РАСМАН. Игор Черевченко сармураббии «Истиқлол» таъйин шуд

ДУШАНБЕ, 18.01.2023 /АМИТ «Ховар»/. Имрӯз дар шаҳри Душанбе миёни Клуби футболи  «Истиқлол» ва сармураббии нави даста Игор Черевченко шартномаи ҳамкорӣ ба имзо расид. Дар ин бора АМИТ «Ховар» бо истинод ба КФ «Истиқлол» хабар медиҳад.

«Раҳбарияти клуби футболи «Истиқлол» номзадии Игор Черевченкоро ба вазифаи сармураббии даста тасдиқ кард», — хабар доданд дар КФ КФ «Истиқлол».

Шартномаи корӣ бо мураббии маъруф ва собиқ бозигари дастаи мунтахаби Тоҷикистон то охири соли 2023  баста шудааст.

Сармураббии нави даста Игор Черевченко  муваззаф шудааст, ки дар ҳамаи мусобиқаҳое, ки чемпиони чандкаратаи Тоҷикистон оид ба футбол иштирок мекунад, бояд натиҷаҳои хуб нишон диҳад ва сазовори ҷойҳои ифтихорӣ гардад.

Ба Игор Черевченко дар «Истиқлол» дастпарвари дигари футболи тоҷик,  собиқ футболбози дастаи «Помир»-и Душанбе Юрий Батуренко  кумак мекунад, ки ёвари сармураббӣ таъйин шудааст.  Шартнома бо Юрий Батуренко низ то охири соли равон баста шуд.

АКС: КФ «Истиқлол»