Корхонаи «Хизматрасонии шиносномадиҳӣ ва раводид»-и ВКД-и Русия пешниҳод кард, ки дар Тоҷикистон филиали он кушода шавад

ДУШАНБЕ, 28.03.2022. /АМИТ «Ховар»/. Кушодани филиали Корхонаи воҳиди федералии «Хизматрасонии шиносномадиҳӣ ва раводид»-и Вазорати корҳои дохилии Федератсияи Русия дар Тоҷикистон имкон фароҳам меорад, ки 80 фисади коргузорӣ зимни таҳияи бастаи ҳуҷҷатҳо пеш аз оғози сафар ба роҳ монда шавад. Баъди ворид гардидан ба қаламрави Федератсияи Русия шаҳрвандони Тоҷикистон — муҳоҷирони меҳнатӣ аллакай соҳиби иҷозатномаи фаъолияти меҳнатӣ буда, метавонанд ҳамон замон ба фаъолияти меҳнатӣ шурӯъ намоянд. Ҳамзамон шаҳрвандон имконият пайдо мекунанд, ки пеш аз сафар аз ташхиси тиббӣ гузашта, бо шароити кории корфармо, қарордоди меҳнатӣ, музди меҳнати худ огоҳ гарданд ва пас аз муайян намудан бе миёнарав, бо музди меҳнати нисбатан зиёдтар ба кишвари қабулкунандаи қувваи корӣ сафар намоянд.

Ин пешниҳодро муовини якуми директори Корхонаи воҳиди федералии «Хизматрасонии шиносномадиҳӣ ва раводид»-и Вазорати корҳои дохилии Федератсияи Русия Сергей Куликов зимни мулоқот бо муовини Вазири меҳнат, муҳоҷират ва шуғли аҳолии Ҷумҳурии Тоҷикистон Шаҳноза Нодирӣ баён кард, хабар дод ба АМИТ «Ховар» масъули бахши матбуоти Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират Салимзода Каримҷон.

Сергей Куликов дар мулоқоти мазкур ҳамчунин  изҳор дошт, ки дар ҳолати ҷонибдорӣ гардидани пешниҳод вобаста ба содда гардонидани ҷараёни ҳуҷҷатгузорӣ ва фаъолияти меҳнатӣ, омодаанд, ки бо гурӯҳи кории  КВД «Хизматрасонии шиносномадиҳӣ ва раводид» -и ВКД  Федератсияи Русия ба Ҷумҳурии Тоҷикистон сафар намояд.

Ёдовар мешавем, ки аз 14 то 18 марти соли равон  дар шаҳри Санкт – Петербурги Федератсияи Русия VI – умин Форуми байналмилалии меҳнат доир гардид, ки дар он муовини Вазири меҳнат, муҳоҷират ва шуғли аҳолии Ҷумҳурии Тоҷикистон Шаҳноза Нодирӣ, роҳбари Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират Зоҳир Мирзозода  иштирок ва суханронӣ намуданд.

Хотиррасон мешавем, ки  дар доираи сафарӣ корӣ ба шаҳри Санкт – Петербург муовини Вазири меҳнат, муҳоҷират ва шуғли аҳолии Ҷумҳурии Тоҷикистон Шаҳноза Нодирӣ 18 март бо мақсади шиносоӣ бо ҷараёни ҳуҷҷатгузории муҳоҷирони меҳнатӣ бо муовини якуми директори Корхонаи воҳиди федералии «Хизматрасонии шиносномадиҳӣ ва раводид»-и Вазорати корҳои дохилии Федератсияи Русия Сергей Куликов мулоқот намуд. Дар мулоқот ҳамчунин роҳбари Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират Зоҳир Мирзозода, муовинони директори Корхонаи воҳиди федералии «Хизматрасонии шиносномадиҳӣ ва раводид»-и Вазорати корҳои дохилии Федератсияи Русия Сергей Богданов, муовини сардори Раёсати ВКД дар шаҳри Санкт – Петербург ва вилояти Ленинград оид ба муҳоҷират Галина Безимянная иштирок намуданд.

Иттилоъ дода шуд, ки Корхонаи воҳиди федералии «Хизматрасонии шиносномадиҳӣ ва раводид»-и Вазорати корҳои дохилии Федератсияи Русия  бо таҳияи банду басти ҳуҷҷатҳои муҳоҷиратӣ, гузариш аз ташхиси тиббӣ, супоридани изи ангушт, хизматрасонии иттилоотӣ ва машваратӣ оид ба масъалаҳои вуруд, будубош, таҳия ва қабули аризаҳо ҷиҳати бақайдгирии муҳоҷиратӣ, иҷозатномаи фаъолияти меҳнатӣ (патент), ки мақомоти ҳудудии Вазорати корҳои дохилии Русия пешниҳод менамояд, машғул буда, дар баробари шаҳрҳои Москва ва Санкт-Петербург дар 57 минтақаи Федератсия Русия филиалҳои худро дошта, дар филиали шаҳри Санкт – Петербург ва вилояти Ленинград дар як рӯз имконияти қабули беш аз 1500 нафар шаҳрванди хориҷиро дорад. Инчунин корхонаи мазкур  дар доираи созишномаҳои дуҷониба бо як қатор кишваҳори узви ИДМ намояндагиҳои худро  дар хориҷи кишвар низ таъсис дода, ба шаҳрвандони хориҷӣ  иҷозатномаи фаъолияти меҳнатӣ дар Федератсия Русияро  медиҳад.

Зимни  ин вохӯрӣ тарафҳо  маҷмуи масъалаҳои муҳоҷиратиро дар Федератсияи Русия, алалхусус дар шаҳри Санкт – Петербург ва вилояти Ленинград мавриди муҳокима қарор дода, вобаста ба расонидани машваратҳои ҳуқуқӣ, мусоидат ба омоданамоии ҳуҷҷатҳои қонунӣ, таҳияи бастаи ҳуҷҷатҳо барои дарёфти иҷозатномаи фаъолияти меҳнатӣ (патент), содданамоии ҳуҷҷатҳо барои муайяннамоии ҳолати саломатӣ,  ваъзи ҳуқуқии муҳоҷирони меҳнатӣ ва дигар масъалаҳои муҳим мубодилаи афкор карданд.

Зикр гардид, ки тибқи тағийрот ба қонунгузории муҳоҷиратӣ пас аз гузаштани ташхиси изи ангуштон ба муҳоҷирони меҳнатӣ шаҳодатномаи изи ангушт дода мешавад, ки муҳлати амали он 10 сол мебошад.

Аз ҷониби ҳайати Вазорати меҳнат, муҳоҷират ва шуғли аҳолии Ҷумҳурии Тоҷикистон низ масъалаи пешниҳод намудани бастаи ҳуҷҷатҳо барои дарёфти иҷозатномаи фаъолияти меҳнатӣ бо ҷониби Федератсияи Русия мавриди баррасӣ қарор гирифта, таклифу пешниҳодҳои муфид  баён гардиданд. Аз ҷумла, пешниҳод шуд, ки гузаштан аз ташхиси изи ангушт, ки барои дарёфти патент лозим аст, дар мадди аввал гузаронида шавад. Ин талабот имкон медиҳад, ки вобаста ба ваъзи ҳуқуқии муҳоҷири меҳнатӣ маълумоти умумӣ пайдо мегардад ва барои пешгирии  хароҷоти маблағҳои зиёдатӣ аз ҷониби муҳоҷири меҳнатӣ мусоидат менамояд.

АКС: Намояндагии Вазорати меҳнат, муҳоҷират ва шуғли аҳолии ҶТ дар ФР оид ба муҳоҷират