Дар шаҳри Кӯлоб бо намояндагони ҶДММ «ПЭК»-и Федератсияи Русия мулоқот доир карда шуд

КӮЛОБ, 08.04.2023. /АМИТ «Ховар»/. Дар шаҳри Кӯлоб бо намояндагони ҶДММ «ПЭК»-шаҳри Москваи Федератсияи Русия ҷиҳати ба кор ҷалб намудани сокинон мулоқот доир гардид, хабар медиҳад мухбири минтақавии АМИТ «Ховар» Сулаймон Холзода.

Бояд тазаккур дод, ки Созишнома байни Ҳукумати Ҷумҳурии Тоҷикистон ва Ҳукумати Федератсияи Русия оид ба ҷалби муташаккилонаи шаҳрвандони Ҷумҳурии Тоҷикистон барои амалӣ намудани фаъолияти меҳнатии муваққатӣ дар Федератсияи Русия 17 апрели соли 2019 ва Созишномаи ҳамкорӣ байни Муассисаи давлатии «Агентии бокортаъминкунӣ дар хориҷа»-и Вазорати меҳнат, муҳоҷират ва шуғли аҳолии Ҷумҳурии Тоҷикистон ва ҶДММ «ПЭК»-и шаҳри Москваи Федератсияи Русия 30 январи соли 2019 ба имзо расида буд.

Дар асоси ин созишномаҳо ширкати мазкур бо мақсади ба роҳ мондани ҳамкорӣ ҷиҳати ба кор ҷалб намудани сокинони шаҳри Кӯлоб вохӯрӣ баргузор намуд.

Бояд гуфт, ки ҶДММ «ПЭК» яке аз бузургтарин ширкати логистикии Федератсияи Русия ба ҳисоб рафта, дар минтақаҳои ин давлат зиёда аз 300 филиали он фаъолият менамояд.

АКС: Мақомоти иҷроияи ҳокимияти давлатии шаҳри Кӯлоб