ФОРУМИ САЁҲАТИВУ ТИҶОРАТИИ ТОҶИКИСТОН ВА УЗБЕКИСТОН. Ширкатҳои сайёҳии ҳарду давлат 21 созишномаи ҳамкорӣ ба имзо расониданд

Декабрь 28, 2022 11:32

ДУШАНБЕ, 28.12.2022 /АМИТ «Ховар»/. Ширкатҳои сайёҳии Тоҷикистон ва Узбекистон дар доираи Форуми саёҳативу тиҷоратӣ, ки дирӯз, 27 декабр дар шаҳри Душанбе баргузор гардид, 21 созишномаи ҳамкорӣ ба имзо расониданд, хабар медиҳад АМИТ «Ховар» бо истинод ба Кумитаи рушди сайёҳӣ.

Форуми мазкур бо дастгирии Ҳукумати мамлакат ва ташаббуси Кумитаи рушди сайёҳӣ доир карда шуд.

Дар кори форум роҳбарияти Кумитаи рушди сайёҳӣ, намояндагони вазорату идораҳои ҷумҳурӣ, ассотсиатсияву ширкатҳои сайёҳии ватанӣ, меҳмонхонаҳо, осоишгоҳҳову табобатгоҳҳо ва аз ҷониби Узбекистон намояндагони Вазорати сайёҳӣ ва мероси фарҳангӣ ва ширкатҳои сайёҳии ин кишвар иштирок намуданд.

Дар форум ҷонибҳо оид ба зарфияти сайёҳии ҳарду кишвар маълумот доданд.

Изҳори умед карда шуд, ки истифодаи таҷриба ва донишҳои пешқадам дар соҳаи сайёҳии Тоҷикистон ва Узбекистон ба рушди минбаъдаи ҳамкории башардӯстона ҷиҳати таҳкими робитаҳои муштараки сайёҳию фарҳангӣ дар минтақаи Осиёи Марказӣ мусоидати ҳамаҷониба менамояд.

Таъкид гардид, ки ҳоло ҳамкорӣ миёни ширкатҳои сайёҳии Тоҷикистону Узбекистон дар сатҳи зарурӣ ба роҳ монда шуда, хатсайрҳои минтақавӣ низ амалӣ мешаванд.

Иттилоъ дода шуд, ки дар айни замон дар бозори хизматрасонии сайёҳии Тоҷикистон 240 ширкати сайёҳӣ фаъолият менамоянд.

Мавриди зикр аст, ки дар маҷмӯъ миёни ширкатҳои сайёҳии Тоҷикистон ва Узбекистон оид ба ҷалби сайёҳон ба кишварҳои ҳамдигар бештар аз 100 шартномаи ҳамкорӣ ба имзо расидаанд.

Имрӯзҳо дар заминаи созишнома миёни ҳукуматҳои Тоҷикистон ва Узбекистон оид ба мусофирати мутақобилаи шаҳрвандон ва созишнома байни ҳукуматҳои ҳарду давлат оид ба ҳамкорӣ дар соҳаи сайёҳӣ гурӯҳҳои зиёди сайёҳони тоҷик аз Узбекистон ва баръакс боздид менамоянд.


Узбекистон аз лиҳози ташрифи сайёҳон ба қатори даҳгонаи кишварҳое дохил мешавад, ки сайёҳонашон бештар ба Тоҷикистон ворид мешаванд.

Созишнома оид ба ҳамкорӣ дар соҳаи сайёҳӣ ба рушди робитаҳо дар самтҳои афзалиятнок, аз ҷумла мубодилаи иттилоот доир ба рушди сайёҳӣ тавассути маводи нашрӣ, филмҳо, гузаронидани чорабиниҳои тарғиботӣ, конфронсҳо, машғулият, ташкили намоишгоҳҳо ва барои ба роҳ мондани ҳамкорӣ миёни ширкатҳои сайёҳии ватанӣ ва ширкатҳои сайёҳии Узбекистон нигаронида шудааст.

Оғоз гардидани сафари бераводид миёни Тоҷикистону Узбекистон занҷири самараноке ба вуҷуд овард, ки на танҳо ба рушди бахши сайёҳӣ миёни ду кишвар, балки инчунин ба ҳамкории минтақавии сайёҳӣ мусоидат намуд.


Таҳлилҳо нишон медиҳанд, ки зимни ташриф ба Тоҷикистон сайёҳони Узбекистон ба намудҳои сайёҳии табобатӣ-солимгардонӣ, экологӣ ва сайёҳии зиёратӣ бештар майлу рағбат доранд.

Дар кори форум бо мақсади тақвияти ҳамкорӣ ва ҷалби сайёҳон ба кишварҳои ҳамдигар миёни ширкатҳои сайёҳии ватанӣ ва узбекистонӣ 21 созишномаи ҳамкорӣ ба имзо расонида шуд.

Ҳамчунин дар доираи форум барои меҳмонон саёҳати иттилоотӣ (инфо-тур) ба мавзеъҳои ҷолиби сайёҳии Тоҷикистон ташкил карда шуд.

АКС: Кумитаи рушди сайёҳии назди Ҳукумати Ҷумҳурии Тоҷикистон

Декабрь 28, 2022 11:32

Хабарҳои дигари ин бахш

Моҳи сентябр таҷдиди Неругоҳи барқи обии «Қайроқум» пурра ба итмом мерасад
Рейтинги кредитии соҳибихтиёрии Тоҷикистон дар сатҳи «B» бо дурнамои «устувор» тасдиқ шуд
Ба шаҳри Норак беш аз 39 ҳазор сайёҳи дохилию хориҷӣ ворид гардид
Дар корхонаҳои саноатии ноҳияи Мастчоҳ ба маблағи беш аз 113 миллион сомонӣ маҳсулот истеҳсол карда шудааст
Дар шашмоҳаи якуми соли 2025 ба низоми бонкии Тоҷикистон 3 миллиард доллари ИМА сармояи хориҷӣ ҷалб карда шуд
EXPO-2025. Ҳамарӯза гӯшаи Тоҷикистонро 25 ҳазор нафар тамошо менамоянд
Соли равон 61 музоядаи фурӯши коғазҳои қиматнок ба маблағи 12,4 миллиард сомонӣ доир карда шуд
МАСЛИҲАТИ МУТАХАССИС. Истеъмоли ҷаъфарӣ ба биниш ва саломатии чашм муфид аст
Мақомоти зиддикоррупсионии Тоҷикистон ва Узбекистон дар Душанбе табодули таҷриба намуданд
Лоиҳаи «Барномаи миллии рушди Ҷумҳурии Тоҷикистон барои солҳои 2026–2030» баррасӣ гардид
ҲИСОББАРОБАРКУНИИ ҒАЙРИНАҚДӢ. Дар Тоҷикистон кортҳои пардохтии бонкӣ 9,1 миллион ададро ташкил медиҳанд
Коргоҳи истеҳсоли пойафзоли шаҳри «Бӯстон» ба бозор маҳсулоти босифат ва рақобатпазир пешниҳод менамояд