИТ «Ховар»/. Ҳамасола дар саросари дунё 20 март Рӯзи Замин таҷлил карда мешавад. 20 март интихоб гардидани Рӯзи Замин ба баробар шудани шабу рӯз дар ин рӯз марбут аст. Рӯзи Замин ба ҷашни аҷдодии мо — Наврӯзи хуҷастапай, ки ҷашни байналмилалӣ эълон гардидааст, рост меояд. Мақсади эълон намудани Рӯзи Замин ҷалб намудани таваҷҷуҳи сайёра ба тозаю озода нигоҳ доштан ва ҳифзи он мебошад.

Таҷлили Рӯзи Замин тадбири бузурги байналмилалӣ буда, таваҷҷуҳи аҳли башарро ба он равона месозад, ки ҳар сокини сайёра вазифадор аст нисбат ба он  ғамхорӣ намояд ва ҳар гӯшаи ин сайёраро барои наслҳои оянда тозаю озода ба мерос гузорад.

Дар байни чорабиниҳои оммавӣ дар бахши ҳифз ва беҳдошти муҳити зист, ки дар ин рӯз дар гӯшаҳои гуногуни сайёра баргузор мешаванд- ин намоишу фестивалҳои экологӣ, марафонҳо ва конфронсҳо дар бораи табиат, рубӯчини кӯчаҳо, шинонидани дарахтҳо ва қатъи ҳаракати нақлиёт дар кӯчаҳои серодами шаҳрҳои калон, ҷамъомадҳои фарҳангӣ ва консертҳо мебошанд.

Ёдовар мешавем, ки соли 1971 аз ҷониби Котиби генералии Созмони Милали Муттаҳид Рӯзи Замин  расман эълон шуд.

Тибқи анъана, дар ин рӯз «Зангӯлаи сулҳ» садо медиҳад. Ташаббуси нахустин оид ба таҷлили Рӯзи Замин ҳанӯз соли 1840 аз тарафи ходими ҷамъиятии амрикоӣ Ҷон Мортон пешниҳод гардида,  маъракаи шинонидани ниҳолу буттаҳо бо фарорасии фасли баҳор ва барномаи муносибати оқилона ба муҳити зист аз ҷониби ӯ таҳия гардида буд.

АКС: манбаъҳои боз