Пешвои миллат Эмомалӣ Раҳмон даъват намуданд, ки бо истифода аз рӯзҳои мусоиди баҳорӣ кишти зироат ва дигар корҳои саҳроӣ вусъат бахшида шаванд
ДУШАНБЕ, 01.04.2022 /АМИТ «Ховар»/. Имрӯз Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи паёми шодбошӣ ба муносибати фарорасии моҳи шарифи Рамазон даъват намуданд, ки бо истифода аз рӯзҳои мусоиди баҳорӣ кишти зироат ва дигар корҳои саҳроӣ вусъат бахшида шаванд, хабар медиҳад АМИТ «Ховар».
«Моҳи Рамазони имсола ба давраи оғози кишту кори баҳорӣ рост омад. Яъне мо бояд ҳар рӯзи мусоиди баҳорро самаранок истифода карда, кишти зироат ва дигар корҳои кишоварзиро вусъат бахшем», — тазаккур доданд Сарвари давлат.
Ба таъкиди Президенти мамлакат, дар шароити имрӯза тамоми кишоварзон ва ҳар оила бояд ба истифодаи оқилонаву самараноки замин, аз ҷумла заминҳои наздиҳавлигиву президентӣ, дар заминҳои обӣ ҳатман ба роҳ мондани кишти такрорӣ, ки манфиату самаранокии ин амал солҳои охир дар фаровонии бозори истеъмолӣ равшан дида мешавад, диққати аввалиндараҷа диҳанд.
«Мо барои афзоиш додани истеҳсоли маҳсулоти кишоварзӣ тамоми имконияти зарурӣ – обу замин, таҷриба, деҳқонони асил ва мардуми заҳматқарин дорем, — зикр карданд Пешвои миллат. — Зарур аст, ки аз ин имконият дурусту оқилона истифода барем, то ягон ваҷаб замин холӣ намонад ва барои рӯёнидани ҳосил истифода карда шавад».
Сарвари давлат хотирнишон намуданд, ки ин талаби замона ва тақозои рӯз мебошад.
Эмомалӣ Раҳмон тазаккур доданд, ки бояд ҳар рӯзи баҳорро ғанимат дониста, кишти зироат сари вақт анҷом дода шавад, барои ҳосили фаровон замина гузошта шавад ва масъалаи захираи дусолаи маводи ғизоиро дар ҳар оила, ки мардум манфиати онро солҳои охир, бахусус, дар ду соли вазнини паҳншавии бемории сироятии коронавирус диданд, фаромӯш нашавад.
«Мо, аллакай, имрӯз бояд дар фикри он бошем, ки фарзандон ва аҳли хонадони мо ва умуман сокинони кишвар ба мушкилӣ дучор нагарданд ва аз камчинии маводи ғизоӣ ё болоравии нархи он, хусусан дар мавсими тирамоҳу зимистони дарпешистода азияту муҳтоҷӣ накашанд, — изҳор доштанд Президенти мамлакат. — Мо бояд чи дар моҳи Рамазон ва чи дар моҳҳои дигар софдилонаву аҳлона заҳмат кашем, ба хотири осоиши фарзандон, аҳли оилаи худ, ҳар як хонадони мамлакат ва ҳифзи амнияти озуқавории кишвар ҳарчи бештар маҳсулот истеҳсол намоем, барои ҳамватанонамон ҷойҳои нави корӣ таъсис диҳем ва корҳои ободониву созандагиро тибқи ҳадафҳои муайянкардаамон беш аз пеш густаришу вусъат бахшем».
АКС: Хадамоти матбуоти Президенти ҶТ/АМИТ «Ховар»
15 МАЙ- РӮЗИ ҶАҲОНИИ ИҚЛИМ. Тағйирёбии иқлим аз ҷомеаи ҷаҳон ҳамкории устувор ва дурандешӣ тақозо менамояд
МАВҚЕЪГИРИИ СИЁСӢ ВА АРЗЁБИИ МУШКИЛОТИ ИМРӮЗ. Андешаҳо дар ҳошияи суханронии Президенти Тоҷикистон дар мулоқот бо фаъолону намояндагони ҷомеа ва ходимони дин
Владимир Путин ба Эмомалӣ Раҳмон: Ҳеҷ неруе наметавонад муносибатҳои бародаронаи мардумони ду давлатро халалдор намояд
Маҷлиси Ҳукумати Ҷумҳурии Тоҷикистон баргузор гардид
Чанд андеша дар ҳошияи сафари расмии Президенти Тоҷикистон муҳтарам Эмомалӣ Раҳмон ба Аврупо
ШАРИКИИ СТРАТЕГӢ ТАҚВИЯТ МЕЁБАД. Яке аз самтҳои муҳиму афзалиятноки сиёсати хориҷии Тоҷикистонро ҳамсоягии нек бо давлатҳои минтақа ташкил медиҳад
Шавкат Мирзиёев: «Узбекистон минбаъд низ кӯшишҳои самимонаи мардуми шарафманд ва меҳнатдӯсти тоҷикро дастгирӣ менамояд»
Шавкат Мирзиёев: «Узбекистон минбаъд низ дар паҳлуи Тоҷикистон меистад»
ТАШАККУЛИ МАКТАБИ ЗЕҲНГАРОЁНАИ ИДОРАКУНӢ ДАР СИЁСАТИ ҶУМҲУРИИ ТОҶИКИСТОН. Мулоҳизаҳои докторони илми фалсафа Хайриддин Усмонзода ва Саидмурод Фаттоҳзода
Президенти Тоҷикистон: «Сарфакорона истифода бурдани обу неруи барқро дар тамоми фаслҳои сол, ҳатто дар тобистон қатъиян таъмин намоем»
Президенти Тоҷикистон: «Бояд ҳамеша сарҷамъ ва дар зери парчами миллиамон муттаҳид бошем»
ХАЙРУ САДАҚОТ – СУННАТИ НЕК. Андешаҳои вакили Маҷлиси намояндагон Файзулло Баротзода дар ин мавзуъ
