ТОҶИКИСТОН ДАР ШАРОИТИ ДОИМАФЗОЯНДАИ АҲОЛӢ БОЗОРИ ДОХИЛИРО ЧӢ ТАВР МЕТАВОНАД БО МАҲСУЛОТ ТАЪМИН НАМОЯД? Ба ин саволи хабарнигори АМИТ «Ховар» Вазири кишоварзии мамлакат посух дод

ДУШАНБЕ, 13.07.2022 /АМИТ «Ховар»/. Шумораи аҳолии Тоҷикистон сол то сол афзоиш меёбад. Табиист, ки бо зиёд шудани аҳолии мамлакат талабот ба маҳсулоти истеъмолӣ низ зиёд мегардад. Вазорати кишоварзии мамлакат барои таъмини амнияти озуқаворӣ кадом тадбирҳоро меандешад?

Ба ин саволи хабарнигори АМИТ «Ховар» Фирӯза Давлатзода Вазири кишоварзии мамлакат Саъдӣ Каримзода имрўз зимни нишасти матбуотӣ чунин посух дод: «Барои таъмини амнияти озуқаворӣ, пеш аз ҳама майдони кишт ва ҳосилнокиро зиёд намудан лозим аст. Аммо дар шароити Тоҷикистон, ки асосан аз кӯҳсор иборат аст, наметавонем майдони киштро зиёд намоем. Аз ин рў, баҳри ҳосилнокии баланди зироатҳо тадбирҳои муассир меандешем. Дар ин самт Вазорати кишварзӣ як қатор тадбирҳоро амалӣ намуда истодааст. Ворид намудани тухми элитаи картошка ва гандум аз хориҷӣ кишвар аз ҷумлаи ин тадбирҳо мебошад. Ҳамчунин бо ин мақсад лоиҳаи нав аз ҷониби Бонки Умумиҷаҳонӣ амалӣ гардида истодааст».

Дар нишаст гуфта шуд, ки Бонки умумиҷаҳонӣ маблағи грантиро дар ҳаҷми 58 миллион доллари ИМА барои татбиқи Лоиҳаи таҳкими устувории соҳаи кишоварзӣ дар Тоҷикистон тасдиқ намуд. Лоиҳа барои ба тағйирёбии иқлим бештар тобовар ва устувор намудани соҳаи кишоварзӣ, ки асоси иқтисодиёт ва манбаи даромади аҳолии кишвар мебошад, мусоидат хоҳад кард. Ҳамчунин Лоиҳа рушди шабакаи тухмиҳои навъҳои тобовар, ниҳолҳо ва маводҳои кӯчатро барои бо миқдор ва сифати зарурӣ бо онҳо таъмин намудани хоҷагиҳо дастгирӣ мекунад. Сармоягузорӣ ба технологияҳои истеҳсол ҷиҳати баланд бардоштани истеҳсолот ва маҳсулнокӣ муҳим аст. Он ба таъмини амнияти озуқаворӣ, самаранок истифода бурдани дигар захираҳо, ба монанди об, нуриҳо ва доруҳои зидди ҳашарот мусоидат кӯмак хоҳад намуд.

«Ҳамчунин барои таъмини аҳолии мамлакат бо маҳсулоти кишоварзӣ истифода намудани заминҳои корами обӣ ва гирифтани 2-3 ҳосил аз онҳо яке аз ҳадафҳои имрӯзаи Ҳукумати мамлакат ва кишоварзон мебошад. Дар хоҷагиҳои деҳқонӣ ва ҷамоавӣ, тибқи маълумоти оморӣ ба ҳолати 1 июли соли равон, дар майдони 70443 гектар кишти такрории зироатҳои кишоварзӣ гузарониданд, ки нисбат ба ҳамин давраи соли гузашта 7948 гектар ё 12,7 фоиз зиёд буда, ба 73,4 фоизи дурнамо баробар мебошад»,- гуфт Саъдӣ Каримзода.

Тибқи тавсияи олимони соҳаи кишоварзии мамлакат, таъмини нуриҳои минералӣ ба зиёд шудани маҳсулоти кишовразӣ таъсир мерасонад. Аммо Вазорати кишовразии мамлакат иттилоъ дод, ки дар шашмоҳи соли равон тақрибан 39 ҳазор тонна нуриҳои минералӣ кам ба кишвар ворид карда шудаанд.

Ба гуфтаи Саъдӣ Каримзода, дар шашмоҳи соли равон 104 ҳазор тонна нуриҳои минералӣ ба маблағи 35 млн доллар ворид гардид, ки ин рақам дар соли гузашта 143 ҳазор тоннаро ташкил медод.

«Кам ворид гардидани нуриҳои минералӣ аз болоравии арзиши он дар соли равон вобаста буд. Зеро арзиши истеҳсоли худи нуриҳо боло равтааст. Камчинии нуриҳои минералӣ ба камҳосилӣ оварда мерасонад. Аз ин рӯ, кишовразони мамлакат дар ин шабу рӯз кӯшиш доранд аз нуриҳои органикӣ ва нуриҳои маҷмуавӣ, ки ба таври моеъ истеҳсол мешаванд, истифода намоянд»- илова кард Вазири кишоварзии мамлакат.

Ҳамчунин дар ҷараёни нишасти матбуотӣ зикр шд, ки дар шаш моҳи аввали соли равон аз ҷумҳурӣ ба дигар давлатҳо 113,6 ҳазор тонна маҳсулоти кишоварзӣ ба маблағи 26,2 млн доллари ИМА содирот карда шудааст, ки нисбат ба ҳамин давраи соли гузашта аз рўи ҳаҷм 7,6 ҳазор тонна ё 6,9 фоиз зиёд мебошад.

Фирӯза ДАВЛАТЗОДА,
АМИТ «Ховар»

АКС АМИТ «Ховар