Дар назди Вазорати маориф ва илми Тоҷикистон Маркази ғизои мактабӣ таъсис ёфт

Январь 20, 2023 09:16

ДУШАНБЕ, 20.01.2023. /АМИТ «Ховар»/. 18 январ дар шаҳри Душанбе маросими ифтитоҳи аввалин Маркази миллии ғизои мактабӣ дар назди Вазорати маориф ва илми Ҷумҳурии Тоҷикистон баргузор гардид, иттилоъ медиҳад мухбири АМИТ «Ховар».

Ин марказ ба хотири боло бурдани зарфияти вазорат барои назорати Барномаи ғизои мактабӣ, ки аз ҷониби Россия маблағгузорӣ мешавад, таъсис дода шудааст.

Дар маросим муовини аввали Вазири маориф ва илми Ҷумҳурии Тоҷикистон Ҷамшед Ҷӯразода, Сафири Федератсияи Россия дар Ҷумҳурии Тоҷикистон Семён Григорев, намоянда ва директори Созмони ҷаҳонии озуқа дар Ҷумҳурии Тоҷикистон Адҳам Мусаллам иштирок доштанд.

«Марказ ба Вазорати маориф ва илми Тоҷикистон имкон медиҳад, ки ҷараёни иҷрои Барномаи ғизои мактабиро назорат кунад, ки ин қадами муҳим дар роҳи ба хусусияти воқеан миллӣ табдил ёфтани он хоҳад буд. Моҳи декабри соли 2022 Федератсияи Россия барои харидани ғизо барои мактаббачаҳои тоҷик 4 миллион доллари амрикоӣ саҳми иловагӣ ҷудо кард.

Бо дарназардошти ин, ҳаҷми умумии маблағҳои Россия, ки барои Барномаи ғизои мактабӣ дар ҷумҳурӣ пешбинӣ шудааст, беш аз 86 миллион доллари ИМА-ро ташкил медиҳад. Ин гувоҳӣ медиҳад, ки Россия ба дастгирии насли ҷавони Тоҷикистони бародар то чӣ андоза таваҷҷуҳи зиёд зоҳир мекунад», — зикр кард С.Григорев.

Ба гуфтаи Ҷ.Ҷӯразода, Россия ва Созмони ҷаҳонии ғизо дар ташкили ғизои мактаббачагон дар Тоҷикистон саҳми арзанда доранд. Ифтитоҳи Маркази ғизои мактабӣ ҳамкории моро ба сатҳи нав мебарорад.

«Барои таъсиси Маркази ғизои мактабӣ дар назди Вазорати маориф ва илми Тоҷикистон дар чаҳорчӯби Барномаи ғизои мактабӣ аз ҷониби WFP 200 ҳазор доллар ҷудо шудааст. Аз ҳисоби ин маблағ биноҳо таъмир ва бо таҷҳизоти замонавию нармафзор муҷаҳҳаз гардида, фонди музди меҳнати кормандони Марказ ташкил карда шуд», — афзуд муовини аввали вазир.

Барномаи ғизои мактабӣ бузургтарин лоиҳаи WFP дар Тоҷикистон аст, ки аз соли 2013 аз ҷониби Федератсияи Россия маблағгузорӣ мешавад. Дар доираи он қариб 440 ҳазор нафар хонандагони синфҳои 1—4-и 2000 мактаби 52 шаҳру ноҳияи ҷумҳурӣ ба таври доимӣ бо хӯроки гарм таъмин карда мешаванд.

Илова бар ин, аз ҳисоби барнома 50 ошхонаи мактабӣ таъмир ва бо таҷҳизоти муосир муҷаҳҳаз гардонида шуданд. Дар заминаи онҳо 9 гармхона, 5 нонвойхонаи байнимактабӣ ва 1 корхонаи коркарди хӯрокворӣ фаъолият доранд. Илова бар ин, 7 нонвойхонаҳои хусусӣ муҷаҳҳаз шудаанд, ки бо мактабҳо кор мекунанд.

