Дар ноҳияи Ҷалолиддини Балхӣ дар рӯзи аввали даъват 100 нафар ба сафи Артиш ҷалб гардид

ДУШАНБЕ, 03.04.2023 /АМИТ «Ховар»/. 1 апрел дар Комиссариати ҳарбии ноҳияи Ҷалолиддини Балхӣ бо иштироки раиси ноҳия, раисони ҷамоатҳои шаҳраку деҳоти ноҳия ва волидони даъватшудагон бахшида ба оғози даъвати баҳории ҷавонон ба хизмати ҳарбӣ маъракаи идона баргузор гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳия хабар доданд.

Дар рӯзи аввали даъват аз ҷамоатҳои шаҳраку деҳоти ноҳия 100 ҷавон бо хоҳиши худ ба Комиссариати ҳарбии ноҳия барои шомил шудан ба сафи Қувваҳои Мусаллаҳи Ҷумҳурии Тоҷикистон дархост пешниҳод намуд. Онҳо пас аз гирифтани шаҳодатномаи ронандагӣ ба хизмати аскарӣ ҷалб гардиданд.

Гуфта шуд, ки бузургии ҳар давлат аз ҳастии артиши он вобастагии амиқ дорад, зеро вазифаи ҳар сарбоз посбонӣ намудани марзи давлати худ мебошад.

Нақши ҳомиёни Ватан дар таъмини амнияту осудагии мардуми ҷумҳурӣ хеле бузург мебошад. Роҳбарияти ноҳия изҳори умедворӣ намуд, ки ҷавонони ноҳия ба ҳисси баланди ватандӯстӣ баҳри ободиву осоиштагии Ватан сарбаландона хизмати ҳарбиро ба ҷо меоранд.

АКС: Мақомоти иҷроияи ҳокимияти давлатии ноҳияи Ҷалолиддини Балхӣ