Дар сарбанди НБО-и «Себзор»-и Бадахшон корҳои сохтмонӣ оғоз ёфтанд

ДУШАНБЕ, 16.12.2022 /АМИТ «Ховар»/. Баъд аз анҷоми корҳои сохтмонӣ ва насби таҷҳизоти электронӣ дар бунёди зеристгоҳи 110-киловолтаи Неругоҳи барқи обии «Себзор» бо ҷалби мутахассисони ширкатҳои ватании Ҷамъияти дорои масъулияташ маҳдуди «Мадад» ва «Тоҷикгидроэлектромонтаж» (ТГЭМ) маҷрои дарёи Шоҳдараи ноҳияи Роштқалъа баста шуда, об аз тариқи канали муваққатии обгузар сар дода шуд. Дар ин бора АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар медиҳад.

Роҳбари сохтмони НБО-и «Себзор» Фохир Юсуфбеков иттилоъ дод, ки баъди дигар кардани маҷрои дарё корҳои сохтмонӣ дар сарбанди асосии неругоҳ оғоз ёфтанд. Сарбандии асосии неругоҳ бо дарзии 60 метр ва баландии 8 метр сохта шуда, ғунҷоиши оби он 5 млн кубро ташкил хоҳад дод.

НБО-и «Себзор» дар заминаи дастгирии Ҳукумати Ҷумҳурии Тоҷикистон маҳз бо дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тавассути ҳамкории Вазорати энергетика ва захираҳои оби Ҷумҳурии Тоҷикистон бо ҳукумати Олмон ва Ширкати барқии «Помирэнерҷи» бо мақсади татбиқи ҳадафи чоруми стратегии кишвар, яъне саноатикунонии босуръати мамлакат бунёд мегардад.

Сохтмони НБО-и «Себзор» ба рушди минбаъдаи саноат, аз ҷумла бунёди корхонаҳои саноатӣ ва таъсиси ҷойҳои нави корӣ заминаи воқеӣ фароҳам меорад.

Тавре иттилоъ дода шуд, дар сохтмони зеристгоҳи назди НБО-и «Себзор» аллакай 90 фисади корҳо дар ин иншоот ба анҷом расидаанд. Барои пешбурди корҳои бунёдӣ ҳоло 20 адад нақлиёти боркаши калонҳаҷм ва 40 нафар сохтмончиён ҷалб гардидаанд.

Масолеҳи сохтмонӣ, аз ҷумла семент ва арматура аз шаҳри Душанбе дастрас гардида, баҳри фаъолияти муназзам дар ин ҷо корхонаи хурди истеҳсоли семент низ ташкил карда шудааст.

Мутобиқи иттилои мутахассисон, бунёди неругоҳ дар ин мавзеъ бесабаб нест. Зеро суръати ҳаракати об дар ин ҷо нисбатан тез буда, дар фасли зимистон ях намекунад ва барои ба ҳаракат даровардани агрегатҳо хеле мувофиқ аст.

Ёдовар мешавем, ки дар доираи Лоиҳаи сохтмони НБО-и «Себзор» дар дарёи Шоҳдара 17 хоҷагии шахсӣ ба ҷойҳои дигар интиқол дода шуда, пурра бо манзили зист таъмин гардиданд.

Инчунин сохтмони бинои маъмурӣ барои сохтмончиён ва роҳҳои муваққатӣ дар назди иншоот бо ҷалби зиёда аз 60 нафар бинокорони маҳаллӣ оғоз гардид. То охири моҳи июни соли 2021 ҳамаи корҳои асосии сохтмонӣ ба анҷом расиданд.

Ҳоло сохтмони бино анҷом ёфта, шароити корӣ барои лоиҳачиён ва мушовирон муҳайё гардидааст.

Дар баробари ин, барои тезондани корҳо оид ба сохтмони пул аз болои дарёи Шоҳдара, ки барои сохтмони НБО- и «Себзор» хеле муҳим мебошад ва бунёди бинои муосири мактаби маҳаллӣ барои 400 хонанда тадбирҳо андешида мешаванд. Ҳамзамон сохтмони 18 км ХИБ-и 110кВ «Себзор-Хоруғ» идома дорад.

Дар маҷмӯъ, дар давраи сохтмони НБО-и “Себзор” то 300 нафар коргарон бо кор таъмин хоҳанд шуд.

НБО — и «Себзор» бо иқтидори 11 мВт бунёд гардида, ба истифода додани агрегати якуми он охири соли 2023 ба нақша гирифта шудааст.

Акс: МИҲД ВМКБ