«Нақши Конститутсия дар бунёди ҷомеаи шаҳрвандӣ». Дар Душанбе таҳти чунин унвон ҳамоиш доир гардид

ДУШАНБЕ, 04.11.2022. /АМИТ «Ховар»/. 3 ноябр дар Суди шаҳри Душанбе бахшида ба 28-солагии қабули Конститутсияи Ҷумҳурии Тоҷикистон таҳти унвони «Нақши Конститутсия дар бунёди ҷомеаи шаҳрвандӣ» ҳамоиш баргузор гардид. Дар ин бора ба мухбири АМИТ “Ховар” дар Суди мазкур хабар доданд.

Дар ҳамоиш Раиси Суди шаҳри Душанбе Мирзо Гиёзода зикр намуд, ки «Конститутсияи Ҷумҳурии Тоҷикистон ҳамчун ҳуҷҷати баландэътибори ҳуқуқӣ дар таҳкими пояҳои давлатдории навини Тоҷикистон нақши калидӣ дошта, заминаи муҳим ва боэътимоди ташаккули соҳаҳои мухталифи ҳаёти ҷомеа ва давлат мебошад. Он натиҷаи заҳмату талошҳои пайвастаи мардуми тоҷик ва ифодаи ҳуқуқии ормонҳои он ба ҳисоб меравад».

Дар ҷараёни ҳамоиш судяҳо ва кормандони дастгоҳи Суди шаҳри Душанбе доир ба паҳлӯҳои гуногуни Конститутсияи Ҷумҳурии Тоҷикистон маърӯза намуданд.

АКС аз Суди шаҳри Душанбе