Донишгоҳҳои Тоҷикистон ва Русия барои донишҷӯён барномаҳои шабакавӣ таҳия мекунанд

ДУШАНБЕ, 05.04.2022 /АМИТ «Ховар»/. Муассисаҳои таълимии Тоҷикистон дар якҷоягӣ бо донишгоҳҳои бузурги Русия барномаҳои шабакавии омӯзишии омӯзгорону донишҷӯёнро таҳия хоҳанд кард. Курсҳои замонавӣ ҳам ба довталаб ва ҳам ба магистр барои амиқтар кардани дониш ва ҳамчун мутахассиси ҷавобгӯ ба талаботи бозори меҳнат ёрӣ мерасонанд. Дар ин бора дафтари матбуоти Донишгоҳи давлатии Псков (ПсковГУ) хабар додааст.

Чунин барномаҳо барои хатмкунандагони мактабҳо ва донишкадаҳои олии ҷумҳурӣ пешниҳод карда мешаванд. Донишҷӯёни тоҷик метавонанд дар Донишгоҳи давлатии Псков аз рӯи барномаҳои бакалаврӣ ва магистратура таҳсил кунанд.

«Ҳайати Донишгоҳи давлатии Псков бо ҳамкасбони тоҷикистониашон дар мавриди табодули мутақобилаи донишҷӯён ва эҷоди барномаҳои шабакавии муштарак ба мувофиқа расиданд», — омадааст дар варақаи иттилоотии донишгоҳ.

Илова бар ин, зимни гуфтушунид ҷонибҳо оид ба табодули мутақобилаи донишҷӯёну омӯзгорон, инчунин иштирок дар конфронсҳои байналмилалии илмию амалии олимони ҳарду кишвар ба мувофиқа расиданд.

Донишгоҳҳои Тоҷикистон ва Донишгоҳи давлатии Псков ваъда додаанд, ки барои такмили ихтисоси омӯзгорони тоҷик тарҳҳои муштарак роҳандозӣ мекунанд. Тавре АМИТ «Ховар» хабар дод, қаблан раиси Кумитаи Шӯрои Федератсияи Маҷлиси Федералии Федератсияи Русия оид ба илм, маориф ва фарҳанг Лилия Гумерова гуфта буд, ки Русия шумораи квотаҳои донишҷӯёни тоҷикро аз 750 то ба 950 ҷой афзоиш додааст.

Ин ба муҳоҷирон имкон медиҳад, ки забон омӯзанд ва ба ҷои иҷрои корҳои паст соҳиби ихтисос шаванд. Ин масъала аллакай дар чаҳорчӯби Форуми байнипарлумонии Русия ва Тоҷикистон оид ба ҳамкории байниминтақавӣ, ки 24-25 феврал дар Душанбе баргузор шуд, баррасӣ гардид.

АКС: Хадамоти матбуоти Донишгоҳи давлатии Псков