Ба гуфтаи намояндаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Шералӣ Раҳматуллоев, ҳифзи саломатии кӯдакон яке аз масъалаҳои афзалиятноки фаъолияти Ҳукумати Ҷумҳурии Тоҷикистон мебошад. «Хӯроки мактабӣ ҳамчун воситаи муассири афзоиши давомот дар мактабҳои ибтидоӣ эътироф шудааст. Илова бар ин, тадбирҳо оид ба беҳтар намудани ғизои мактабӣ дар беҳтар кардани тамаркуз ва фаъолияти равонии хонандагон самаранок мебошанд. Феълан вазорат дар ҳоли таҳия қарор дорад ва ба зудӣ ба Ҳукумати Ҷумҳурии Тоҷикистон «Барномаи рушди устувори ғизои мактабӣ» пешниҳод карда мешавад, ки ба ғизои солим ва бехатар нигаронида шудааст.

Донорҳо барои омода кардани хӯроки гарм мактабҳоро бо маводи ғизоӣ, аз ҷумла орд, равған, намак ва лӯбиёгӣ таъмин мекунанд. Қобили зикр аст, ки 5,5 миллион сомоние, ки барои ғизои мактаббачаго ҷудо мешавад, танҳо барои хӯроки яквақтаи 17-18 ҳазор хонанда басанда аст. Тибқи нақшаи барномаи пешниҳодшуда, то соли 2027 хонандагони синфҳои ибтидоӣ, ки тақрибан 1 миллион нафаранд, 100% бо хӯроки яквақта таъмин карда мешаванд», — гуфт Шералӣ Раҳматуллоев.

Ёдовар мешавем, ки соли 2017 Ҳукумати Ҷумҳурии Тоҷикистон Стратегияи рушди устувори ғизои мактабӣ дар Ҷумҳурии Тоҷикистонро барои давраи то соли 2027 қабул кард.

Зарангези ЛАТИФ,
АМИТ «Ховар» 

 АКС: Сафорати Россия дар Тоҷикистон

Январь 20, 2023 09:16

Хабарҳои дигари ин бахш

1 июл даври асосии Имтиҳонҳои марказонидаи дохилшавӣ оғоз мегардад
Барои иштирок дар даври асосии Имтиҳонҳои марказонидаи дохилшавӣ беш аз 112 ҳазор нафар довталаб номнавис карда шуд
Аҳлиддин Ибодуллозода: «Тарбияи насли нави ваҳдатофару ваҳдатсаро аз омӯзгорон – меъморони руҳи инсон вобаста аст»
«БЕҲТАРИН ОМӮЗГОР». Фотима Сайдализода дар Озмуни байналмилалии таҳқиқотӣ сазовори дипломи дараҷаи I гардид
Марҳалаи якуми озмуни довталабон барои дарёфти Стипендияи байналмилалии «Дурахшандагон» доир гардид
Байни Донишгоҳи давлатии Бохтар ва Донишгоҳи забонҳои хориҷии Сиани Чин Ёддошти тафоҳум ба имзо расид
Ҳамкорӣ байни муассисаҳои таҳсилоти олии Тоҷикистон ва Узбекистон таҳким меёбад
Дар шаҳри Хуҷанд ғолибони олипиадаҳо ва омӯзгорони беҳтарин қадршиносӣ шуданд
Донишгоҳи давлатии ҳуқуқ, бизнес ва сиёсати Тоҷикистон бо Донишгоҳи давлатии забонҳои хориҷии Сиани Чин лоиҳаҳои инноватсиониро амалӣ менамоянд
Устодони Донишгоҳи техникии Тоҷикистон дар Форуми табодули истеъдодҳои Осиёи Марказӣ иштирок доранд
«Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2026–2030» муҳокима гардид
Таҳти унвони «Эмомалӣ Раҳмон — қаҳрамони ваҳдати тоҷикон» дар Донишгоҳи давлатии омӯзгории Тоҷикистон ҳамоиш доир шуд