Дар Душанбе масъалаи густариши равобити Маҷлиси намояндагон бо ниҳодҳои тобеи СММ баррасӣ шуд
![](https://khovar.tj/wp-content/uploads/2022/06/Dilrabo-Mansuri.jpg)
ДУШАНБЕ, 13.06.2022 /АМИТ «Ховар»/. Имрӯз муовини Раиси Маҷлиси намояндагони Маҷлиси Олии Ҷумҳурии Тоҷикистон Дилрабо Мансурӣ бо сардори Раёсати Комиссари Олии Созмони Миллаи Муттаҳид (СММ) оид бапаноҳандагон Мулугета Зевди мулоқот намуд.
Тавре котиби матбуоти Маҷлиси намояндагон Муҳаммадато Султонов ба АМИТ «Ховар» хабар дод, дар ҷараёни ин мулоқот масъалаҳои густариши равобити Тоҷикистон, бахусус Маҷлиси намояндагон бо тамоми ниҳодҳои тобеи СММ мавриди баррасӣ қарор гирифтанд.
Дилрабо Мансурӣ дар арафаи Рӯзи Ваҳдати миллӣ аз саҳми СММ дар барқароркунии сулҳу субот миёни тоҷикон ёдовар шуда, иброз дошт, ки ин созмони байналмилалӣ дар ҳалли тамоми масъалаҳои доғи ҷомеаи ҷаҳонӣ нақши арзанда мегузорад. Вай талошҳои ниҳодҳои тобеи СММ-ро дар ҳалли масъалаҳои ихтилофангез миёни кишварҳои минтақа ва ҷаҳон муассир маънидод кард.
Мулугета Зевди ибрози умедворӣ кард, ки раёсати Дилрабо Мансурӣ дар ин мақоми олии қонунгузори Тоҷикистон заминаи мусоиде барои тақвияти ҳамкории Тоҷикистон бо ҳамаи бахшҳои СММ ба вуҷуд хоҳад овард.
Акс: МН МО ҶТ