Соли гузашта дар ноҳияи Ҷалолуддини Балхӣ 6 корхонаи нав ба истифода дода шуданд

ДУШАНБЕ, 17.02.2023. /АМИТ «Ховар»/. Соли 2022 дар ноҳияи Ҷалолуддини Балхии вилояти Хатлон 6 коргоҳи нав ва корхонаҳои саноатӣ — «Илҳоми Илҳомиддин», «Ғолибҷон Холов», «Фирӯза», «Исматулло», «Каримов Тоҳир» ва «Муҳаммадҷони А» таъсис дода шуданд. Дар ин хусус дар нишасти матбуотии мақомоти иҷроияи ҳокимияти давлатии ноҳияи Ҷалолуддини Балхӣ иттилоъ дода шуд.

«Соли сипаришуда дар ноҳия 33 корхонаи саноатӣ фаъолият кард, ки онҳо маҳсулотро асосан аз ашёи хоми маҳаллӣ истеҳсол намуданд. Ин корхонаҳо соли 2022 дар ҳаҷми 252 миллиону 769, 8 ҳазор сомонӣ маҳсулот истеҳсол кардаанд, ки нисбат ба ҳамин давраи соли 2021 ба маблағи 53 миллиону 792 ҳазор сомонӣ зиёд буда, 125, 8 фоизи нақшаро ташкил медиҳад», — гуфта шуд дар нишаст.

Корхонаҳои саноатии ноҳия 341 ҳазору 722 тонна семент, 2343,3 тонна маҳсулоти нонӣ, 608,4 ҳазор дона хиштҳои сементӣ, 2633,7 тонна нахи пахта ва 5917,5 тонна орд истеҳсол намудаанд.

Дар нишасти матбуотӣ ҳамчунин таъкид гардид, ки соли гузашта дар ноҳия ҳаҷми истеҳсоли маҳсулоти кишоварзӣ як миллиарду 429 миллиону 157 ҳазор сомониро ташкил дода, нисбат ба ҳамин давраи соли 2021 39 миллиону 366,6 ҳазор сомонӣ зиёд мебошад, ки афзоиши он 102, 8 фоизро ташкил медиҳад.

АКС: АМИТ «Ховар»