Кӯдакону наврасон аз оилаҳои ниёзманд ва мактаб-интернатҳои ҷумҳуриявӣ ба лагери истироҳатии беруназшаҳрӣ сафарбар гардиданд

Июнь 16, 2022 15:56

ДУШАНБЕ, 16.06.2022 /АМИТ «Ховар»/. Субҳи имрӯз дар назди Федератсияи иттифоқҳои касабаи мустақили Тоҷикистон маросими сафарбар намудани кӯдакону наврасон ба лагерҳои истироҳатии беруназшаҳрӣ баргузор гардид. Кӯдакону наврасон аз мактаб-интернатҳои ҷумҳуриявии ноҳияҳои Шамсиддин Шоҳин ва Ҷалолиддин Балхӣ ва оилаҳои камбизоати корхонаю муассисаҳои давлатӣ, аз ҷумла соҳаҳои сохтмон, бофандагӣ ва хоҷагиҳои коммуналӣ ба лагери истироҳатии “Ширкент”-и шаҳри Турсунзода фиристода шуданд. Дар ин бора ба АМИТ “Ховар” дар ФИКМТ иттилоъ доданд.

Дар истироҳатгоҳи мазкур барои қабули онҳо тамоми шароитҳои зарурӣ муҳайё шудаанд. Қабл аз ҳама, корҳои таъмир, муҷаҳҳазгардонии биноҳо, майдончаҳои варзишӣ ва ҳавзҳои шиноварӣ ба анҷом расонида шуда, ба меъёрҳои муқаррарнамудаи мақомоти ваколатдори назорати давлатии санитарию эпидемиологӣ ва бехатарӣ аз сӯхтор ҷавобгӯ мебошанд.

Дар назди ҳозирин Раиси Федератсияи иттифоқҳои касабаи мустақили Тоҷикистон Маликшо Неъматзода иброз намуд, ки ғамхорӣ нисбат ба қишрҳои ниёзманди аҳолӣ, бахусус кӯдакон ва наврасон яке аз масъалаҳои асосии сиёсати иҷтимоии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маҳсуб меёбад.

«Дастуру супоришҳои Пешвои миллат муҳтарам Эмомалӣ Раҳмонро вобаста ба тарбияи кӯдакону наврасон дар рӯҳияи ватандӯстӣ, хештаншиносӣ, беҳсозии солимии ҷомеа ба роҳбарӣ гирифта, Федератсияи иттифоқҳои касабаи мустақили Тоҷикистон Қарори Ҳукумати Ҷумҳурии Тоҷикистон аз 27 апрели соли 2022 “Дар бораи ташкили истироҳати тобистонаи кӯдакон ва наврасон дар соли 2022”-ро мавриди иҷро қарор дода, корҳои омодагиро дар ин самт муваффақона пеш мебарад», — афзуд номбурда.

Мувофиқи маълумотҳои дастрасгардида, аз ташкилотҳои ҳамузви Федератсия имсол 50 лагери беруназшаҳрӣ ҷиҳати қабули кўдакону наврасон дар мавсими тобистони соли равон изҳори омодагӣ намуданд. Аз ҷумла дар ВМКБ 7 лагер, вилояти Суғд-19, вилояти Хатлон — 7 ва дар ноҳияҳои тобеи ҷумҳурӣ 17 лагер барои қабули кӯдакону наврасон омода мебошанд.

Аз маълумоти пешакии ташкилотҳои ҳамузви Федератсия, мавсими соли 2022 дар истироҳатгоҳҳои беруназшаҳрии “Сағирдашт”-и ноҳияи Дарвоз, “Зинг”-и ноҳияи Ванҷ, Литсейи касбӣ-техникии “Насими Ғунд”, “Саодат”, “Чашмасорон”-и ноҳияи Шуғнон, “Гармчашма”-и ноҳияи Ишкошими ВМКБ, «ҶДММ Шоҳин»-и шаҳри Гулистон, “Чароғак”-и шаҳри Гулистон, ”Офтобак”, “Оташак”, ”Гагарин”-и шаҳри Исфара, “Парасту”-и шаҳри Конибодом, МС «Суғд»-и ноҳияи Б. Ғафуров, “Чиларча”-и шаҳри Панҷакент, “Парасту”, “Чашма”,”Эделвейс”-и ноҳияи Шаҳристон “-и вилояти Суғд, “Шарора”-и ноҳияи Мўъминобод, “Офтобак”-и шаҳри Норак, “Шифобахш”-и ноҳияи Вахш, “Насими Фархор”-и ноҳияи Фархор, “Оби шифо”-и ноҳияи Темурмалики вилояти Хатлон, ФСК “Ширкент”-и Кумитаи иттифоқи касабаи ҶСК “Ширкати алюминийи тоҷик”-и КМ иттифоқи касабаи “Тоҷикметалл”, “Файзи истиқлол”-и кумитаи ҷумҳуриявии иттифоқи касабаи кормандони маориф ва илми Тоҷикистон, “Лира”-и кормандони фарҳанг, “Обшорон”-и комплекси агросаноатӣ, “Барқчиён”-и кормандони энергектика, истироҳатгоҳи “Истиқлол”-и кормандони соҳаи алоқа, «Чангоб»-и МИҲД шаҳри Ҳисор ва дигар мавзеҳои истироҳатӣ (истироҳатгоҳҳои наздимактабӣ,меҳнатӣ-истироҳатӣ,фароғатӣ-таълимӣ, истироҳатгоҳҳои наздиинтернатӣ) кӯдакону наврасон ба истироҳату солимгардонӣ фаро гирифта мешаванд.

Акс: ФИКМТ

Июнь 16, 2022 15:56

Хабарҳои дигари ин бахш

Дар Тоҷикистон маъракаи иммунизатсия бар зидди вируси папилломаи одам оғоз мегардад
Дурнамои ҳамкории Тоҷикистон ва Туркия дар самти меҳнат ва шуғли аҳолӣ баррасӣ гардид
Вобаста ба баланд бардоштани тавонмандсозӣ барои самаранокии идораи давлатӣ ҳамоиш доир шуд
«ЗАНОН ДАР ИҚТИСОДИ «САБЗ» ВА РАҚАМӢ». Дар шаҳри Гулистон Форуми минтақавии Муколамаи занони Осиёи Марказӣ доир шуд
Беш аз 80 ҳазор нафақагирони шаҳри Душанбе аз индексатсия баҳраманд шуданд
Озмуни ҷумҳуриявии нонпазии «Зеби дастархон» ҷамъбаст шуд
Намояндаи Тоҷикистон дар Форуми байналмилалӣ оид ба таҷрибаи Тоҷикистон дар омӯзиши бозори меҳнат сухан гуфт
Раиси Шурои уламои Тоҷикистон бо медали фахрии Анҷумани роҳбарони динҳои ҷаҳонӣ ва суннатӣ сарфароз гардонида шуд
Дар Суғд Форуми Муколамаи занони Осиёи Марказӣ баргузор мешавад
МАСЛИҲАТИ МУТАХАССИС. Хӯрдани анҷир хавфи бемории дилро кам менамояд
35-СОЛАГИИ ИСТИҚЛОЛИ ДАВЛАТӢ. Барои кормандони соҳаи ҳифзи муҳити зист 4 бинои маъмурӣ ба истифода дода мешавад
Истеъмоли хурмо узви босираро мустаҳкам намуда, пеш аз муҳлат пиршавии баданро пешгирӣ менамояд